فوتو: pinterest.com
FusionLab كومپانياسى جۇرگىزگەن ساۋالناماعا 1,5 مىڭ ادام قاتىسقان. «قانداي سومانى بۇگىندە جيناق دەپ ەسەپتەۋگە بولادى؟» دەگەن سۇراققا جاۋاپ بەرگەندەردىڭ ىشىندە ەڭ كوپ بولىگى (9,8%) 500 مىڭنان 1 ميلليون تەڭگەگە دەيىنگى سومانى اتاعان. تاعى 7,1 پايىزى ءۇشىن جيناق كولەمى 100 مىڭ تەڭگەدەن باستالادى.
رەسپوندەنتتەردىڭ 19,1 پايىزى جيناق دەپ 1 ميلليون تەڭگەدەن اساتىن سومانى سانايدى. 3,9 پايىزى ءۇشىن بۇل شەك – 10 ميلليون تەڭگەدەن جوعارى. 0,6 پايىز قازاقستاندىقتار جيناق دەپ 50–100 ميلليون تەڭگە ارالىعىنداعى سومانى اتاسا, 0,9 پايىزى – 100-500 ميلليون تەڭگە كولەمىن كورسەتكەن. ءتىپتى 0,1 پايىزى ءۇشىن جيناق كولەمى 1 ميلليارد تەڭگەدەن باستالادى.
سول ساۋالناما ناتيجەسىندە ەلدەگى ەڭ كوپ تابىس توبى دا انىقتالدى: 34,7 پايىز ازامات ايىنا 150 -300 مىڭ تەڭگە تابىس تابادى. 21,9 پايىزىنىڭ ايلىعى – 300-500 مىڭ تەڭگە ارالىعىندا. ال 10,2 پايىز رەسپوندەنتتىڭ جالاقىسى 500 مىڭ تەڭگەدەن جوعارى.
