ماتچ 2026 جىلدىڭ 29 قاڭتارىنا قاراعان ءتۇنى «ەميرەيتس» ارەناسىندا وتەدى. «كانونيرلەر» بيلەتتەردىڭ قۇنىن 44,80–84 فۋنت ستەرلينگ (30–50 مىڭ تەڭگە شاماسىندا) ارالىعىندا بەلگىلەدى.
ايتا كەتسەك, بۇعان دەيىن ميلاندا وتكەن «قايرات» پەن «ينتەر» اراسىنداعى ويىندا ەڭ ارزان بيلەت نەبارى 5 ەۋرو (3100 تەڭگە) بولعان ەدى. سونداي-اق 8, 10, 14 ەۋرو تۇراتىن ورىندار دا بولعان. ەڭ قىمبات بيلەت 349 ەۋروعا (217 مىڭ تەڭگە) ساتىلعان.
ال الماتىداعى چەمپيوندار ليگاسى ويىندارىنا بيلەتتەردىڭ باعاسى 30 مىڭ تەڭگەدەن باستاپ, 250 مىڭ تەڭگەگە دەيىن جەتكەن. مۇنداي باعا ساياساتى «قايراتتىڭ» ءوز الاڭىنداعى «رەال» جانە «پافوسقا» قارسى كەزدەسۋلەرىندە قولدانىلعان.
ەسكە سالا كەتسەك, تۇڭعىش رەت چەمپيوندار ليگاسىنىڭ نەگىزگى كەزەڭىندە ونەر كورسەتىپ جاتقان «قايرات» ءتورت ويىن وتكىزدى: پورتۋگالدىق «سپورتينگكە» (1:4) جانە مادريدتىك «رەالعا» (0:5) جول بەردى, كيپرلىك «پافوسپەن» (0:0) تەڭ ءتۇسىپ, «ينتەرگە» (1:2) ەسە جىبەردى. قازىر كوماندا تۋرنير كەستەسىندە 34-ورىندا, قورجىنىندا – 1 ۇپاي.
