كوللاج: kursiv.media
«قازاقستان مەن رەسەي ءۇشىن بيىلعى جىل ايتۋلى مەرەيتويلىق شارالارمەن ەستە قالدى. سولاردىڭ ىشىندەگى ەڭ ماڭىزدىسى – ۇلى جەڭىستىڭ 80 جىلدىعى. بۇل – حالىقتارىمىزدىڭ تاريحىنداعى ەڭ ۇلى وقيعالاردىڭ ءبىرى.
بەلگىلى بولعانداي, ءار بەسىنشى قازاقستاندىق مايدانعا اتتاندى, ولاردىڭ شامامەن جارتىسى شايقاس الاڭىندا قازا تاپتى. ميلليونداعان ازاماتتارىمىز – كارى دە, جاس تا تىلدا ايانباي ەڭبەك ەتتى. مايداندا قازا تاپقان جاۋىنگەرلەردىڭ ەسىمىن ماڭگى ەستە قالدىرۋ ماقساتىندا جانكەشتى ەڭبەك ەتىپ جۇرگەن قازاقستان, رەسەي جانە باسقا دا ەلدەردىڭ ەرىكتى ىزدەۋشىلەرىنە شىن جۇرەكتەن العىسىمدى بىلدىرەمىن», دەدى پرەزيدەنت.
سونىمەن قاتار جەڭىس مەرەيتويىنا وراي استانادا اۋقىمى جاعىنان بۇرىن-سوڭدى بولماعان اسكەري شەرۋ وتكەنىن, ەلىمىزدىڭ تۇكپىر-تۇكپىرىندە اكەلەرىمىز بەن اتالارىمىزدىڭ ەرلىگىنە ارنالعان جۇزدەگەن ەستەلىك ءىس-شارا ۇيىمداستىرىلعانىن تىلگە تيەك ەتتى.
ء«بىزدىڭ ەلدەرىمىزدى بىرىكتىرەتىن تاعى ءبىر ماڭىزدى بەلەس – اڭىزعا اينالعان بايقوڭىر عارىش ايلاعىنىڭ 70 جىلدىق مەرەيتويى. بۇل كەشەن الەمدىك كوسموناۆتيكانىڭ بەسىگى ءارى ادامزات اقىل-ويىنىڭ ۇلىلىعىن ايعاقتايتىن نىشان بولىپ سانالادى. ونداعان جىلدار بويى بايقوڭىر ەكى مەملەكەتتىڭ ستراتەگيالىق ارىپتەستىگىنىڭ بەرىك دانەكەرى رەتىندە عىلىمي-تەحنيكالىق پروگرەستى جانە بولاشاققا ۇمتىلىستى بەينەلەپ كەلەدى», دەپ جازادى مەملەكەت باسشىسى.
