سۋرەت: 24.kz
الماتى وبلىسى دەنساۋلىق ساقتاۋ باسقارماسىنىڭ باسشىسى ەرجان سۇلەيمەنوۆ اتاپ وتكەندەي, شەبەرلىك ساباعىن وتكىزۋ – جاي عانا تاجىريبە الماسۋ ەمەس, حالىقارالىق ستاندارتتاردى وتاندىق تاجىريبەگە ەنگىزۋدىڭ ناقتى قادامى.
ء«بىز جاپوندىق عىلىمي ورتالىقپەن كەلىسىمگە كەلۋدىڭ سوڭعى كەزەڭىنە شىقتىق. الداعى جىلدان باستاپ الماتى وبلىسىنىڭ حيرۋرگتەرى مەن ەندوسكوپيستەرى جاپونيادا تەگىن وقىپ, تاعىلىمدامادان وتە الادى. قاتىسۋ شارتتارىنىڭ ءبىرى – اعىلشىن ءتىلىن ءبىلۋ. بۇل جاس ماماندارعا ۇلكەن ىنتالاندىرۋ بولادى, دەنساۋلىق ساقتاۋ جۇيەسىنىڭ كادرلىق الەۋەتىن نىعايتادى. سونىمەن قاتار وتاندىق دارىگەرلەر ەلدىڭ جەتەكشى مەديتسينالىق مەكەمەلەرىنىڭ ءبىرى سانالاتىن استاناداعى ۇلتتىق ونكولوگيا ورتالىعىنا دا وقۋعا جىبەرىلەدى. ماقساتىمىز – مەديتسينالىق كادرلاردىڭ كاسىبي دامۋىن ۇزدىكسىز قامتاماسىز ەتۋ, وزىق تەحنولوگيالاردى قولدانىسقا ەنگىزۋ», دەدى ەرجان ابىلقاسىم ۇلى.
شەبەرلىك ساباعىنا جاپونيادان كەلگەن ەكى جەتەكشى مامانمەن قاتار, ەلىمىزدىڭ شتاتتان تىس باس ەندوسكوپيسى, پروفەسسور قانات باتىربەكوۆ قاتىستى. ەندوسكوپيالىق وپەراتسيالاردىڭ كورسەتىلىمدەرى, وقۋ سەسسيالارى, كلينيكالىق جاعدايلاردى تالقىلاۋ بولىپ ءوتتى.
جاپوندىق مامانداردىڭ وتاندىق دارىگەرلەردى وقىتۋعا قاتىسۋى – دەنساۋلىق ساقتاۋ جۇيەسىنىڭ دامۋىنا قوسىلعان باعا جەتپەس ۇلەس. مۇنداي ءىس-شارالار دارىگەرلەردىڭ بىلىكتىلىگىن ارتتىرىپ قانا قويماي, مەديتسينالىق كومەكتىڭ ساپاسىن ستراتەگيالىق تۇرعىدان كۇشەيتۋگە ىقپال ەتەدى.
ەندوسكوپيا ورتالىعىنىڭ مەڭگەرۋشىسى, حيرۋرگ دارىگەر تاحير شكۋراليەۆتىڭ ايتۋىنشا, جاپون ەندوسكوپيا مەكتەبى جوعارى تەحنيكالىق دالدىگىمەن قاتار, ۇقىپتى ارالاسۋ فيلوسوفياسىمەن ەرەكشەلەنەدى. ونىڭ سوزىنشە, الماتى وبلىسىنىڭ ماماندارى تەك تەحنولوگيانى عانا ەمەس, سول كوزقاراسپەن ويلاۋ جۇيەسىن دە مەڭگەرىپ جاتىر. بۇل – بۇكىل ەندوسكوپيا قىزمەتىنىڭ دامۋىنا جاسالعان ماڭىزدى قادام.
وتاندىق ەندوسكوپيا قوعامدىق بىرلەستىگىنىڭ توراعاسى, پروفەسسور قانات باتىربەكوۆ مۇنداي شەبەرلىك ساباقتارىن وتكىزۋ سالانىڭ ءوسۋىنىڭ باستى كەپىلى ەكەنىن, ءدال قازىرگى رەجىمدە كورۋگە بولاتىن وپەراتسيالار, ناقتى جاعدايلاردى تالقىلاۋ, حالىقارالىق ساراپشىلارمەن قارىم-قاتىناس – مۇنىڭ بارلىعى پاتسيەنتتەرگە كورسەتىلەتىن كومەكتىڭ ساپاسىنا تىكەلەي اسەر ەتەتىنىن ايتادى.
شەبەرلىك ساباعىنىڭ ەكىنشى كۇنى پاتسيەنتتەرگە كونسۋلتاتسيا بەرۋ, قوسىمشا حيرۋرگيالىق كورسەتىلىمدەر, ساراپتامالىق پىكىرتالاستار ءوتتى. وسىنداي دەڭگەيدەگى ءىس-شارانىڭ قوناەۆ قالاسىندا ۇيىمداستىرىلۋى وتاندىق مامانداردىڭ جوعارى كاسىبي دايارلىعىنىڭ, ەلىمىز مەديتسيناسىنىڭ حالىقارالىق كاسىبي ىنتىماقتاستىققا اشىقتىعىنىڭ دالەلى بولدى.
الماتى وبلىسى
