جوبا وسكەلەڭ ۇرپاقتىڭ قۇقىقتىق مادەنيەتىن قالىپتاستىرۋعا, كامەلەتكە تولماعاندار اراسىنداعى قۇقىق بۇزۋشىلىقتىڭ الدىن الۋعا جانە «زاڭ مەن ءتارتىپ» قاعيداسىن ناسيحاتتاۋعا باعىتتالعان. سونداي-اق ۇيىمداستىرۋشىلار ءمۋلتفيلمنىڭ ماقساتى – بالالارعا زاڭ مەن ادىلدىكتىڭ, قوعامدىق ءتارتىپتىڭ ماڭىزدىلىعىن جەڭىل تىلمەن ءارى قىزىعاتىنداي ەتىپ ءتۇسىندىرىپ بەرۋ ەكەنىن جەتكىزدى.
انيماتسيالىق فيلمدەگى باستى كەيىپكەر – ەلدىڭ تاۋەلسىزدىگى مەن كۇش-قۋاتىن بەينەلەيتىن بارىس اڭى. ول سيۋجەت بارىسىندا بالالارعا ادالدىق پەن قۇرمەتتىڭ, ەرەجەلەردى ساقتاۋدىڭ نە ەكەنىن ۇيرەتىپ, تاپتىشتەپ تۇسىندىرەدى.
ءىس-شارا بالالارعا مەرەكەلىك كوڭىل كۇي سىيلادى. وقۋشىلار فيلم تاماشالاۋمەن قاتار, جول قوزعالىسى ەرەجەلەرى بويىنشا سۇراق-جاۋاپقا قاتىسىپ, كينولوگ, كريميناليست جانە ارنايى جاساق قىزمەتىنىڭ جۇمىستارىمەن جاقىنىراق تانىستى. سونداي-اق پوليتسيانىڭ قيىن دا جاۋاپتى قىزمەتىنەن سىر شەرتكەن فوتوكورمەگە قاتىستى. مەرەكەلىك ءىس-شارادا قۋىرشاق تەاترى, شىمكەنت تسيركى ارتىستەرى, جول قوزعالىسىنىڭ جاس ينسپەكتورلارى ساحنالىق قويىلىمدار قويدى. ونىڭ سوڭى ونەرپازدار ۇيىمداستىرعان قىزىقتى كونتسەرتكە ۇلاستى. ستسەناري بويىنشا ىزگى نيەتتىڭ بەلگىسى رەتىندە اۋەگە ءتۇرلى-ءتۇستى شارلار ۇشىرىلدى.
ءوز كەزەگىندە جوبا اۆتورلارى «BalaZan» – تەك مۋلتفيلم عانا ەمەس, بالالارعا زاڭ مەن ادىلدىكتى, ەڭ باعالى قاسيەت ءوزارا قۇرمەتتەۋدى ۇيرەتەتىن ماڭىزدى تاربيەلىك باستاما ەكەنىن ايتتى.
«پرەزيدەنت قاسىم-جومارت توقاەۆتىڭ باستاماسىمەن ەلىمىزدە «زاڭ مەن ءتارتىپ» قاعيداسى جۇزەگە اسىرىلىپ جاتىر. ول ءبىرىنشى كەزەكتە مەملەكەتتە قوعامدىق ءتارتىپتى ساقتاۋدى كوزدەيدى. وسكەلەڭ ۇرپاق جاستايىنان زاڭدى سىيلاپ وسسە, كەيىن ەسەيگەندە ءتارتىپ بۇزبايتىن بولادى. ءىس-شارا ارقىلى وسى يدەيامىزدى جەتكىزگىمىز كەلدى. بالانى جاستايىنان جاۋاپكەرشىلىكتى سەزىندىرىپ تاربيەلەسەك, ونداي ۇل-قىزدان ەرتەڭگى كۇنى وتە ۇقىپتى, ادال دا ءتارتىپتى ازامات ءوسىپ شىعادى. بالالاردىڭ دا ءوز ورتاسى بولادى. ول جەردە دە ءتارتىپ بۇزىلۋى مۇمكىن. بۋللينگ دەيتىن جامان ارەكەت قاداعالاۋدىڭ, دۇرىس تاربيەنىڭ بولماۋىنان تۋىندايدى. وسىنداي تەرىس قىلىقتىڭ الدىن الۋ ءۇشىن دە قالالىق اكىمدىكپەن بىرلەسىپ تاربيەلىك ءمانى زور انيماتسيالىق فيلم تۇسىردىك. مۋلتفيلم ارقىلى ۇلكەن كىسىلەردى سىيلاۋعا, وزىنەن كىشىگە قامقورلىق كورسەتۋگە ۇيرەتۋدى ماقسات تۇتتىق. بۇگىندە الەمدە جاھاندانۋ ۇدەرىسى ءجۇرىپ جاتىر. سونىڭ سالدارىنان مادەنيەت, شەكارا اتاۋلارى جويىلىپ بارادى. بۇل قۇبىلىستىڭ اسەرىنەن ادامدار مەيلىنشە ەركىن, ەشقانداي ىرىم- تىيىمعا باعىنباي ءومىر سۇرۋگە تالپىنا باستادى. ونىڭ ءبىر جامان جەرى – ءداستۇر مەن تاربيەگە كەرى اسەرىن تيگىزەدى. اسىرەسە جاھاندانۋدىڭ قۇرباندىعىنا ءبىرىنشى جاستار ىلىگەدى. سول ءۇشىن ولاردى تەرىس قىلىق, جامان مىنەزدەن ساقتاۋ – بارشامىزدىڭ پارىزىمىز. وسىلايشا, قالالىق پوليتسيا جەرگىلىكتى اتقارۋشى بيلىكپەن تىزە قوسىپ, وسىنداي تاربيەلىك باعىتتاعى باستامالاردى قولعا الىپ جاتىر. ونىڭ ناتيجەسى جامان بولمايدى دەگەن ۇمىتتەمىز. بالا كۇندە بەرىلگەن تاربيە, تاعىلىمدى ءبىلىم ادامنىڭ بويىنان ەشقاشان جوعالىپ كەتپەيدى. وسى ماقساتقا وراي بالدىرعانداردىڭ بولاشاقتا ناعىز زيالى ازامات بولىپ قالىپتاسۋىنا قازىردەن باستاپ كىرىسىپ جاتىرمىز. باس كەيىپكەرى بارىس بولىپ بالالاردى دۇرىس تاربيەگە باۋليتىن انيماتسيالىق فيلم جوباسى وسى ايتىلعان سوزدەرىمىزدىڭ باستى ايعاعى», دەدى شىمكەنت قالالىق پوليتسيا دەپارتامەنتى باستىعىنىڭ ورىنباسارى ۇلىقبەك مىلتىقوۆ.
ماماننىڭ مالىمدەۋىنشە, «زاڭ مەن ءتارتىپ» قاعيداسىن ىسكە اسىرۋ باعىتىندا بۇگىنگى تاڭدا دەپارتامەنت قىزمەتكەرلەرى ۇلكەن جۇمىس اتقارىپ وتىر. سونىڭ ىشىندە بالالار مەن جاسوسپىرىمدەر اراسىندا بولاتىن قىلمىستىڭ الدىن الۋ مەن ولاردى ءتۇرلى قۇقىق بۇزۋشىلىقتان ساقتاۋ ءۇشىن مەكتەپتەر مەن ارناۋلى وقۋ ورىندارىندا ماڭىزدى كەزدەسۋلەر مەن ءتۇسىندىرۋ جۇمىستارى جۇرگىزىلىپ كەلەدى. سول باسقوسۋلاردا ءتارتىپ ساقشىلارى وقۋشىلار مەن ستۋدەنتتەرگە قوعامدىق ءتارتىپتى ساقتاۋدىڭ ماڭىزدىلىعى جونىندە, جامان ادەت-قىلىقتاردىڭ جەكە ادامنىڭ ومىرىنە, ونىڭ وتباسىنا جانە مەملەكەتكە تيگىزەر قانداي كەرى اسەرى بارىن ايتىپ تۇسىندىرەدى. دەپارتامەنت ماماندارىنىڭ حابارلاۋىنشا, جاس بالالارعا ارنالعان انيماتسيالىق فيلم جوباسى الداعى ۋاقىتتا دا جالعاسىن تابادى.
شىمكەنت
