قازاقستان ۇلگىسى جوعارى باعالانعان جۇزدەسۋ

كەشە قازاقستان رەسپۋبليكاسى پارلامەنتى سەناتىنىڭ توراعاسى قاسىم-جومارت توقاەۆ ماجارستاننىڭ سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سييارتونى قابىلدادى, دەپ حابارلادى سەناتتىڭ ءباسپاسوز قىزمەتى. ق.توقاەۆ قازاقستاننىڭ ماجارستانمەن قارقىندى جانە جان-جاقتى ىنتىماقتاستىقتى دامىتۋعا مۇددەلى ەكەنىن اتاپ ءوتتى. جوعارى پالاتانىڭ باسشىسى مەيماندى پارلامەنتتىڭ زاڭ شىعارۋ قىزمەتىمەن تانىستىرا كەلىپ, قازاقستان رەسپۋبليكاسىنىڭ پرەزيدەنتى ن.ءا.نازارباەۆقا كەزەكتەن تىس پرەزيدەنتتىك سايلاۋدى تاعايىنداۋ تۋرالى ماسەلەنى قاراۋدى وتىنگەن سەناتتا قابىلدانعان ۇندەۋ تۋرالى حاباردار ەتتى. ق.توقاەۆ قازاقستان حالقى اسسامبلەياسى كەڭەسىنىڭ باستاماسى بارشا حالىقتىڭ قىزۋ قولداۋىنا يە بولىپ, قازاقستاندىق قوعامدا وڭ پىكىرلەر تۋعىزعانىن اتاپ ءوتتى: «حالىقارالىق احۋال شيەلەنىسە تۇسكەندە جانە جاھاندىق ەكونوميكاداعى داعدارىستار كۇشەيگەن قازىرگى جاعدايدا ءبىزدىڭ پرەزيدەنت كەپىلى بولىپ تابىلاتىن ىشكى ساياسي تۇراقتىلىقتى قامتاماسىز ەتۋ اسا ماڭىزدى», دەدى ول. حالىقارالىق ماسەلەلەردى, اتاپ ايتقاندا, ۋكرايناداعى احۋالدى تالقىلاي كەلىپ, جۇزدەسۋشىلەر ۇلتتىق ەكونوميكانىڭ ءوزارا بايلانىستارى جاعدايىندا سانكتسيالاردى ەنگىزۋ ۋشىقتىرۋعا اپاراتىنىن ايتتى. تاراپتاردىڭ پىكىرىنشە, قايشىلىقتاردى ەڭسەرۋ, ءوزارا ءتيىمدى شەشىمدەر ىزدەستىرۋ مەن ىمىراعا كەلۋ ماقساتىندا ەۋروپالىق وداق پەن رەسەي اراسىنداعى سىندارلى ۇنقاتىسۋدى جاڭعىرتۋ جانە نىعايتۋ قاجەت. ق.توقاەۆ ۋكراين شيەلەنىسىن رەتتەۋ جونىندەگى قازاقستان پرەزيدەنتىنىڭ بەلسەندى قىزمەتى تۋرالى حاباردار ەتتى. الەمدىك جانە ءداستۇرلى دىندەر كوشباسشىلارى سەزى حاتشىلىعىنىڭ باسشىسى ق.توقاەۆ پ.سييارتونى 2015 جىلعى 10-11 ماۋسىمدا وتەتىن بەسىنشى سەزگە ازىرلىك تۋرالى حاباردار ەتتى. «سەزد بەيبىتشىلىك پەن دامۋ جولىندا ءدىني كوشباسشىلار مەن ساياسي قايراتكەرلەردىڭ ۇنقاتىسۋىنا ارنالادى», – دەدى سەنات توراعاسى. پ.سييارتو قازىرگى الەمدەگى تۇراقسىزدىق جاعدايىندا اسا ماڭىزدى بولىپ وتىرعان ۇلتارالىق جانە كونفەسسياارالىق بەيبىتشىلىك پەن كەلىسىمنىڭ قازاقستاندىق ۇلگىسىن جوعارى باعالادى.