ارشالى اۋدانى اكىمدىگىنىڭ مالىمەتىنشە, جەكە تۇرعىن ۇيدە قوسىمشا ورناتىلعان كوتەلنايا بولمەسىندە شامامەن 10 شارشى مەتر اۋماقتا جىلۋ قازاندىعى جارىلعان. ءورت شىقپاعانىمەن, قابىرعانىڭ ءبىر بولىگى ءىشىنارا قۇلاعان.
«وقيعا سالدارىنان 1974 جىلى تۋعان ازامات زارداپ شەكتى. ول استاناداعى №1 كوپسالالى وبلىستىق اۋرۋحاناعا جەتكىزىلدى. ناۋقاسقا مەديتسينالىق كومەك كورسەتىلىپ, جابىق باس-مي جاراقاتى دياگنوزى قويىلدى. تەكسەرۋدەن كەيىن ناۋقاس امبۋلاتوريالىق ەمدەلۋگە جىبەرىلدى. سونىمەن قاتار جيبەك جولى اۋىلىندا «قازارت» جشس-دە دە جىلۋ قازاندىعى جارىلدى. بۇل وقيعادا ەشكىم زارداپ شەككەن جوق. وقيعا ورنىنا ارشالى اۋدانى توتەنشە جاعدايلار ءبولىمى مەن جيبەك جولى اۋىلىنىڭ اۆاريالىق بريگاداسى دەرەۋ شىقتى», دەپ حابارلادى اكىمدىكتىڭ ءباسپاسوز قىزمەتى.
قازىرگى ۋاقىتتا وقيعانىڭ سەبەبىن انىقتاۋ ءۇشىن تەرگەۋ جانە وپەراتسيالىق ءىس-شارالار جۇرگىزىلىپ جاتىر. وقيعا ورنىندا تج ءبولىمىنىڭ قىزمەتكەرلەرى مەن پوليتسيا جۇمىس ىستەپ جاتىر.
جاعداي اتقارۋشى ورگانداردىڭ باقىلاۋىندا.
