اسىلجان شىمكەنت قالاسىنىڭ تۋماسى. قازىر اقش-تا وقيدى. اعىلشىن ءتىلىن جاس كەزىنەن ۇيرەنە باستاعان. 12 جىل ەرەجە جاتتاپ, سوزدىك اقتارعان ول ستەنفورد ۋنيۆەرسيتەتىندە سايراي جونەلەمىن دەپ ويلاعان. الايدا جاعداي ستۋدەنتتىڭ جوسپارىنداي بولماي شىقتى.
«سول ساتتە ءبىر وي ساناما سارت ەتە قالدى. بۇعان دەيىنگى ارەكەتىم ءبىلىم الۋ ەمەس, ءبىلىم الۋدىڭ يشاراسى عانا ەكەن. ادام ءتىلدى ۇيرەنبەيدى, يگەرەدى ەكەن. سوندىقتان مەن ءتىل ۇيرەتەتىن ارناۋلى پلاتفورما جاساۋ كەرەكتىگىن ۇقتىم», دەيدى اسىلجان التاي.
ازىرگە قولدانبا تەك iOS-تا قولجەتىمدى, اندرويد ءۇشىن ەندى بەيىمدەلىپ جاتىر. جۇمىس جۇيەسى جاساندى ينتەلەكتىگە نەگىزدەلگەن. چات-بوت ارقىلى ءتىل ۇيرەنۋشى ساۋال جولداپ, قوسىمشانىڭ وزىنەن تاپسىرما الىپ تۇرادى. فەلەش-كارتالار دا جوق ەمەس. كۇنىنە 40 مينۋت ساباق وقيدى. ساباق ويىن فورماتىندا وتەتىندىكتەن, ەش جالىقتىرمايدى. ءار ساباق كەلەسى ويىن كەزەڭى سەكىلدى وتىلەدى. قوسىمشا ءتىل ۇيرەنۋشىنىڭ ءار ىلگىرلەۋىن باقىلاپ وتىرادى.
ء«بىز بۇل جوبانى ەشقانداي ينۆەستيتسياسىز جاساپ شىقتىق. مىڭداعان ساعاتىمىزدى سارپ ەتتىك. ەڭبەگىمىز اقتالىپ 15 ملرد دوللار تۇراتىن Duolingo قوسىمشاسىن جۇكتەلىم جاعىنان ارتتا قالدىردىق. بۇل تۇرعىدا تۇركى مەملەكەتتەرىندە قولدانىس كوپ. قازىر قوسىمشامىز كورشى قىرعىز, وزبەك, تاجىك ەلدەرىندە, سونىمەن قاتار رەسەي, ۋكراينا, بەلورۋس ەلدەرىندە كەڭ كولەمدە قولدانىلىپ جاتىر», دەيدى جوبا اۆتورلارى.
جاريالانعان العاشقى تاۋلىكتە-اق Aleem-ءدى 40 000-نان استام ادام جۇكتەپ العان, ال ءبىر كۇننەن كەيىن اۋديتوريا 50 000-عا جەتكەن. قوسىمشا مۇنداي جۇكتەمەنى كوتەرە الماي, جوباگەرلەر سەرۆەردى جەدەل تۇردە كۇشەيتۋگە ءماجبۇر بولعان.
ء«بىز مۇنداي ىقىلاستى كۇتپەگەن ەدىك. بۇل تەك App Store رەيتينگىندەگى كورسەتكىش ەمەس. بۇل ەلىمىزدىڭ الەمدىك دەڭگەيدەگى ونىمدەر جاساي الاتىن الەۋەتىنىڭ دالەلى», دەيدى ازىرلەۋشىلەر.
