وزەكتى ماسەلەلەر قوزعالعان كەزدەسۋ

قازاقستان پارلامەنتى ءماجىلىسى توراعاسىنىڭ ورىنباسارى داريعا نازارباەۆا ماجارستان سىرتقى ەكونوميكالىق بايلانىستار جانە سىرتقى ىستەر ءمينيسترى پەتەر سييارتونى قابىلدادى, دەپ حابارلادى ءماجىلىستىڭ ءباسپاسوز قىزمەتى. كەزدەسۋ بارىسىندا ەكىجاقتى جانە حالىقارالىق دەڭگەيدەگى وزەكتى ماسەلەلەر تالقىلاندى. ءماجىلىس توراعاسىنىڭ ورىنباسارى قازاقستان-ۆەنگريا ىنتىماقتاستىعىنىڭ جوعارى دەڭگەيدە دامىپ كەلە جاتقانىن تىلگە تيەك ەتە كەلىپ, ودان ءارى نىعايتۋدىڭ ماڭىزدىلىعىنا توقتالدى. سونداي-اق, ءماجىلىستىڭ زاڭ شىعار­ماشىلىق جۇمىستارى جايىندا حاباردار ەتىپ, اسىرەسە, تۋريستىك كلاستەردى دامىتۋ, قازاقستان ەكونوميكاسىن ءارتاراپتاندىرۋ, قولايلى ينۆەستيتسيالىق كليمات ورناتۋ جولىندا اتقارىلىپ جاتقان زاڭنامالىق جۇمىستار جايىندا باياندادى. ءوز كەزەگىندە پ.سييارتو قازاقستان باسشىسى تاراپىنان جۇرگىزىلىپ وتىرعان ساياساتقا جوعارى باعا بەرىپ, ۆەنگرلىك كاسىپكەرلەردىڭ قازاقستاندىق ارىپتەستەرىمەن ىنتىماقتاستىقتى نىعايتۋعا ىنتالى ەكەندىكتەرىن جەتكىزدى. كەزدەسۋ بارىسىندا پارلامەنتارالىق بايلانىستار جايىنا دا نازار اۋدارىلدى. تاراپتار قازاقستان مەن ۆەنگريا اراسىنداعى ءوزارا ءىس-قيمىلدى دامىتۋدا پارلامەنتتىك ساپارلار الماسا وتىرىپ, پارلامەنتتىك ديپلوماتيا ءرولىن نىعايتۋدىڭ قاجەتتىلىگىنە توقتالدى. كەزدەسۋگە, سونداي-اق, ءماجىلىس دەپۋتاتى ۆ.روگالەۆ پەن ماجارستانداعى قازاقستاننىڭ توتەنشە جانە وكىلەتتى ەلشىسى ن.رۇستەموۆ قاتىستى.