ء«بىزدىڭ ماقساتىمىز – سپورتتى تەك رەكوردتاردى باعىندىرۋدىڭ جولى عانا ەمەس, ءومىردىڭ ءبىر بولىگى ەتۋ. ەرەكشە قاجەتتىلىكتەرى بار ادام دا, اۋىل بالاسى دا, زەينەتكەر دە ءوزىن ۇلكەن قوزعالىستىڭ ءبىر بولىگى ەكەنىن سەزىنسىن», – دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى ارداق تولەندين.
بۇگىندە ءوڭىردىڭ 329 مىڭنان استام تۇرعىنى, ياعني حالىقتىڭ 41,8%-ى جۇيەلى تۇردە سپورتپەن اينالىسادى. ولاردىڭ جارتىسىنا جۋىعى – اۋىل تۇرعىندارى. بۇل – بۇقارالىق سپورتتى جانە قولجەتىمدى ينفراقۇرىلىمدى دامىتۋ بويىنشا جۇيەلى جۇمىستىڭ ناتيجەسى.
اقمولا وبلىسى damubala.kz پلاتفورماسى ارقىلى مەملەكەتتىك سپورتتىق تاپسىرىستى بەلسەندى تۇردە جۇزەگە اسىرىپ كەلەدى. بۇل قۇرال بالالار سپورتىن, ينكليۋزيۆتى جانە بۇقارالىق سپورتتى دامىتۋعا باعىتتالعان جانە ۇكىمەتتىك ەمەس ۇيىمدارمەن, سپورت كلۋبتارىمەن, جەكە جاتتىقتىرۋشىلارمەن سەرىكتەستىك فورماتىندا ىسكە اسىرىلادى. ياعني ءار تۇرعىن ءوز ءۇيىنىڭ ماڭىنان سەكتسيا تاۋىپ, تەگىن نەمەسە وتە تومەن باعامەن سپورتپەن شۇعىلدانا الادى.
«مەملەكەتتىك سپورتتىق تاپسىرىس جۇيەسى شاعىن زالدار مەن كلۋبتارعا جاڭا تىنىس بەردى. ەندى اۋىل جاتتىقتىرۋشىلارى اۋىلدان كەتپەي, كەرىسىنشە توپتار جيناپ جاتىر. بۇل – ناقتى جۇمىس ورىندارى مەن سپورتتى الەۋمەتتىك ليفتكە اينالدىراتىن ورتا», – دەيدى ارداق تولەندين.
ەرەكشە قاجەتتىلىكتەرى بار ادامدارعا دا زور كوڭىل بولىنۋدە. وڭىردە ءۇشىنشى جىل قاتارىنان از قوزعالاتىن ازاماتتار ءۇشىن سپورت زالدارىنا تەگىن بارۋدى قامتاماسىز ەتەتىن الەۋمەتتىك جوبا جۇزەگە اسىرىلۋدا.
«بۇگىنگى تاڭدا باعدارلاماعا 347 ادام, ونىڭ ىشىندە 113 بالا قاتىسۋدا. بۇل جاي عانا جاتتىعۋ ەمەس, قوعامعا بەيىمدەلۋ, ءوز كۇشىنە سەنۋ جانە ومىرگە بەلسەندى ارالاسۋ مۇمكىندىگى», – دەپ اتاپ ءوتتى ارداق تولەندين.
ينفراقۇرىلىمنىڭ دا ماڭىزى زور. وبلىستا 1124 سپورت نىسانى بار, سپورت سارايلارى مەن باسسەيندەردەن باستاپ حوككەي كورتتارى مەن اشىق الاڭدارعا دەيىن جۇمىس ىستەپ تۇر. تەك سوڭعى جىلدىڭ وزىندە ولاردىڭ سانى 17-گە ارتقان. سپورتتىق نىساندارمەن قامتاماسىز ەتىلۋ دەڭگەيى شامامەن 65%-دى قۇرايدى جانە بۇل كورسەتكىش ءوسىپ كەلەدى. اۋدانداردا جاڭا تەننيس كورتتارى, جەكپە-جەك زالدارى مەن شاڭعى بازالارى اشىلۋدا.
قارتتار اراسىندا دا سپورت بەلسەندى تۇردە دامىپ كەلەدى. اۋدان ورتالىقتارىندا ولار ءۇشىن جاتتىقتىرۋشىلار جانە دارىگەرلەردىڭ باقىلاۋىمەن تەگىن دەنساۋلىق توپتارى جۇمىس ىستەيدى.
سونىمەن قاتار, ءوڭىر سپورتتىق رەزەرۆ تاربيەلەۋدى دە قولعا العان. وليمپيادالىق ەمەس جانە ۇلتتىق سپورت تۇرلەرى بويىنشا جوعارى سپورت شەبەرلىگى مەكتەبىندە 400-دەن استام سپورتشى دايىندالادى. بۇل باعىت ءداستۇر مەن زاماناۋيلىقتى ۇشتاستىرىپ, اۋىلداعى تالانتتى جاستارعا كاسىبي تۇرعىدان وسۋگە مۇمكىندىك بەرەدى.
اقمولا وبلىسى سپورتتىڭ تەك رەكوردتار ءىسى ەمەس, تەڭ مۇمكىندىكتەر قۇرالى بولا الاتىنىن دالەلدەپ وتىر.
