ماۋلەن اشىمباەۆ قاتىسۋشىلارعا ءىلتيپات ءبىلدىرىپ, جاھاندىق تسيفرلاندىرۋ مەن جاساندى ينتەللەكتىنى ەنگىزۋدىڭ قوعام ومىرىنە جانە بارلىق سالاعا ىقپالى زور ەكەنىن ايتتى. بۇل ۇدەرىس الەمنىڭ بەت-بەينەسىن, ادامداردىڭ ويلاۋ جۇيەسىن, مىنەز-قۇلقىن جانە قۇندىلىقتارىن دا وزگەرتەتىنى انىق. سەنات توراعاسى مۇنداي تاريحي كەزەڭدە تابان تىرەيتىن قۇندىلىقتاردى ايقىنداپ, ولاردى جاڭا زامانعا بەيىمدەۋ جانە تىڭ تەتىكتەر ارقىلى ۋاقىت تالاپتارىمەن ۇندەستىرۋ جولدارىن انىقتاۋ ماڭىزدى مىندەت ەكەنىنە نازار اۋداردى. سونداي-اق ول مەملەكەت باسشىسى ۇنەمى وسى باعىتتاعى يدەولوگيالىق جۇمىسقا باسا ءمان بەرىپ كەلە جاتقانىن اتاپ ءوتتى.
«پرەزيدەنت قاسىم-جومارت توقاەۆ جولداۋدا قازاقستاندى ءۇش جىل ىشىندە جاپپاي تسيفرلىق ەلگە اينالدىرۋ جونىندە ناقتى مىندەت جۇكتەدى. مۇنداي قادام ۇلتتىق بىرەگەيلىگىمىزدى ودان ءارى نىعايتۋعا تىڭ سەرپىن بەرەدى. كەزدەسۋ بارىسىندا اتالعان باعىتتار مەن ۇلتتىق قۇندىلىقتاردى دارىپتەۋدە تسيفرلىق تەحنولوگيالاردى قولدانۋ ماسەلەلەرى جان-جاقتى تالقىلانىپ, تىڭ ۇسىنىستار ايتىلارىنا دەپ سەنەمىز», دەدى م.اشىمباەۆ.
پالاتا سپيكەرى اتاپ وتكەندەي, بۇگىندە ادامزات جاڭا تەحنولوگيالىق داۋىرگە قادام باستى. بىلتىر بيزنەس جاساندى ينتەللەكت سالاسىنا 250 ملرد دوللاردان اسا ينۆەستيتسيا قۇيسا, بيىلعى كورسەتكىش ودان بىرنەشە ەسە جوعارى. سونىمەن قاتار بىلتىر الەمدىك كومپانيالاردىڭ 78 پايىزى جاساندى ينتەللەكتىنى قولداناتىنىن راستاعان. بۇل اتالعان باعىتتىڭ اسا جوعارى قارقىنمەن دامىپ, قوعام ومىرىنە جاپپاي ەنىپ جاتقانىن كورسەتەدى. وسىعان بايلانىستى م.اشىمباەۆ تسيفرلىق ءداۋىردى قاۋىپ ەمەس, مۇمكىندىك رەتىندە قاراستىرىپ, ۇلتتىق جانە تسيفرلىق يممۋنيتەتتى ودان ءارى نىعايتۋ ماڭىزدى ەكەنىن تىلگە تيەك ەتتى.
«ۇلتتىق قۇندىلىقتار زامان كوشىپ, داۋىرلەر الماسسا دا, شايقالمايتىن نەگىز, قۇبىلمايتىن باعدار بولىپ قالۋى كەرەك. سونىمەن قاتار ادالدىق, ەڭبەكقورلىق جانە ورتاق جاۋاپكەرشىلىك سەكىلدى جالپى ادامزاتتىق ۇعىمدار دا ايرىقشا مانگە يە. وسى ورايدا ۇلتتىق قۇندىلىقتارىمىزدى تسيفرلىق كەڭىستىككە الىپ شىعىپ, زاماناۋي تاسىلدەرمەن دارىپتەگەن ابزال. ياعني تسيفرلاندىرۋ – قازىردە ۇلتتىق قۇندىلىقتاردى ناسيحاتتاۋدىڭ ءتيىمدى تەتىگى. سوندىقتان تسيفرلىق ءداۋىردى قاۋىپ ەمەس, مۇمكىندىك رەتىندە قاراستىرعان ءجون», دەدى م.اشىمباەۆ.
«ۇلتتىق مۇددە» ديالوگ الاڭىندا سەناتورلارمەن قاتار ۇلتتىق مۋزەي ديرەكتورى بەرىك ابدىعالي ۇلى, قازاقستان جازۋشىلار وداعىنىڭ باسقارما توراعاسى مەرەكە قۇلكەنوۆ, قازاقستاننىڭ ەڭبەك سىڭىرگەن قايراتكەرى بايانعالي ءالىمجانوۆ, تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ رەكتورى ارمان جۇدەباەۆ, جاستار تەاترىنىڭ كوركەمدىك جەتەكشىسى نۇرقانات جاقىپباي, IT-ۆيزيونەر, CEO CodiPlay دانابەك قالياجداروۆ, پرەزيدەنت جانىنداعى قسزي ءبولىم مەڭگەرۋشىسى سالتانات ەرماحانوۆا, سۋرەتشى سىرلىبەك بەكبوتاەۆ, Astana IT University «جاساندى ينتەللەكت» عىلىمي-يننوۆاتسيالىق ورتالىعىنىڭ ديرەكتورى بەيبىت ابدىكەنوۆ, سەنات جانىنداعى ساراپشىلار كلۋبىنىڭ مۇشەسى جانەركە كوچيگيت جانە تاعى باسقا قاتىسۋشىلار ءسوز سويلەدى.
سونىمەن قاتار «ۇلتتىق مۇددە» ديالوگ الاڭىنىڭ وتىرىسى اياسىندا شىعارماشىلىق يندۋستريا وكىلدەرى, ونىڭ ىشىندە ÓzgeEpic, لينگۆيستەر, ستۋدەنتتەر, ونەرتانۋشىلار, سۋرەتشىلەر جانە باسقا دا ءتۇرلى سالا ماماندارى جاڭا تەحنولوگيالاردىڭ كومەگىمەن ازىرلەگەن جوبالار كوپشىلىككە تانىستىرىلدى. ولاردىڭ قاتارىندا ۆيزۋالدى جانە ينتەراكتيۆتى تەحنولوگيامەن جابدىقتالعان E-museum ۆەب-پورتالى بار. اتالعان جوبا الەمنىڭ كەز كەلگەن بۇرىشىنداعى ازاماتتارعا 3D ۇلگى ارقىلى ۇلتتىق مادەني مۇرامىزدى تاماشالاۋعا مۇمكىندىك بەرەدى. سونداي-اق وتىرىسقا قاتىسۋشىلار رۋنا جازۋىن وپتيكالىق جانە ينتەللەكتۋالدىق تانۋ ارقىلى وقىپ, تالداۋعا, «Steppe Games» ءموبيلدى ويىنى ارقىلى قازاق ءتىلىن وقىتۋعا, «قازاق ادەبيەتىنىڭ اۋديوقورى», قورقىت, Oyu Resonance باستامالارى ارقىلى ۇلتتىق ادەبيەت, تاريح جانە ونەردى تانۋعا ارنالعان جاڭا جوبالارمەن تانىستى.
