قولونەردى سەرىك ەتكەن اياجان كىشكەنتايىنان سۋرەت ونەرىنە جاقىن بولعان. ديزاينەر بولامىن دەگەن بالا ارمانى اداستىرماعان ەكەن. اۋەلدە قولى قالت ەتسە, مۇعالىمدەر ءۇشىن كورنەكى اقپارات قۇرالدارىن جاسايتىن. كەيىن سىيلىقتىڭ قوراپتارىنا كوشتى. ءتۇرلى ورنەكتەگى قوراپتارعا دەگەن تاپسىرىس ءۇستى-ۇستىنە تۇسكەن. يدەيانى كوبىنەسە الەۋمەتتىك جەلىدەن ىزدەدى. حالىققا نە كەرەگىن زەرتتەدى. زەرتتەي ءجۇرىپ ونەرىن ۇشتادى. زاماننىڭ تالابىنا قاراي تەحنيكا قولدانا باستادى.
– ەڭ الدىمەن, وزىمە قىزىقتى, جانىما جاقىن ىسپەن اينالىسقىم كەلدى. ءبىر كۇنى كىشكەنتاي ءسىڭلىمدى ويناتىپ وتىرىپ, بالانىڭ ساناسىن دامىتاتىن ويىنشىقتاردى نەگە ءوزىمىز جاسامايمىز دەگەن وي كەلدى. ءسويتىپ, ءۇي جاعدايىندا لوگيكالىق سۇراقتارعا تولى ويىنشىقتار جاساي باستادىم. بۇعان اتا-انالار عانا ەمەس, بالاباقشا تاربيەشىلەرى دە قىزىقتى, – دەيدى جاس كاسىپكەر اياجان قۋاتبەكقىزى.
ءسويتىپ, كومپيۋتەرلى گرافيكا ارقىلى سىزباسىن سىزىپ, ءتۇرلى-ءتۇرلى ويىنشىقتار جاساپ ساتا باستاعان. ءوزىنىڭ ۇلى تاربيەلەنىپ جاتقان بالاباقشا تاربيەشىلەرىمەن بىرگە بالدىرعان قىزىعاتىن ويىنشىقتاردى زەرتتەي تۇسكەن.
– نە ىستەسەك تە ۇلتقا تامشىداي بولسىن پايدامىز تيسە دەيمىن. سول ۇستانىممەن قازاقي ناقىشتا قايتالانبايتىن ويىندار جاساي باستادىم. ونى الەۋمەتتىك جەلى ارقىلى جارنامالادىم. ءوزىمىزدىڭ ءوڭىردى قويىپ, اتىراۋ, اقتاۋدان تاپسىرىس ءتۇستى, – دەيدى جاس كاسىپكەر تسەحتاعى تاڭعى جۇمىسىنا كىرىسىپ جاتىپ.
قاراپ وتىرمىز, ءاپ-ساتتە ارنايى ماتەريالدان اسىق ويىپ شىعارا قويدى. كادىمگى قويدىڭ اسىعىنان اۋمايدى. تاپسىرىسپەن العىزاتىن شيكىزاتى سەرتيفيكاتتالعان, بالاعا ەش زيانى جوق. شاعىن تسەحىندا قازىرگى شارۋاعا قاجەتتى پرينتەردىڭ ءتۇر-ءتۇرى بار. ءبىرى بىلعارىعا ويۋ باسسا, ەندى ءبىرى ءتۇرلى ويىنشىق ويادى. ءبارى اۆتوماتتاندىرىلعان. كومپيۋتەردەگى سىزبا بويىنشا بۇيرىقتى ورىنداي بەرەدى. IT سالاسىنا جانى جاقىن اياجان قۋاتبەكقىزى بۇل باعىتتا جاساندى ينتەللەكت ارقىلى دا جوبالار جاساۋدى ويلاپ وتىر. ءيا, جوسپار كوپ. تەك قارجىنىڭ جەتىسپەۋشىگى – قولبايلاۋ. سونىڭ وزىندە ءۇش ادامدى جۇمىسپەن قامتىپ وتىر.
– ءبىز تەحنيكا ءتىلىن دە مەڭگەرىپ الدىق. شىعارماشىلىق جۇمىس بولعاندىقتان, اسقان قىزىعۋشىلىقپەن ىستەيمىز. الدا قازاقستاندىق برەند ويىنشىقتار شىعارىپ جاتساق, ول ءبىزدىڭ ۇلكەن جەتىستىگىمىز بولار ەدى, – دەيدى تسەح قىزمەتكەرى جاننا قاشقىنباەۆا.
شاعىن ۇجىم ويىنشىقتاردان بولەك بالاباقشا, مەكتەپتەردە بەزەندىرۋ جۇمىستارىمەن دە اينالىسادى. ەگەر مەملەكەت تاراپىنان قانداي دا كومەك بولسا, كاسىپ كەڭەيىپ, ءناسىپتىڭ دە ارتارى انىق. اياجان قۋاتبەكقىزى جۋىقتا «تاۋەلسىز ۇرپاقتارى» گرانتىنا ءوتىنىم بەرگەن. ەگەر كاسىبى تالاپتارعا ساي كەلىپ, ماقۇلدانسا, 3 ملن تەڭگەگە يە بولادى. ول قارجىنى قازاق ەرتەگىلەرىن دارىپتەيتىن ويىندار جاساۋعا جۇمسايتىنىن ايتادى.
راس, ۇلتتىق ءداستۇرىمىزدىڭ جاڭعىرۋىنا, جاندانۋىنا ءبىر كىسىدەي اتسالىسساق, كۇنى ەرتەڭ-اق الا-شۇبار تىلدەن قۇتىلىپ, ءتاي-ءتاي باسقان بالدىرعانداردىڭ ءتىلى تەك انا تىلىندە شىعادى. ايتپەگەندە, تەلەفونعا تەلمىرگەن بالا وزگەنىڭ تىلىندە سويلەپ, وزگەنىڭ ءتالىمىن ءسىڭىرىپ جاتقان جوق پا؟ ول ءۇشىن اياجاننىڭ اسىعى الشىسىنان ءتۇسۋى كەرەك.
شىعىس قازاقستان وبلىسى,
گلۋبوكوە اۋدانى
