ەلگە سەنىمى جوعارى

ساۋالناما 11 شىلدە مەن 12 تامىز ارالىعىندا ۇيىم­داس­­تى­رىلعان. وعان ەلىمىزدىڭ 17 وبلىسىنان جانە رەسپۋبليكالىق ماڭىزى بار – استانا, الماتى, شىمكەنت قالاسىنان 18 جاستان اسقان 8 مىڭ ازامات قاتىسقان.

الەۋمەتتىك زەرتتەۋدە رەسپون­دەنتتەردىڭ 75,9%-ى ەلىمىز قازىرگى ۋاقىت­تا دۇرىس باعىتتا دامىپ كەلەدى دەپ ەسەپ­­تەيتىنىن اتاپ وتكەن. ساۋالنامادا قوعامداعى ءوپتيميزمنىڭ دەڭگەيىن دە انىقتادى. ەڭ جوعارى سەنىم كورسەتكىشى 18 بەن 29 جاس ارالىعىنداعى ازاماتتار اراسىندا تىركەلگەن. ال جاس ۇلعايعان سايىن بولاشاققا دەگەن سەنىم ءبىرشاما تومەندەي تۇسەتىنى بايقالعان. ماسەلەن, 61 جاستان اسقان رەسپوندەنتتەردىڭ تەك 70,6%-ى ەلدىڭ بولاشاعىنا سەنىم بىل­­دىر­گەن.

ءبىر قىزىعى, مەملەكەتتىڭ دامۋ باعى­تىن وڭ باعالاۋدا اۋىل تۇرعىندارى­نىڭ كورسەتكىشى قالا تۇرعىندارىنان جوعارى بولىپ وتىر. بۇل اۋىلدىق جەر­لەر­دە جۇرگىزىلىپ جاتقان الەۋمەتتىك رەفور­ما­لاردىڭ ناقتى اسەرىن اڭعارتسا كەرەك.

ەلدىڭ دۇرىس باعىتتا دامىپ كەلە جاتقانىن قولداعان رەسپوندەنتتەردىڭ باسىم بولىگى قازىردىڭ وزىندە ناقتى جۇزەگە اسىرىلىپ جاتقان بىرقاتار ماڭىزدى رەفورمانى اتاپ ءوتتى. بۇل رەتتە اۋىلدىق جانە قالا مەكتەپتەرىنىڭ سالىنۋ مەن جاڭارتىلۋى, «ۇلتتىق قور – بالالارعا» باعدارلاماسىنىڭ ىسكە اسۋى, بجزق-دان
قاراجاتتىڭ ءبىر بولىگىن شەشىپ الۋ مۇمكىندىگى اتالدى. ودان بولەك كوپشىلىگى مەملەكەتتىك قىزمەتتەردىڭ تسيفرلىق فورماتقا كوشۋىن, وتباسىنىڭ تسيفرلىق كارتاسىن, الەۋمەتتىك ءامياننىڭ بار ەكەنىن بىلەتىنىن جەتكىزگەن. «زاڭ جانە ءتارتىپ» قاعيداتى مەن «تازا قازاقستان» جالپىۇلتتىق اكتسيالارىن دا ەرەكشەلەپ ايتقان.

بۇل كورسەتكىشتەر ازاماتتاردىڭ ءوز ومىرىندە ناقتى وزگەرىستەردى بايقاپ وتىرعانىن دالەلدەيدى. ياعني جۇرگىزىلىپ جاتقان رەفورمالار حالىقتىڭ كۇندە­لىكتى تۇرمىسىنا تىكەلەي اسەر ەتىپ, مەم­لەكەت­تىك ساياساتقا دەگەن سەنىمدى كۇشەي­تىپ, بولاشاققا دەگەن ءوپتيميزمدى ارتتىرىپ وتىر.

ەكونوميكالىق رەفورمالار مەن الەۋ­مەتتىك باستامالاردىڭ ءتيىمدى ىسكە اسۋى ەل باسشىلىعىنا دەگەن قوعامدىق سەنىم­نىڭ ارتۋىنان كورىنىس تابۋدا. ساۋالناما ناتيجەلەرى بويىنشا رەسپون­دەنتتەردىڭ 82,4%-ى پرەزيدەنتكە سەنىم بىلدىرگەن.

سونىمەن قاتار قوعامدا پاتريوتتىق كوڭىل كۇيدىڭ دە ايتارلىقتاي وسكەنى بايقالادى. زەرتتەۋگە قاتىسقان ازامات­تاردىڭ 89,9%-ى قازاقستانمەن جانە وسى ەلدىڭ ازاماتى بولعانى ءۇشىن ماقتا­ناتىنىن ايتقان. ونىڭ ىشىندە 49,1%-ى «وتە ماقتانامىن» دەسە, 40,8%-ى «ماقتا­نا­مىن» دەپ جاۋاپ بەرگەن.

ەل بولاشاعىنا قاتىستى رەسپون­دەنتتەردىڭ كوپشىلىگى ەلىمىزدىڭ وڭىرلىك قانا ەمەس, جاھاندىق دەڭگەيدە دە كوش­باسشى بولا الاتىن سالالارىن اتاپ وتكەن. ماسەلەن, اگروونەركاسىپتىك سەكتور, تسيفر­لاندىرۋ جانە جاساندى ينتەللەكت, ەنەرگەتيكا, كولىك جانە ترانزيت, ادام كاپيتالدى دامىتۋ – ەڭ پەرسپەكتيۆالى باعىت.

زەرتتەۋ بارىسىندا قوعامداعى قۇن­دىلىق ۇستانىمدارعا دا تالداۋ جاسال­عان. ماسەلەن, ساۋالناماعا قاتىسقان ازامات­تاردىڭ 80%-ى ەلىمىزدە لگبت ناسيحا­تىنا زاڭ جۇزىندە شەكتەۋ قويۋدى قول­دايتىنىن بىلدىرگەن. بۇل قوعامنىڭ ۇلت­تىق قۇندىلىقتار مەن داستۇرگە بەيىم­دىلىگىن كورسەتەدى.