بىزدە ايەلدەردى كەمسىتۋشىلىك بولمايدى

كەشە استانانىڭ «بەيجىڭ سارايى» قوناق ۇيىندە پرەزيدەنتتىڭ جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمىنىڭ ورىنباسارى, ءماجىلىس دەپۋتاتى ەلەنا تاراسەنكونىڭ تورايىمدىعىمەن بۇۇ ايەلدەرگە قاتىستى كەمسىتۋلەردى جويۋ جونىندەگى كوميتەتىنىڭ قورىتىندى ۇسىنىستارىن جۇزەگە اسىرۋ ءۇشىن مەملەكەتتىك ورگاندار مەن ۇەۇ ارا­سىن­داعى ءوزارا ءىس-قيمىلدىڭ تيىمدىلىگىن ارتتىرۋ ماسەلەلەرىن تالقىلاعان دوڭگەلەك ۇستەل وتكىزىلدى. ونى اشقان ەلەنا تاراسەنكو الدىمەن مەملەكەتتىك حاتشى, ۇلتتىق كوميسسيانىڭ ءتورايىمى گۇلشارا ابدىقالىقوۆانىڭ قۇتتىقتاۋىن وقىپ بەردى. وندا مەملەكەتتىك حاتشى دوڭگەلەك ۇستەلگە قاتىسۋشىلارعا ءتيىمدى جۇمىس ىستەۋدى تىلەگەن ەكەن. وسىدان ءارى مودەراتور دوڭگەلەك ۇستەلدىڭ ماقساتىنا كەڭىرەك توقتالىپ ءوتتى. ءبىز بۇگىن 2015 جىلدىڭ ناۋرىز ايىندا نيۋ-يورك قالاسىندا بولاتىن ايەلدەردىڭ مارتەبەسى جونىندەگى كوميسسيانىڭ 59-شى سەسسياسىنا ازىرلىك ماسەلەلەرىن تالقىلايمىز. سونداي-اق, بۇۇ-نىڭ ايەلدەرگە قاتىستى كەمسىتۋلەردى جويۋ جونىندەگى كوميتەتىنە ۇسىنۋ ءۇشىن قازاقستانداعى مەرزىمدى ەسەپتەردىڭ ناتيجەلەرى بويىنشا قورىتىندى ۇسىنىستاردى ورىنداۋ بويىنشا شارالار قولدانۋدىڭ ناتيجەلەرى تۋرالى ەلىمىزدىڭ بايانداماسىن ازىرلەيمىز, دەدى ە.تاراسەنكو. بۇگىنگى كۇنى قازاقستاندا جۇرگىزىلىپ وتىرعان وتباسىلىق دەموگرافيالىق ساياساتتىڭ انا بولۋعا ىنتالاندىرۋ, سەنىمدى الەۋمەتتىك كەپىلدىكتەر سياقتى نەگىزگى باعىتتارى ەلباسىنىڭ جىل سايىنعى جولداۋلارىندا كورىنىس تاۋىپ, ناتيجەسىندە ايەلدەردى, وتباسىلارىن, انا مەن بالانى مەملەكەتتىك قولداۋدىڭ تۇتاستاي جۇيەسى قۇرىلدى. قازىرگى زامانداعى جاھاندىق سىن-قاتەرلەردىڭ قاۋىپتى جاعدايىندا جاڭا ەكونوميكالىق ساياساتتى جۇزەگە اسىرۋعا ايەلدەردىڭ بەلسەندى تۇردە قاتىسۋ ماسەلەلەرى دە قىز-كەلىنشەكتەرگە قاتىستى كەمسىتۋشىلىكتەردى جويۋعا مۇمكىندىك بەرەتىن جانە قازاقستان قوعامىندا گەندەرلىك تەڭدىكتى قولدايتىن ساياسي تەتىكتەردىڭ ءبىرى بولىپ تابىلادى, دەدى ءوزىنىڭ سوزىندە مودەراتور. بۇدان بۇرىن, 2014 جىلعى اقپاندا جەنەۆادا بولعان ماجىلىستە قازاقستان بۇۇ-نىڭ ايەلدەردى كەمسىتۋگە قارسى كۇرەسى جونىندەگى كونۆەنتسياسى تالاپتارىن قالاي ورىنداپ جاتقانى جونىندە بايانداعان بولاتىن. وسى بايانداماعا حالىقارالىق ساراپشىلار قاناعاتتانعاندىق ءبىلدىرىپتى. ەندى كەزەكتى بايانداماعا دايىندىق جۇمىستارى جۇرگىزىلەتىن بولدى. ەلىمىزدىڭ كونستيتۋتسياسىنا سايكەس, كونۆەنتسيا حالىقارالىق قۇقىقتىق قۇجات بولعاندىقتان, ىشكى زاڭدارعا قاراعاندا ۇستەمدىككە يە. الايدا, وسى تاراپتا شەشىلۋگە ءتيىستى ءبىرشاما پروبلەمالار بارى ايتىلدى. ماسەلەن, مەملەكەتتىك ورگانداردىڭ, قالىڭ جۇرتشىلىقتىڭ كونۆەنتسيا تالاپتارى تۋرالى بىلىكتەرى از بولۋى سەبەپتى ءىشىنارا گەندەرلىك كەمسىتۋشىلىككە جول بەرىلەدى. دوڭگەلەك ۇستەل بارىسىندا وسى ماسەلەلەر باستى نازاردا بولىپ, جينالعاندار وعان قاتىستى وي-پىكىرلەرىن ورتاعا سالدى. اتالعان كونۆەنتسيا تالاپتارىن ورىنداۋ جونىندەگى ۇلتتىق ءىس-شارالار جوسپارىنا ايتىلعان ۇسىنىستاردىڭ ماڭىزدىلارى ەنگىزىلەتىن بولدى. جيىنعا پارلامەنت دەپۋتاتتارى, پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا مۇشەلەرى, ۇەۇ مەن باق وكىلدەرى قاتىستى. جاقسىباي سامرات, «ەگەمەن قازاقستان».