كەمەلەر ءۇشىن جاڭا كانال ىسكە قوسىلدى
ەگيپەت پرەزيدەنتى ابدەل فاتتاح اس-سيسي سۋەتس كانالىندا كەمەلەر ءۇشىن جاڭا كانال اشىلعاندىعى تۋرالى جارلىققا قول قويدى. بۇل جونىندە «رەيتەر» اگەنتتىگى حابارلادى.
كانال ارقىلى العاشقى كەمە ءجۇزىپ وتكەن. كانالدىڭ اشىلۋ سالتاناتىنا رەسەي پرەمەر-ءمينيسترى دميتري مەدۆەدەۆ, فرانتسيا پرەزيدەنتى فرانسۋا وللاند, يوردانيا كورولى ابداللا II, سونداي-اق, بىرقاتار ارابيالىق جانە افريكالىق مەملەكەتتەردىڭ وكىلدەرى قاتىسقان. وسى سالتاناتقا بايلانىستى ەگيپەتتە 6 تامىز دەمالىس كۇنى دەپ جاريالاندى. اتالعان قۇرىلىس جوباسىنا قاتىستى ەگيپەت ۇكىمەتى مەن حالىقارالىق كومپانيالار اراسىنداعى كەلىسىم وتكەن جىلدىڭ قازانىندا بەكىتىلگەن بولاتىن. جوبانىڭ جالپى قۇنى 8 ميلليارد دوللارعا باعالانىپ وتىر. جاڭا كانالدىڭ پايدالانۋعا بەرىلۋى ەل ەكونوميكاسىن قايتا قالپىنا كەلتىرۋگە ايتارلىقتاي دەمەۋ بولماق.
ارالعا اۆياتسيانى اتتاندىردى
فرانتسيا وتكەن جىلدىڭ 8 ناۋرىزىندا رادار ەكرانىنان عايىپ بولعان «بوينگ-777» جولاۋشىلار ۇشاعىنىڭ سىنىقتارىن ىزدەستىرۋ ءۇشىن رەيۋنون ارالىنا قاراي اۆياتسيا مەن كەمەلەردى اتتاندىردى.
بۇل تۋرالى فرانتسيانىڭ قورعانىس, كولىك جانە تەڭىز اۋماقتارى مينيسترلىكتەرى مالىمدەگەن. جوعالعان ۇشاقتى ىزدەستىرۋ جۇمىسى كەشە باستالدى. وپەراتسياعا تىكۇشاقتار, تەڭىز كەمەلەرى, سونداي-اق, جاياۋ پاترۋلدەر تارتىلعان. رەيۋنون ارالى فرانتسيانىڭ اۋماعىنا كىرەدى, ول ءۇندى مۇحيتىندا ورنالاسقان. 5 تامىزدا مالايزيا تاراپى وسى ارالدا جوعالعان لاينەردىڭ سىنىقتارى تابىلعانىن راستادى. كەيبىرەۋلەر ۇشاقتىڭ سىنىقتارى وسىدان ءۇش اي بۇرىن تابىلعانىن ايتادى.
جويقىن جارىلىستار تىيىلار ەمەس
اۋعانستان استاناسى – كابۋلدا اۆتوموبيلگە قويىلعان جارىلعىش زاتتىڭ ىسكە قوسىلۋىنان 8 ادام مەرت بولىپ, 200-گە جۋىق ادام جارالانعان.
كابۋل پوليتسياسىنىڭ باسشىسى ابدۋل راحمان ءراحيميدىڭ حاباردار ەتۋىنشە, قازا تاپقاندار قاتارى وسە ءتۇسۋى مۇمكىن. سەبەبى, جارىلىس سالدارىنان قيراعان عيماراتتىڭ ۇيىندىلەرىن ارشۋ جۇمىستارى ەندى قولعا الىنعان. جارىلىس كابۋل ورتالىعىنداعى تۇرعىندار قالىڭ قونىستانعان اۋداندا بولعان. بۇل ماڭايدا, سونداي-اق, اسكەري ءبولىم ورنالاسقان ەكەن. قازىرگى كەزدە تەررورلىق ارەكەت جاۋاپكەرشىلىگىن ەشقانداي ۇيىم مويىندارىنا الا قويعان جوق.
باتىستىڭ باسقىنشىلىعىنا قارسىلىق ءبىلدىردى
ءتۋنيستىڭ پرەمەر-ءمينيسترى حابيب ەسسيد باتىستىڭ ليۆياعا كەز كەلگەن باسقىنشىلىق ارەكەتتەرىنە قارسى ەكەنىن مالىمدەدى. «ءبىز ليۆياداعى قازىرگى قالىپتاسقان قيىن جاعدايدى 2011 جىلعى باسقىنشىلىقتىڭ سالدارى دەپ ەسەپتەيمىز», – دەپتى ول.
سونىمەن قاتار, پرەمەر-مينيستر بەرگەن سۇحباتىندا تەرروريزممەن كۇرەستە باتىس ەلدەرىنەن كومەك سۇراعان. «تەرروريزم – ۇلتتىق پروبلەما ەمەس, وندا شەكارا جوق. تەرروريزممەن كۇرەستە تۋنيسكە كورسەتىلگەن كومەك, ولاردىڭ وزدەرىن قورعاۋعا جاسالعان كومەك بولىپ تابىلادى», – دەپ تۇسىندىرگەن ول. پرەمەردىڭ سوزىنە قاراعاندا, ءتۋنيستىڭ كۋرورتتارىندا تەررورلىق ارەكەتتەر جاساۋى مۇمكىن دەگەن كۇدىكپەن 150 ادام تۇتقىندالعان. ولاردىڭ 15-ىنە تەرروريزمگە بايلانىستى ايىپ تاعىلىپتى.
سيريالىق ارنايى قىزمەت وكىلدەرى ماسكەۋگە كەلدى
«ينتەرفاكس» اقپارات اگەنتتىگىنىڭ حابارلاۋىنشا قۇرامىندا اسكەري جانە قاۋىپسىزدىك جونىندەگى سيريالىق ماماندار بار دەلەگاتسيا ماسكەۋگە كەلگەن.
سيريانىڭ رەسەي فەدەراتسياسىنداعى ەلشىلىگى وكىلىنىڭ ءمالىم ەتۋىنشە, التى ادامنان تۇراتىن سيريالىق دەلەگاتسيا ماسكەۋگە كەلدى. ولار رەسەيلىكتەرمەن تەرروريزمگە قارسى كۇرەسۋ ماسەلەلەرىن تالقىلايدى. سونداي-اق, ديپلومات ساپار اياسىنداعى كەزدەسۋدى كىمدەر جوسپارلاعانىن, ونىڭ ماقساتى قانداي ەكەنى تۋرالى اقپاراتتى جاريا ەتۋگە ءوزىنىڭ قۇقىعى جوق ەكەنىن اتاپ وتكەن. ال رەسەيلىك دەرەك كوزدەرى رەسەي مەن سيريا تەرروريزممەن كۇرەس ماسەلەلەرىندە تىعىز ىنتىماقتاستىقتا جۇمىس ىستەپ كەلە جاتقاندارىن كەلتىرەدى.
ەكسترەميزمدى ناسيحاتتاعان ماتەريالداردى اكەلگەنى ءۇشىن...
وزبەكستان سوتى نامانعان قالاسىنىڭ تۇرعىنىنا قاتىستى ۇكىم شىعاردى. ول كونتراباندالىق جولمەن رەسەيدەن ءدىني ەكسترەميزمدى ناسيحاتتايتىن ماتەريالداردى اكەلگەنى ءۇشىن تۇتقىندالعان.
اتى-ءجونى كورسەتىلمەگەن ول وسى قىلمىستىق ارەكەتى ءۇشىن 5,5 جىلعا باس بوستاندىعىنان ايىرىلدى. سانكت-پەتەربۋرگتەن ۇشىپ كەلگەن ول ءاندىجان قالاسىنىڭ اۋەجايىندا ۇستالىپتى.كەدەن قىزمەتكەرلەرى ونىڭ باگاجىنان ءدىني مازمۇنداعى ءبىر مىڭنان استام اۋديو جانە بەينەماتەريالداردى تاپقان. جۇرگىزىلگەن ساراپتاما «وزبەكستان يسلام قوزعالىسى» ەكسترەميستىك ۇيىمى دايىنداعان لەكتسيالار, سونداي-اق, «يسلام مەملەكەتىن» ماقتاعان اندەر ەكەندىگىن كورسەتكەن.
ينتەرنەت ماتەريالدارى نەگىزىندە ازىرلەندى.
