فوتو: اشىق دەرەككوز
قارجىلىق الاياقتىقتان قورعانۋ ءۇشىن ازاماتتار بانكتىك كرەديتتەر مەن ميكروكرەديتتەردى رەسىمدەۋدەن ەرىكتى تۇردە باس تارتۋ تۋرالى ءوتىنىش بەرە الادى. بۇل مۇمكىندىك باسقا تۇلعالاردىڭ اتىنا زاڭسىز نەسيە راسىمدەۋ جاعدايلارىنىڭ الدىن الۋعا باعىتتالعان.
قىزمەتتى كومپيۋتەر ارقىلى پايدالانۋ ءۇشىن egov.kz سايتىندا جەكە كابينەتكە كىرىپ, «سەرۆيستەر» بولىمىنەن «بانكتىك قارىزدار, ميكروكرەديتتەردى الۋدان ەرىكتى تۇردە باس تارتۋ» قىزمەتىن تاڭداۋ قاجەت. ودان كەيىن ەلەكتروندى نىساندى تولتىرىپ, وتىنىشكە ەتسق (ەلەكتروندىق تسيفرلىق قولتاڭبا) ارقىلى قول قويۋ كەرەك. ناتيجەنى «قىزمەتتەردى الۋ تاريحى» بولىمىنەن كورۋگە بولادى.
سونداي-اق بۇل قىزمەتتى Egov Mobile قوسىمشاسى ارقىلى دا ورىنداۋعا مۇمكىندىك بار. ول ءۇشىن «قىزمەتتەر» بولىمىندە «سالىقتار مەن قارجى» ساناتىن تاڭداپ, كەيىن «كرەديت الۋدان ەرىكتى تۇردە باس تارتۋ» قىزمەتىن تاڭداپ, قاجەتتى دەرەكتەردى ەنگىزىپ, سۇرانىستى ەلەكتروندى تۇردە راستاۋ قاجەت.
قىزمەتتى ىسكە قوسقاننان سوڭ, ازاماتتىڭ كرەديتتىك تاريحىندا قارىز الۋدان باس تارتقانى تۋرالى ارنايى بەلگى پايدا بولادى. بۇل اقپارات كرەديتتىك بيۋرولار ارقىلى بانكتەر مەن ميكروقارجى ۇيىمدارىنا قولجەتىمدى. ەگەر ازاماتتىڭ اتىنا نەسيە راسىمدەۋگە ءوتىنىم تۇسسە, قارجى ۇيىمدارى اۆتوماتتى تۇردە ونى بەرۋدەن باس تارتادى. ال بەلگى قويىلعان ازاماتتىڭ كەلىسىمىنسىز نەسيە رەسىمدەلسە, مۇنداي قارىز جارامسىز دەپ تانىلادى جانە ەسەپتەن شىعارىلادى.
قاجەت بولعان جاعدايدا بۇل تىيىمدى كەز كەلگەن ۋاقىتتا الىپ تاستاۋعا بولادى. دەگەنمەن, بۇل شەكتەۋ كرەديتتىك بيۋرولارمەن جۇمىس ىستەمەيتىن لومباردتار مەن وزگە دە ۇيىمدارعا قولدانىلمايدى.
