«بۇگىندە سپورت – ۇلت مادەنيەتى مەن دەنساۋلىعىنىڭ ءبىر بولىگى عانا ەمەس, سونىمەن قاتار ديپلوماتيانىڭ, بىرلىكتىڭ جانە تەحنولوگيالىق پروگرەستىڭ قۋاتتى قۇرالى. قازاقستان سپورت ينفراقۇرىلىمىن دامىتۋ, زاماناۋي نىساندار سالۋ جانە حالىقتىڭ سپورتقا قولجەتىمدىلىگىن ارتتىرۋ باعىتىندا جۇيەلى ساياسات جۇرگىزىپ كەلەدى. 2026 جىلى ەلىمىزدە فريستايل, ءجۇزۋ, ستەند اتۋ, جەڭىل اتلەتيكا, مانەرلەپ سىرعاناۋ جانە تاەكۆوندودان الەم كۋبوگى كەزەڭدەرى مەن گران-پري سىندى بىرقاتار ءىرى حالىقارالىق جارىس وتەدى. بۇل تۋرنيرلەر وليمپيادا ماۋسىمىمەن تۇسپا-تۇس كەلىپ, الەمنىڭ ۇزدىك سپورتشىلارى قازاقستاندا باس قوساتىن ماڭىزدى سپورتتىق وقيعا بولماق», دەدى ەربول مىرزابوسىنوۆ.
ءىس-شاراعا ازيا مەن تاياۋ شىعىس ەلدەرىنىڭ سپورت سالاسىنا جاۋاپتى ۆەدومستۆو باسشىلارى, حالىقارالىق ۇيىمدار مەن سپورت فەدەراتسيالارىنىڭ وكىلدەرى قاتىستى. جيىن «داستۇردەن جاڭاشىلدىققا: ازيا ىنتىماقتاستىق جونىندەگى ديالوگ ەلدەرىندەگى سپورتتىڭ بولاشاعى» تاقىرىبى اياسىندا ءوتتى.
ازياداعى ءوزارا ءىس-قيمىل جونىندەگى ديالوگ – ازيا مەن تاياۋ شىعىستىڭ 35 مەملەكەتىنىڭ وكىلدەرى قاتىساتىن مەملەكەتارالىق فورۋم. فورۋم 2002 جىلى ساياسي, ەكونوميكالىق جانە گۋمانيتارلىق ىنتىماقتاستىقتى دامىتۋ ماقساتىندا قۇرىلعان.
سونداي-اق ەربول مىرزابوسىنوۆ «رەسەي – سپورت دەرجاۆاسى» اتتى XIII حالىقارالىق سپورت فورۋمىنىڭ پلەنارلىق وتىرىسىندا دا ءسوز سويلەدى. مينيستر ەلىمىزدىڭ يۋنەسكو-نىڭ ماتەريالدىق ەمەس مادەني مۇرا تىزىمىنە ەنگىزىلگەن ۇلتتىق سپورت تۇرلەرىن, ونىڭ ىشىندە قازاق كۇرەسى, توعىزقۇمالاق, اسىق اتۋ جانە قۇسبەگىلىك تۇرلەرىن بەلسەندى تۇردە ناسيحاتتايتىنىن اتاپ ءوتتى.
ايتا كەتەيىك, ۇلتتىق سپورت تۇرلەرىنىڭ كەڭ كولەمدە ناسيحاتتالۋىنا 2024 جىلى استانادا وتكەن 5-ءشى دۇنيەجۇزىلىك كوشپەندىلەر ويىندارى زور سەپتىگىن تيگىزگەن.
