ءوندىرىس ورىندارىن ارالادى

ينۆەستيتسيالار جانە دا­مۋ ءمينيسترى اسەت يسەكەشەۆ قوس­تاناي وبلىسىندا بولىپ, كاسىپ­ورىنداردى ارالادى. ول الدىمەن وبلىس ورتالىعىنداعى  «ەۆراز­كاسپيانستال» جاۋاپكەرشىلىگى شەك­تەۋلى سەرىكتەستىگى مەن «بايان سۇلۋ» اكتسيونەرلىك قوعامىندا بولدى. بۇل كاسىپورىننىڭ العاشقىسى يندۋستريالاندىرۋ باعدارلاماسىنىڭ ءبىرىنشى بەسجىلدىعىنداعى  ءىرى ينۆەستيتسيالىق جوبا بولاتىن. ول  قۇرىلىسقا قاجەتتى بەلتەمىر شىعارادى, ونىڭ ءونىمى ەلىمىزدى تولىق قامتاماسىز ەتىپ, رەسەي, وزبەكستان, قىرعىزستان, تاجىكستان رەسپۋبليكالارىنا دا ارتىلادى. بيىل زاۋىت 365 مىڭ توننا بەلتەمىر شىعارۋدى جوسپارلاپ وتىر. ەڭ باستىسى, مۇندا 256 ادام جۇمىس ورنىن تاپتى. ال «بايان سۇلۋ» كونديتەر فابريكاسى وبلىستاعى ەكسپورتتاۋشى كاسىپورىنداردىڭ بەل ورتاسىنان ويىپ ورىن الادى. مينيستر ساپارىنىڭ ەكىنشى كۇنى رۋدنىي قالاسىندا بولىپ, «ليدەر-2010» ءسۇت زاۋىتىن جانە سوكولوۆ-سارىباي كەن ءوندىرۋ بىرلەستىگىنىڭ مەتالل يلەك  زاۋىتىن ارالادى. «ليدەر-2010» ءسۇت زاۋىتى بۇل كۇندە كاسىپورىننىڭ قۋاتىن ارتتىرۋ باعىتىنداعى جۇمىستار جۇرگىزىپ وتىر.  ونىڭ ونىمدەرى قازاقستاننىڭ بارلىق وڭىرىنە جەتكىزىلەدى, سونىمەن قاتار كورشى رەسەيدىڭ ونشاقتى ايماعىنا شىعارىلادى. ۇستىمىزدەگى جىلدىڭ ماۋسىم ايىندا ءۇشىنشى كورپۋس پايدالانۋعا بەرىلگەن سوڭ, ءسۇت ونىمدەرىنىڭ ءتۇرى كوبەيەدى, سوندا ەلۋگە جۋىق ءتۇرىن تۇتىنۋشىعا ۇسىنادى. مەتالل يلەك زاۋىتى دا داعدارىسقا قارسى جۇمىس ىستەپ  وتىرعان جوبانىڭ ءبىرى. مۇندا نەگىزىنەن سوكولوۆ-سارىباي كەن ءوندىرۋ بىرلەستىگىنىڭ قاجەتى ءۇشىن مەتالل يلەك وندىرىلەدى. سونىمەن قوسا ونىڭ ون بەس پايىزى سىرتقا شىعارىلادى. زاۋىتتا 500 ادام ەڭبەك ەتەدى. مەتالل يلەكتەۋ ءوندىرىسىنىڭ ونىمدىلىگى قازىر 6 مىڭ توننادان ارتىق ۇلعايدى. مينيستر اسەت يسەكەشەۆ داعدارىس كەزىندەگى ونەركاسىپ كاسىپورىندارىنىڭ جۇمىس قارقىنىن ءوز كوزىمەن كورىپ, ولاردىڭ جوسپارلارىمەن تانىستى. سونىمەن قاتار, كەڭەس وتكىزىپ, وندا كاسىپورىندارعا كومەك ءۇشىن ۇكىمەت تاراپىنان قانداي جۇمىستار جاسالىپ جاتقانىن ءتۇسىندىردى, وسى مينيسترلىكتىڭ يندۋستريالىق دامۋ جانە ونەركاسىپ قاۋىپسىزدىگى كوميتەتىنىڭ توراعاسى امانياز ەرجانوۆ. ينۆەستيتسيالار جانە  دامۋ ءمينيسترى اسەت يسەكەشەۆ وبلىس اكىمى نۇرالى سادۋاقاسوۆتىڭ  2014 جىلعى ەكونوميكالىق-الەۋمەتتىك دامۋ قورىتىندىلارى مەن 2015 جىلعا ارنالعان نەگىزگى مىندەتتەرى تۋرالى جۇرتشىلىق الدىنداعى ەسەپ بەرۋ جيىنىنا قاتىستى. ءنازيرا جارىمبەتوۆا, «ەگەمەن قازاقستان». قوستاناي وبلىسى.