- ەر-ريادتا ءوتىپ جاتقان WTA-نىڭ قورىتىندى تۋرنيرىندە ەلەنا رىباكينا تابىستى ونەر كورسەتىپ جاتىر. تۇساۋكەسەر كەزدەسۋىندە الەمنىڭ ءتورتىنشى راكەتكاسى, امەريكالىق اماندا انيسيموۆانىڭ تاس-تالقانىن شىعارعان ول ەكىنشى كەزەڭدە ۇزدىكتەر تىزىمىندە ەكىنشى ورىنداعى يگا شۆەنتەكپەن شەبەرلىك بايقاستى. باسەكەنىڭ ءبىرىنشى سەتىندە پولشالىق تەننيسشى باسىمدىق تانىتقانىمەن, ودان كەيىن رىباكينا قارقىنىن كۇرت كۇشەيتىپ, قارسىلاسىن باس كوتەرتپەي ۇتتى – 3:6, 6:1, 6:0. ءۇشىنشى تۋردا مەديسون كيزبەن كۇش سىناسۋعا ءتيىس ەدى. الايدا دەنساۋلىعىنىڭ سىر بەرۋىنە بايلانىستى اقش تەننيسشىسى كورتقا شىعۋدان باس تارتتى. ونى رەسەيلىك ەكاتەرينا الەكساندروۆا الماستىردى. رىباكينا قارسىلاسىن 6:4, 6:4 ەسەبىمەن قاپى قالدىردى. ءسويتىپ, ءوز توبىندا ءبىرىنشى ورىن العان رىباكينا جارتىلاي فينالعا جولداما الدى.
- 6 جەلتوقساندا اقش-تىڭ سان-ديەگو قالاسىندا كاسىپقوي بوكستان ورتا سالماقتا بىرنەشە بەلدى نۇسقالاردىڭ چەمپيوندىق اتاعى ءۇشىن جانىبەك ءالىمحان ۇلى (17-0, 12 كو) مەن كۋبالىق ەريسلاندي لارانىڭ (31-3-3, 19 كو) جۇدىرىقتاساتىنى بەلگىلى. كۇنى كەشە وسى كەزدەسۋدە باسىم تۇسكەن بوكسشىنىڭ كەلەسى جىلى كىممەن كۇش سىناساتىنى انىقتالدى. جەكپە-جەك جەڭىمپازى اقش بوكسشىسى وستين ۋيليامسپەن (19-1, 13 كو) ايقاسادى.
- استانادا ات سپورتىنىڭ كونۋر تۇرىنەن ەل چەمپيوناتى مارەگە جەتتى. بيىكتىگى 145 سانتيمەترگە دەيىنگى توسقاۋىلدا «ۋران-ناد ۆيگرامي» سايگ ۇلىگىمەن رايسا سوكولەنكو توپ جارسا, بيىكتىگى 135 سانتيمەترلىك سايىستا «تايمازدى» تىزگىندەگەن ەستەللا بابايان باس جۇلدەنى ولجالادى. جارىستىڭ ءابسوليۋتتى چەمپيونى اتاعىنا ولەگ سوكولەنكو مەن ەستەللا بابايان قول جەتكىزدى.
- قۇرلىقتىق حوككەي ليگاسىندا (قحل) كۇش سىناسىپ جۇرگەن «بارىس» قاتارىنان بەس ويىندا جەڭىلىستىڭ كەرمەك ءدامىن تاتتى. ءتورتىنشى كەزدەسۋدە استانالىقتار نيجنەكامسكىنىڭ «نەفتەحيميگىن» قابىلدادى. ءبىرىنشى كەزەڭدە ەسەپ اشىلمادى. ودان كەيىن قوناقتار قارقىندى ارتتىرىپ, 5:2 ەسەبىمەن جەڭىسكە جەتتى. «بارىستىڭ» ساپىندا مەرگەندىك تانىتقاندار – كيريلل پانيۋكوۆ پەن دىنمۇحامەد قايىرجان. ال بەسىنشى كەزدەسۋدە استانادا ۋفانىڭ «سالاۆات يۋلاەۆ» كلۋبىنان جەڭىلدى. العاشقى ەكى گولدى قوناقتار سوقسا, ايدىن يەلەرىنىڭ تەك ەسەپتى قىسقارتۋعا عانا شاماسى جەتتى – 1:2.
