مەكتەپتە ءجۇرىپ دزيۋدومەن شۇعىلدانعان دامير 20 جاسقا تولعان شاعىندا دجيۋ-دجيتسۋعا اڭسارى اۋىپ, وعان مىقتاپ دەن قويدى. ۋاقىت وزا جەكپە-جەكتىڭ ءدال وسى تۇرىندە جاس جىگىتتىڭ جۇلدىزى جارقىراي جاندى. بىلىكتى باپكەر رۋستام بالاباەۆتىڭ قول استىندا جاتتىققان ول AJP, ACBJJ ليگالارىندا سايىسقا ءتۇسىپ, سان مارتە الەم چەمپيونى اتاندى. UWW, JJIF, ACBJJ ۇيىمداستىرعان دۇنيەجۇزىلىك دودالاردا جەڭىس تۇعىرىنا كوتەرىلدى. اقش-تا وتكەن ايگىلى IBJJF, NAGA تۋرنيرلەرىندە توپ جاردى. ەل چەمپيوناتىندا قارسىلاس شاق كەلتىرمەي, ۇزاق ۋاقىت بويى ءوز سالماعىنىڭ كوشباسشىسى بولدى. وسىنداي وراسان زور تابىسىنىڭ ارقاسىندا ساقا سپورتشى قارا بەلبەۋ يەگەرى اتاندى.
كاسىبي سپورتتان بولەك, د.سادىروۆ تورەشىلىك كاسىپتى بىرگە الىپ ءجۇر. ءتۇرلى سىناقتان مۇدىرمەي ءوتىپ, JJIF, JJAU, AIGA, IBJJF, AJP, ADCC سەرتيفيكاتتارىن يەلەندى. قازاق تورەشىسى موڭعوليا, تۇركيا, ءباا, برازيليا مەن ەلىمىزدە وتكەن الەم چەمپيوناتتارىندا قازىلىق ەتتى. تەرەڭ ءبىلىمى, كاسىبي بىلىكتىلىگى, قارا قىلدى قاق جارعان ادىلدىگىمەن كوزگە تۇسكەن دامير كۇنى كەشە عانا اقش-تىڭ لاس-ۆەگاس قالاسىندا ۇيىمداستىرىلعان IBJJF World Masters تۋرنيرىندە قازىلىق ەتۋ قۇرمەتىنە يە بولدى. ونداي مۇمكىندىك ەكىنىڭ بىرىنە بەرىلە بەرمەيتىنىن دجيۋ-دجيتسۋدىڭ جانكۇيەرلەرى جاقسى بىلەدى. ءسويتىپ, دامير سادىروۆ ەسىمى دجيۋ-دجيتسۋ الەمىندەگى بەدەلى زور, مارتەبەسى بيىك اسا جاۋاپتى جارىستا تورەلىك ەتكەن ەلىمىزدىڭ تۇڭعىش وكىلى رەتىندە سپورتتىق شەجىرەگە جازىلدى.
دامير باپكەر رەتىندە دە مىقتىلىعىن مويىنداتتى. دۇنيەجۇزىلىك دەڭگەيدەگى دودالاردا دارالانعان بىرنەشە جەكپە-جەك شەبەرلەرىن دايارلادى. سولاردىڭ اراسىنان رينات گورباچيوۆ, ماريام ورداباەۆا سىندى سپورتشىلاردى بولە-جارا اتاپ وتۋگە بولادى. ولاردىڭ ەكەۋى دە الەم چەمپيوناتتارىنىڭ جۇلدەگەرلەرى.
د.سادىروۆتىڭ تاعى ءبىر قاسيەتى – دجيۋ-دجيتسۋ فيلوسوفياسىن جەتىك مەڭگەرگەن. ءوزى ويلاپ-تاپقان ءادىس-تاسىلدەرى دە بار. العاشىندا بىلىكتى باپكەر ونى ءتول شاكىرتتەرىنە ۇيرەتتى. ولار ونى ءتۇرلى جارىستا كەڭىنەن قولدانىپ, جاقسى ناتيجە شىعاردى. قازىر ءداميردىڭ بۇل ادىستەرىن باسقا دا مەملەكەتتەردىڭ شەبەرلەرى ءتيىمدى پايدالانىپ, كادەلەرىنە جاراتىپ ءجۇر.
