سۋرەت: kz.kursiv.media
كەلىنشەگىم بەسىنشى پەرزەنتىمىزگە جۇكتى بولعان كەز. اللاعا سانسىز شۇكىرشىلىك ايتىپ, ىشتەي قۋانىپ ءجۇرمىز. الايدا بۇل قادامىمىزعا ەمحاناداعى ءتيىستى دارىگەرلەر الاڭ كوڭىلمەن قاراپ, ايەلىمنىڭ جۇكتىلىك ءحالىن جالعاستىرۋىنا, ياعني بوسانۋىنا قارسىلىعىن ءبىلدىرىپتى. دارىگەرلەر اراعا جەتى جىل سالىپ بوسانۋدىڭ قيىندىعىن ەسكەرىپ, انانىڭ دەنساۋلىعىنا الاڭداپ, ساقتاندىرعان بولار. جازعىرۋ ارتىق. سودان جاۋاپتى دارىگەرلەر كەلىنشەگىمدى ورتاعا الىپ, تالداۋ ناتيجەلەرى ويداعىداي ەمەستىگىن العا تارتىپ, تۇسىك جاساتۋعا ۇگىتتەيدى. ايدىڭ كۇننىڭ امانىندا تۇسىك جاساتۋ ادامشىلىققا كەلمەيتىنىن, ءدىن قولدامايتىن ءىس ەكەنىن, قۇرساعىنداعى تىرشىلىك يەسىن قولىمەن ۇستاپ, كوزىمەن كورمەسە دە ول ءوز پەرزەنتى ەكەنىن, اللانىڭ نىعمەتىن اياققا تاپتاعانداي بولاتىنىن جەتكىزەدى. ۇگىتتەرىنەن تۇك شىقپاعان سوڭ دارىگەرلەر ونى رايىنان قايتارۋدىڭ سوڭعى مۇمكىندىگى رەتىندە پسيحولوگتەن كەڭەس الۋعا جۇمسايدى.
پسيحولوگ – بيىك وكشە تۋفلي, قىسقا ەتەك يۋبكا كيگەن, سىرتقى پوشىمى ناعىز ەۋروپاشا ۇلگىمەن كومكەرىلگەن قالالىق كەلىنشەك. ول كەلىنشەگىمدى بوسانسام دەگەن نيەتىنەن اينىتۋ ماقساتىندا اڭگىمەسىن ءا دەگەننەن الەۋمەتتىك-تۇرمىستىق ماسەلەگە قاتىستى باستايدى. وتباسىمىزداعى التى جاننىڭ تەك ەڭبەكاقىعا قاراپ وتىرعانى, قىمباتشىلىقتىڭ اسقىنىپ تۇرعانى, بالا-شاعانى وقىتۋ, كيىندىرۋ, تويىندىرۋدىڭ مەحناتى, ءتورت بالانىڭ ۇستىنە تاعى بىرەۋى قوسىلسا, سالماق اۋىرلاي تۇسەتىنى, ءبارى-ءبارى ايتىلادى. «قالاي اسىراماقسىزدار, قينالىپ قالاسىزدار عوي», دەپ «قامقورلىق» تانىتادى. وسىلايشا, ايەلىمنىڭ جاندى جەرىنەن ۇستاعانداي, كەرەمەت ءبىر وي سالعانداي بولادى.
ءسوزدى بولمەي ءبارىن تىڭداپ وتىرعان كەلىنشەگىم ءوز كەزەگىندە:
– ءسىز وتباسىلى بولارسىز؟ – دەپ سۇرايدى پسيحولوگتەن.
– ارينە, وتباسىلىمىن. كۇيەۋىم, ءبىر ۇلىم بار, – دەيدى ول.
– ۇلىڭىزدىڭ سوڭىنان باۋىرىن ىلەستىرۋ ويلارىڭىزدا جوق پا؟
– ونداي جوسپارىمىز جوق. ايتپاڭىز. ءبىر بالانىڭ ءوزىن باعىپ-قاعۋ, قاجەتىن وتەۋ وڭاي ەمەس. مىنا قىمباتشىلىق زاماندا تاعى بالا تۋىپ نە ازاپ؟..
– ءسىز كۇيەۋىڭىز ەكەۋىڭىز الگى ۇلدارىڭىزدى اسىراپ ءجۇرمىن دەپ ويلايسىز با؟
– ارينە, اسىراپ ءجۇرمىز... سىزدىڭشە قالاي؟
– جوق, ولاي دەمەڭىز... كەرىسىنشە, سىزدەر سول پەرزەنتتەرىڭىزدىڭ نەسىبەسى ارقاسىندا كۇن كورىپ, امان-ەسەن شاپقىلاپ جۇرسىزدەر. قۇداي ساقتاسىن, ارينە, ەگەر سىزدەر ءوز بالالارىڭىزدى كۇتىپ-باعۋدى اۋىرسىنىپ, كەلتەلىكپەن كەرى تەپسەڭىزدەر, تاعدىرلارىڭىز قاي قيىرعا بارىپ تىرەلەتىنىن كورەر ەدىڭىزدەر... بالا دەگەن اللانىڭ بەرگەن نىعمەتى. سونىڭ بىزدەرگە بۇيىرعانىنا شۇكىر ەتۋىمىز كەرەك. ادەتتە, اتا-انالار پەرزەنتىمىزدى ءوزىمىز اسىراپ ءجۇرمىز دەپ ويلايدى, الايدا بالاعا بەرىلگەن نەسىبەمەن كۇن كورەتىنىن باعامداي بەرمەيدى. جان, ءتان, ءومىر, نەسىبە اللادان, ال اتا-انا – تەك سەبەپكەر.
مۇنى ەستىگەن پسيحولوگ ويلانىپ, ءۇنسىز وتىرىپ قالادى. ادەپكىدەگى ەكپىنى سۋ سەپكەندەي باسىلعان. قانشا دەگەنمەن قانى قازاق ەمەس پە, ءسوز توركىنىن ۇعىپ, ىڭعايسىز كۇي كەشىپ, جانارى جاساۋراڭقىراپ:
– دۇرىس ايتاسىز, ءيا, دۇرىس ايتاسىز... مەن بۇل جاعىن ويلاماپپىن. كەشىرىڭىز... امان-ەسەن بوسانىپ الىڭىز, تىلەكتەسپىن, تىلەكتەسپىن, – دەۋدەن بوتەن ەشتەڭە ايتپاي, جىلى قوشتاسادى.
ارادا جەتى-سەگىز اي وتكەندە ايەلىم الگى پسيحولوگپەن ەمحانادا كەزدەسىپ قالىپتى. ادەتتە تىكىرەيىپ جۇرەتىن ول ەلپىلدەي جاعداي سۇراسىپ, جالپىلداي امانداسىپ, جىك-جاپار بولادى. بۇل قۇداي قولداپ, امان-ەسەن بوسانىپ العانىن ايتادى. ال پسيحولوگ كەلىنشەك شەرميىڭكىرەگەن ءىشىن سيپاپ تۇرىپ «سىزبەن سويلەسكەننەن كەيىن كۇيەۋىم ەكەۋمىز كوپ ويلانباستان «قۇداي بەرسە تاعى دا پەرزەنت سۇيەيىك» دەپ نيەتتەندىك... بىزگە دە ءسىزدىڭ جولىڭىزدى بەرسىن», دەيدى جۇزىندە قىزىل ويناپ. سول ساتتە ساناسىندا الدەنەلەر جاڭعىرعان بولار, بالكىم...
قۇدايعا شۇكىر, ء«بىر ۋىس جۋسانىن» قولتىعىنا قىسا ومىرگە كەلگەن «قوزىمىز» وزىنەن ءبىر جارىم جاس كىشى ءىنىسى – «اربا تولى جۋسانىن» سۇيرەي جەتكەن «قوزىسىن» جەتەكتەپ ءۇشىنشى سىنىپقا بارىپ ءجۇر. مەكتەبىنە باراردا, كەلەردە كەزىندە ءوز تاعدىرى تالقىعا تۇسكەن ەمحانانىڭ ءدال جانىنان وتەدى. الگى پسيحولوگ تە امان-ەسەن بوسانىپ الىپ, پەرزەنتىن مەكتەپكە تاسىپ جۇرگەن شىعار. لايىم سولاي بولسىن.
ءيا, دەموگرافيا دۇنيەتانىمعا دا تاۋەلدى.
