ارنايى ايماقتا ءوز جوباسىن جۇزەگە اسىرعان ينۆەستور كورپوراتيۆتىك تابىس, م ۇلىك, جەر سالىعى مەن يمپورت ققس-تان, كەدەندىك باجداردان بوساتىلادى, جوبالارعا تولىق اكىمشىلىك جانە تەحنيكالىق قولداۋ كورسەتىلەدى. بۇل جەڭىلدىككە قازىر ايماققا وتاندىق كاسىپكەرلەرمەن بىرگە تۇركيا, ازەربايجان, قىتاي, گەرمانيا, سينگاپۋر, يتاليا ەلدەرىنىڭ كومپانيالارى قىزىعۋشىلىق تانىتىپ, جوبالارىن جۇزەگە اسىرا باستادى. سونىڭ ناتيجەسىندە, اقتاۋداعى ارنايى ەكونوميكالىق ايماق اشىلعالى 347,2 ملرد تەڭگە ينۆەستيتسيا تارتىلدى. شەتەلدىك ينۆەستيتسيالار 176,9 ملرد تەڭگەگە جەتسە, وندىرىلگەن ءونىم كولەمى 550,9 ملرد تەڭگەنى, ەكسپورت كولەمى 4 ملرد تەڭگەنى قۇرادى. 68,4 ملرد تەڭگە سالىق ءتۇسىپ, 2 500-دەن استام جۇمىس ورنى اشىلدى.
مەملەكەت باسشىسى جەرگىلىكتى اكىمدىككە ۇكىمەتپەن بىرلەسە وتىرىپ اتالعان ەكونوميكالىق ايماق اۋماعى مەن باسىم قىزمەت تۇرلەرىنىڭ تىزبەسىن كەڭەيتۋ جونىندە تاپسىرما بەرگەن بولاتىن. تاپسىرمانى جەدەل, تياناقتى ورىنداۋدى ماقسات ەتكەن ماڭعىستاۋ وبلىسى اكىمدىگىنىڭ باستاماسىمەن كەشەندى جۇمىس جۇرگىزىلدى. اتاپ ايتقاندا, 2024–2025 جىلدارى ەكونوميكالىق ايماقتىڭ اۋماعى ەكى جارىم ەسە, ياعني 1 926 گەكتاردان 4 407 گەكتارعا دەيىن ۇلعايدى. ونىڭ قۇرامىنا بيىل اقتاۋ حالىقارالىق اۋەجايى, اقتاۋ قالاسىنىڭ جاعالاۋ بولىگى, جاڭاوزەننىڭ وندىرىستىك ايماعى, سارجا تەڭىز تەرمينالى كىردى. اۋماق كولەمىنىڭ ارتۋى مۇنىمەن توقتاماق ەمەس. مۇنايلى اۋدانىنان ينۆەستيتسيالىق جوبالاردى ىسكە قوسۋ ءۇشىن ارنايى جەردى, كاسپي ەرساي كەمە جاساۋ زاۋىتىن, كەندىرلى كۋرورتتىق ايماعىن ەكونوميكالىق ايماققا كىرگىزۋ جۇمىسى ءجۇرىپ جاتىر. بۇل اۋماقتاردىڭ قوسىلۋى اەا كولەمىن 27 مىڭ گەكتارعا جەتكىزىپ, وڭىرگە جاڭا ينۆەستيتسيالاردىڭ قۇيىلۋى مەن جاڭا سالالاردىڭ دامۋىنا مۇمكىندىك بەرەدى.
– ارنايى ەكونوميكالىق ايماقتىڭ اۋماعىن كەڭەيتىپ, مۇمكىندىگىن بارىنشا پايدالانۋ – ماڭعىستاۋ وبلىسىنىڭ اكىمى نۇرداۋلەت قيلىبايدىڭ باستى نازارىندا. الدىمىزعا اۋقىمدى جوسپارلاردى جوبالاپ وتىرمىز. «اقتاۋ تەڭىز پورتى» ارنايى ەكونوميكالىق اۋماعىندا جاسالعان تاعى ءبىر ماڭىزدى قادام – باسىم قىزمەت تۇرلەرىنىڭ ءتىزىمى كەڭەيتىلىپ, بۇرىنعى 24 باعىتتىڭ ورنىنا 45 جاڭا باعىت بەكىتىلدى. ولاردىڭ قاتارىندا: قۇرىلىس, اباتتاندىرۋ, تۋريزم, كۋرورتتىق-ساناتوري قىزمەتتەرى, توقىما بۇيىمدارى ءوندىرىسى, سۋ وڭدەۋ, كەمە جانە اۋە كەمەلەرىن جوندەۋ, كولىك جانە باسقا دا ءوندىرىس تۇرلەرى بار. بۇل جاڭا ءوندىرىس اشامىن, ءوڭىر ەكونوميكاسىنا قارجى قۇيامىن دەگەن ازاماتتار ءۇشىن دە مول مۇمكىندىك. «اقتاۋ تەڭىز پورتى» اەا – ماڭعىستاۋ وبلىسىنىڭ عانا ەمەس, بۇكىل ەلىمىزدىڭ ەكونوميكالىق الەۋەتىن ارتتىرۋعا باعىتتالعان ءىرى جوبا. الداعى ۋاقىتتا دا بىرلەسە وتىرىپ, جاڭا مۇمكىندىكتەردى ىسكە اسىرىپ, ءوڭىرىمىزدى ينۆەستيتسيا ءۇشىن ەڭ قولايلى ايماققا اينالدىرامىز, دەيدى «اقتاۋ تەڭىز پورتى» اەا» اق باسقارما توراعاسى مۇباراك تولەگەنوۆ.
«اقتاۋ تەڭىز پورتى» اەا-عا بيىل 9 ايدى تولايىم تابىسپەن ەڭسەردى. اتالعان ايماققا 25 ملرد تەڭگەدەن استام ينۆەستيتسيا تارتىلعان, دەمەك, بۇل ارنايى ەكونوميكالىق ايماقتا جۇيەلى جۇرگىزىلىپ جاتقان جۇمىستىڭ ناتيجەسى دەۋگە بولادى.
«اقتاۋ تەڭىز پورتى» اەا» اق باسقارما توراعاسىنىڭ ايتۋىنشا, جىل باسىنان بەرگى ءۇش توقساننىڭ قورىتىندىسى-اق «اقتاۋ تەڭىز پورتى» ارنايى ەكونوميكالىق ايماعى ءوڭىر ەكونوميكاسىنىڭ تۇراقتى دامۋىنا سەرپىن بەرىپ وتىرعاندىعىن ايعاقتاي تۇسەدى.
مەملەكەت باسشىسىنىڭ ماڭعىستاۋ وبلىسىنا كەلگەن ساپارىندا ارنايى ەكونوميكالىق ايماقتىڭ الەۋەتىن دامىتۋ, وڭدەۋ سالاسىنداعى جوبالاردى جۇزەگە اسىرۋعا بەرگەن تاپسىرماسىن ورىنداۋ ماقساتىندا ماڭعىستاۋ وبلىسىنىڭ اكىمى ن.قيلىبايدىڭ باستاماسىمەن وتاندىق جانە شەتەلدىك ينۆەستورلاردى تارتۋ, جاڭا وندىرىستەر قۇرىپ, جۇمىس ورىندارىن اشۋ بويىنشا جۇيەلى جۇمىس جۇرگىزىلىپ جاتىر. 9 اي ىشىندە ارنايى ەكونوميكالىق ايماقتا جالپى ينۆەستيتسيا كولەمى – 53,9 ملرد تەڭگەنى قۇرايتىن 8 جاڭا ينۆەستيتسيالىق جوبا جۇزەگە اسىرىلدى. 878 جاڭا جۇمىس ورنىن قۇرايتىن جوبا اراسىندا مەتالل سىنىقتارىن قايتا بالقىتۋ زاۋىتى, پوليپروپيلەن بۇيىمدارى ءوندىرىسى, پوليەتيلەن ءۇلدىرىن شىعارۋ, سۋ تازارتقىش سۇزگىلەر زاۋىتى, ءىرى قۇبىر زاۋىتى, اقتاۋ اۋەجايىنداعى ۇشۋ-قونۋ جولاعىمەن پەرروندى قايتا جاڭعىرتۋ جوبالارى بار.
قازىر اەا اۋماعىندا تىركەلگەن 55 كومپانيانىڭ 27-ءسى تولىق ىسكە قوسىلعان بولسا, 28 جوبا جۇزەگە اسىرىلۋ كەزەڭىندە تۇر.
بيىل قاڭتار-قىركۇيەك ايلارىندا ايماق اۋماعىنا تارتىلعان تىكەلەي شەتەلدىك ينۆەستيتسيا كولەمى – 6,6 ملرد تەڭگە, ال جالپى ينۆەستيتسيا كولەمى 25,1 ملرد تەڭگەگە جەتتى. وسى كەزەڭدە اەا كاسىپورىندارى 58,3 ملرد تەڭگەنىڭ ءونىمىن ءوندىرىپ, ونىڭ ءبىر بولىگى 108,9 ملن تەڭگە مولشەرىندە ەكسپورتتالعان. ايماقتاعى وندىرىستىك بەلسەندىلىكتىڭ ارتۋى 3052 جاڭا جۇمىس ورنىن اشۋعا مۇمكىندىك بەردى. بۇل – ءوڭىر تۇرعىندارى ءۇشىن جاڭا مۇمكىندىكتەر مەن تۇراقتى تابىس كوزى. مۇنداي جوبالار وندىرىستىك الەۋەتتى ارتتىرىپ, ءوڭىر ەكونوميكاسىن ارتاراپتاندىرۋعا, ەكسپورتتىق باعىتتى كۇشەيتۋگە جول اشىپ وتىر. بيۋدجەتتەن بولىنگەن ءاربىر 1 تەڭگەگە شاققاندا 46,4 تەڭگە جەكە ينۆەستيتسيا تارتىلىپ, 9,1 تەڭگە سالىق ءتۇسىمى قامتاماسىز ەتىلدى. بۇل – «اقتاۋ تەڭىز پورتى» اەا-نىڭ ءتيىمدى جۇمىس ىستەپ, ءوڭىر دامۋىنا ناقتى ۇلەس قوسىپ وتىرعانىنىڭ ايقىن دالەلى, دەيدى اەا اتقارۋشى ديرەكتورى گ.ابىشەۆا.
«جاقسىنى كورمەككە» دەگەندەي, جۋىردا اتالعان ارنايى ەكونوميكالىق ايماققا بارىپ, پوليپروپيلەن قاپشىقتار مەن بيگ-بەگ وندىرەتىن زاۋىتتىڭ, قۇبىر شىعاراتىن يتاليالىق زاۋىتتىڭ جۇمىسى, اقتاۋ حالىقارالىق تەڭىز پورتىنىڭ بازاسىندا سالىنىپ جاتقان ءىرى كونتەينەرلىك حاب قۇرىلىسىمەن تانىستىق.
«WestEcoPlast» كاسىپورنى 2022 جىلدىڭ جەلتوقسانىندا ىسكە قوسىپ, بۇگىندە ءوز قارقىنىمەن جۇمىس ىستەپ تۇرعان پوليپروپيلەن قاپشىقتار مەن بيگ-بەگ وندىرەتىن زاۋىت – اەا-دا ءساتتى جۇزەگە اسىپ جاتقان جوبالاردىڭ ءبىرى. «WestEcoPlast» جشس ديرەكتورى ك.دەمچەنكونىڭ ايتۋىنشا, وندىرىستىك قۋاتى جىلىنا 6 ميلليون قاپتاما ونىمىنە ەسەپتەلگەنمەن, بولاشاقتا بۇل كورسەتكىشتى ەكى ەسە ارتتىرۋ جوسپارلانعان. ساپالى ونىمدەرى تەك ماڭعىستاۋ وبلىسىندا عانا ەمەس, باتىس قازاقستان وبلىسى, اقتوبە جانە قىزىلوردا وبلىسىنىڭ نارىعىندا سۇرانىسقا يە ەكەن.
«اقتاۋ تەڭىز پورتى» ارنايى ەكونوميكالىق ايماعىنىڭ مۇمكىندىگى مەن ماڭعىستاۋدىڭ ينفراقۇرىلىمدىق الەۋەتىن پايدالانىپ وتىرعان قاتىسۋشىلاردىڭ ءبىرى – الەمنىڭ 15 ەلىندە جۇمىس ىستەپ وتىرعان قۇبىر وندىرىسىندەگى الەمدىك كوشباسشى – «Tenaris» كومپانيالار توبىنىڭ ەنشىلەس كاسىپورنى «Kazakhstan Pipe Threaders» جشس. 2016 جىلى ىسكە قوسىلعان زاۋىت تولىق قۋاتتا جۇمىس ىستەپ تۇر ءارى بيىل ونىمدەرىن وزبەكستان نارىعىنا شىعارا باستاعان.
– بۇل – ەلىمىزدەگى بىرەگەي كاسىپورىن. زاۋىت پرەميۋم-كلاستى سوراپتىق-كومپرەسسورلىق قۇبىرلاردى مايسىز جابىندىسىمەن شىعارادى. بۇل تەحنولوگيا قۇبىرلاردى پايدالانۋ ۇدەرىسىن جەڭىلدەتىپ, تاپسىرىس بەرۋشىلەردىڭ جۇمىس تيىمدىلىگىن ارتتىرادى. زاۋىتتا ەڭبەك ەتىپ جۇرگەن 40-قا جۋىق جۇمىسشى-مامان رۋمىنياداعى «Tenaris Silcotub» زاۋىتىندا تاعىلىمدامادان ءوتتى. قازىر مامانداردى دامىتۋعا تۇراقتى تۇردە كوڭىل ءبولىنىپ, كوپتەگەن قىزمەتكەر وپەراتوردان باسشى دەڭگەيىنە دەيىن كوتەرىلدى. سونىمەن قاتار ۇجىم حالىقارالىق تاجىريبە الماسۋعا بەلسەندى قاتىسىپ كەلەدى. كومپانيانىڭ باسىم باعىتتارىنىڭ ءبىرى – ءوڭىردىڭ الەۋمەتتىك دامۋىنا ۇلەس قوسۋ. ءار جىلى اقتاۋ مەن جاڭاوزەن قالالارىنداعى ءبىلىم سالاسىن قولداۋعا ارنالعان جوبالار جۇزەگە اسىرىلىپ كەلەدى, دەيدى «Kazakhstan Pipe Threaders» جشس باس ديرەكتورى ا.پيليپەنكو.
اقتاۋ حالىقارالىق پورتىنىڭ بازاسىندا سالىنىپ جاتقان زاماناۋي كونتەينەرلىك حاب قۇرىلىسىن قازاقستان-قىتاي بىرلەسكەن كومپانياسى جۇزەگە اسىرىپ جاتىر. كومپانيا باس ديرەكتورىنىڭ كوممەرتسيا جونىندەگى ورىنباسارى قايرات قاليوللانىڭ ايتۋىنشا, كونتەينەرلىك حابتىڭ ءبىرىنشى كەزەڭىن 2026 جىلدىڭ باسىندا ىسكە قوسۋ جوسپارلانعان. بۇعان دەيىن اقتاۋ پورتى جىلىنا 70 مىڭ كونتەينەر وڭدەسە, حابتىڭ ارقاسىندا تەڭىز ارقىلى تاسىمالداناتىن جۇك كولەمى 3 ەسەگە جۋىق وسپەك. كونتەينەرلىك حابتا جابىق جانە توڭازىتقىش كونتەينەرلەرگە ارنالعان قويمالار بولادى. وزىق لوگيستيكالىق ينفراقۇرىلىم كونتەينەرلىك جۇكتەردى جىلدام وڭدەۋگە مۇمكىندىك بەرەدى.
اەا-داعى قارقىندى جۇمىس, قولايلى ورتا وبلىس اكىمدىگىنىڭ باستاماسىمەن, ۇكىمەتتىڭ قولداۋىمەن ەكونوميكالىق ايماقتىڭ قىزمەت ەتۋ مەرزىمىن
2052 جىلعى 31 جەلتوقسانعا دەيىن ۇزارتۋعا نەگىز بولدى. بۇل ايماق اۋماعىندا ءساتتى, تابىستى جوبالاردىڭ ىرگەسى قالانۋىنا, ول جوبالاردىڭ ءوڭىر, ەل ەكونوميكاسىنىڭ دامۋىنا ۇلەس قوسۋىنا مۇمكىندىك بەرەدى.
ماڭعىستاۋ وبلىسى
