ستاۆكالار بانك ارقىلى قابىلدانىپ, ودان سوڭ ويىنشىلارعا جۇيەگە كىرۋ ءۇشىن لوگين مەن قۇپياسوز بەرىلگەن.
قارجىلىق وپەراتسيالار تۋىستارى مەن ءۇشىنشى تۇلعالاردىڭ, سونىڭ ىشىندە شەتەل ازاماتتارىنىڭ (دروپپەرلەردىڭ) اتىنا راسىمدەلگەن بانك كارتالارى ارقىلى جۇرگىزىلگەن.
جاڭا ويىنشىلاردى تارتۋ ماقساتىندا الەۋمەتتىك جەلىلەردە ويىن كلۋبىن جارنامالايتىن نىسانالى جارناما قولدانىلعان.
«سوت ۇكىمىمەن ءۇش كىنالى تۇلعا 2 جىل 6 ايدان 4 جىل 6 ايعا دەيىنگى مەرزىمگە باس بوستاندىعىنان ايىرىلدى. مەملەكەت پايداسىنا 116 ميلليون تەڭگە كولەمىندەگى زاڭسىز تابىس پەن «ZEEKR» ماركالى اۆتوكولىك تاركىلەندى», دەلىنگەن قما حابارلاماسىندا.
ۇكىم زاڭدى كۇشىنە ەندى.
قارجىلىق مونيتورينگ اگەنتتىگى زاڭسىز ويىن بيزنەسىن انىقتاۋ جانە جولىن كەسۋ بويىنشا جۇيەلى جۇمىستاردى جالعاستىرىپ جاتىر.
ايتا كەتەيىك, سوڭعى ەكى جىلدا 105 سوتقا دەيىنگى تەرگەۋ تىركەلگەن; 22 جاسىرىن كازينو, 65 ويىن زالى جانە 441 تەرمينال جويىلدى; «كيبەرباقىلاۋ» جۇيەسىندە 33 مىڭنان استام ونلاين-كازينو سىلتەمەلەرى بۇعاتتالدى; زاڭسىز ويىن بيزنەسىن ۇيىمداستىرعانى ءۇشىن 166 ادام سوتتالدى.
