ۇلتتىق ستاتيستيكا بيۋروسىنىڭ دەرەكتەرىنە سايكەس, ەلىمىزدەگى ۋنيۆەرسيتەتتەردە الەۋمەتتىك جانە گۋمانيتارلىق عىلىمدار باعىتتارى بويىنشا دوكتورلىق ديسسەرتاتسيانى ءساتتى قورعاۋ كورسەتكىشى ءالى دە تومەن دەڭگەيدە قالىپ وتىر.
ۋنيۆەرسيتەت رەكتورى لاۋرا قاراباسوۆانىڭ ايتۋىنشا, دوكتورانتتار اراسىندا جۇرگىزىلگەن زەرتتەۋلەر كورسەتكەندەي, عىلىمي جۋرنالداردا ماقالا جاريالاۋ قيىندىقتارى, سونىڭ ىشىندە اكادەميالىق جازۋ مەن زەرتتەۋ ەتيكاسى داعدىلارىنىڭ جەتكىلىكتى قالىپتاسپاۋىنان تۋىندايدى. سونىمەن قاتار جاس عالىمدارعا جەتەكشىلىك ەتەتىن پروفەسسور-وقىتۋشىلاردىڭ حالىقارالىق عىلىمي ورتاعا كىرۋدەگى كەدەرگىلەرى, بەدەلدى جۋرنالداردا جاريالانۋ تاجىريبەسىنىڭ ازدىعى جانە شەتەلدىك كونسۋلتانتتارمەن بىرلەسە جۇمىس ىستەۋ شەكتەۋلەرى دە ءجيى ايتىلىپ جاتىر.
«زاماناۋي زەرتتەۋ ءادىسناماسىن, ستاتيستيكالىق تالداۋ باعدارلامالارىن جانە عىلىمي قۇرالداردى مەڭگەرۋ تۇرعىسىنان ءالسىز تۇستارىمىز بار ەكەنى راس. بىلتىر ءبىز اقش-تاعى ميننەسوتا ۋنيۆەرسيتەتىمەن بىرلەسىپ, الەۋمەتتىك-گۋمانيتارلىق سالاداعى زەرتتەۋشىلەردىڭ قيىندىقتارىن زەردەلەي باستادىق. بۇل جۇمىس ناتيجەلەرى زەرتتەۋشىلەردىڭ ادىسنامالىق دايىندىعىن كۇشەيتۋ مەن جۇيەلى ينستيتۋتسيونالدىق قولداۋدىڭ ماڭىزىن ناقتى كورسەتتى», دەپ اتاپ ءوتتى رەكتور.
ميننەسوتا ۋنيۆەرسيتەتى – الەمدىك بەدەلگە يە جوعارى وقۋ ورنى. Times Higher Education رەيتينگىندە ۋنيۆەرسيتەت 88-ورىندا, ال ميننەسوتا ۋنيۆەرسيتەتىنىڭ ءبىلىم جانە ادام دامۋى كوللەدجى (CEHD) 2025 جىلعى پاندىك رەيتينگتە ء«بىلىم بەرۋ» سالاسى بويىنشا 70-ورىندى يەلەندى. QS World University Rankings by Subject 2025 مالىمەتى بويىنشا ۋنيۆەرسيتەت ء«بىلىم بەرۋ جانە دايارلىق» (Education & Training) باعىتى بويىنشا الەمدە 53-ورىندا, U.S. News & World Report دەرەگى بويىنشا اقش-تاعى ۇزدىك ءبىلىم بەرۋ مەكتەپتەرى رەيتينگىندە 255 وقۋ ورنىنىڭ ىشىندە 24-ورىندا تۇر.
«ميننەسوتامەن بايلانىسىم التى جىل بۇرىن, زەرتتەۋشى رەتىندە جۇمىس ىستەگەن كەزىمدە باستالدى. سول ۋاقىتتا ءبىلىم جانە ادامي دامۋ كوللەدجىنىڭ ءبىر توپ پروفەسسورىمەن بىرلەسكەن جوبادا ەڭبەك ەتتىك. كەيىن اقتوبەگە رەكتور بولىپ كەلگەندە, وسى ىنتىماقتاستىقتى كەڭەيتۋ باستاماسىن كوتەردىم. ناتيجەسىندە پروفەسسور باسكار ۋپۋدياي بىرنەشە رەت كەلىپ, جۇبانوۆ ۋنيۆەرسيتەتىنىڭ وقىتۋشىلارىنا زەرتتەۋشىگە قاجەت داعدىلار بويىنشا سەمينارلار وتكىزدى. كەيىن «بولاشاق» باعدارلاماسى بويىنشا عالىمدارىمىز تاعىلىمداماعا بارا باستادى. وسىلايشا, ەكى ۋنيۆەرسيتەت اراسىنداعى ىنتىماقتاستىقتىڭ بەرىك ىرگەتاسى قالاندى», دەيدى ل.قاراباسوۆا.
ۋنيۆەرسيتەت باسشىسى اقش-قا ساپارى بارىسىندا ميننەسوتا ۋنيۆەرسيتەتىنىڭ عىلىمي زەرتتەۋلەر جانە يننوۆاتسيالار جونىندەگى ۆيتسە-پرەزيدەنتى شاشانك پريا مىرزامەن جانە ءبىلىم جانە ادام دامۋى كوللەدجىنىڭ دەكانى, كامپبەلل ءبىلىم بەرۋ جانە ادام دامۋى سالاسىنداعى كوشباسشىلىق ءبولىمىنىڭ جەتەكشىسى مايكل رودريگەسپەن كەزدەسىپ, ءبىر جىلدىق دايىندىق جۇمىستارىنىڭ ناتيجەسىندە ماڭىزدى كەلىسىمگە قول جەتكىزگەن.
بۇل ورتالىق تەك جۇبانوۆ زەرتتەۋشىلەرىنە عانا ەمەس, وتاندىق عالىمدار مەن وقىتۋشىلارعا ارنالعان جاڭا مۇمكىندىكتەر الاڭى بولماق. ول ەڭ الدىمەن ماگيسترانتتار مەن دوكتورانتتارعا ساباق بەرەتىن پروفەسسورلىق-وقىتۋشىلىق قۇرامنىڭ بىلىكتىلىگىن ارتتىرۋعا جانە حالىقارالىق زەرتتەۋ داعدىلارىن دامىتۋعا باعىتتالادى.
