فوتو: قورعانىس مينيسترلىگى
جاس ساربازداردىڭ روتالىق وقۋ جيىندارىندا اسكەري قىزمەتتىڭ نەگىزدەرىن مەڭگەرىپ, ساپتىق, اتىس, تاكتيكالىق جانە دەنە دايارلىعىنان ءوتىپ جانە جالپىاسكەري جارعىلار مەن ىشكى ءتارتىپ ەرەجەلەرىن ۇيرەنىپ جاتىر.
ء«بىزدىڭ باستى مىندەتىمىز – جاس ساربازداردىڭ تەز بەيىمدەلۋىنە كومەكتەسۋ, جاۋىنگەرلىك داستۇرلەرمەن تانىستىرۋ جانە ولاردى اسكەري انت بەرۋگە دايىنداۋ», دەدى 61993 اسكەري ءبولىمى كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى پودپولكوۆنيك داۋرەن تولەنباەۆ.
قورعانىس مينيسترلىگىنىڭ مالىمەتىنشە, بەيىمدەلۋ بارىسىندا پسيحولوگتار بەلسەندى جۇمىس اتقارىپ جاتىر. جاس جاۋىنگەرلەرگە دياگنوستيكالىق تەستىلەر, توپتىق ترەنينگتەر جانە جەكە كەڭەستەر وتكىزىلەدى. مۇنىڭ ءبارى بولىمدەردەگى سالاۋاتتى مورالدىق-پسيحولوگيالىق احۋالدىڭ قالىپتاسۋىنا ىقپال ەتەدى.
جيىن باعدارلاماسىندا جاۋىنگەرلىك جانە اتىس دايارلىعىنا ەرەكشە ءمان بەرىلگەن. پوليگونداردا جاس دەسانتشىلار كالاشنيكوۆ اۆتوماتىنان العاشقى اتىس جاتتىعۋلارىن ورىنداپ, بولىمشە قۇرامىندا ءىس-قيمىل جاساۋدى جانە برونەتەحنيكانى جۇرگىزىپ تەكسەرىپ كورۋ تاجىريبەسىنەن ءوتتى.
«العاشقى اتىستاردا ءسال تولقىدىم, بىراق كەيىن نىساناعا ءدال تيگىزە باستادىم, ءتىپتى «توعىزدىققا» تيگىزدىم. سپورتتىق دايىندىق كوپ كومەكتەستى», دەدى 2024 جىلى كانادادا وتكەن Dageki World Full Contact Karate Championship الەم چەمپيوناتىنىڭ جەڭىمپازى, استانادان شاقىرىلعان قاتارداعى جاۋىنگەر تاتىمبەك نوگەربەك.
جاس دەسانتشىلاردى الداعى ۋاقىتتا پاراشيۋتپەن سەكىرۋ, دالالىق جاتتىعۋلار جانە جاۋىنگەرلىك وقۋدىڭ جاڭا كەزەڭدەرى كۇتىپ تۇر.
