فوتو: kazfootball.kz
«الماتى – الىستاعى عالامشاردا كىشكەنتاي عانا نۇكتە. بىراق قىرعىزستان مەن قىتاي شەكاراسىنا جاقىن ورنالاسقان. «قايرات» كومانداسى «سان-سيروعا» جەتۋ ءۇشىن شامامەن 7000 شاقىرىمدى ەڭسەرىپ, سەگىز ساعاتتان استام اۋەدە بولدى. ميلانعا ءۇمىتسىز قۇربان رەتىندە كەلگەندەي كورىنگەنىمەن, ءبارى باسقاشا ءوربىدى», دەپ جازادى Gazzetta.it.
يتاليا جۋرناليستەرى اتاپ وتكەندەي, الماتىلىقتار قارسىلاستارىمەن ەركىن كۇرەسىپ, سوڭىنا دەيىن تاباندىلىق تانىتتى.
«سان-سيرودا» «ينتەرگە» قارسى تولىق 90 مينۋت بويى توتەپ بەرۋ – كەز كەلگەن كوماندا ءۇشىن قيىن. دەگەنمەن «قايرات» «ينتەردى» ءبىراز ابىگەرگە سالدى. بۇل ەۋروپالىق كەشتە كيپردىڭ «پافوسى» مەن ازەربايجاننىڭ «قاراباعى» سەنساتسيا جاساعانداي, «قايرات» تا قۇرمەتكە لايىق ويىن كورسەتتى», دەلىنگەن ماقالادا.
Gazzetta.it اتاپ وتكەندەي, ماتچتا «قايراتتىڭ» ويىنشىسى 2008 جىلى تۋعان داستان ساتپاەۆ ەرەكشە كوزگە ءتۇستى. ول قارسىلاستىڭ دوبىن تارتىپ الىپ, الىستان باعىتتاعان سوققىسىمەن قاقپا ماڭدايشاسىن شايقادى. باسىلىمنىڭ ايتۋىنشا, ءدال وسى ويىنىنان كەيىن «چەلسي» كلۋبى جاس قازاقستاندىق فۋتبولشىمەن 2,5 ميلليون ەۋروعا كەلىسىمشارت جاساسقانى تەگىن ەمەس.
ءبىرىنشى تايمنىڭ سوڭىندا يتاليالىق كوماندانىڭ ويىنشىسى لاۋتارو مارتينەس العاش بولىپ ەسەپ اشتى. ەكىنشى تايمدا «قايرات» ويىنشىسى وفري ارادتىڭ باسىمەن سوققان دوبىنىڭ ارقاسىندا ەسەپتى تەڭەستى – 1:1.
«سول ساتتە «سان-سيرودا» 1700 قازاقستاندىق جانكۇيەردىڭ قۋانىشىن سوزبەن جەتكىزۋ قيىن بولدى», دەپ جازادى پورتال.
كەيىن ماتچ تاعدىرىن كارلوس اۋگۋستونىڭ ءدال سوققىسى شەشتى – 2:1. كيۆۋ ماركۋس تيۋرامدى الاڭعا شىعارعانىمەن, «قايرات» سوڭعى مينۋتتارعا دەيىن دەس بەرمەدى.
«ەڭ باستىسى «ينتەر» كوشباسشىلىقتى ساقتاپ قالدى, ال «قايرات» ەۋروپانىڭ قۇرمەتىنە بولەندى», دەپ تۇيىندەدى Gazzetta.it باسىلىمى.
وسىلايشا, يتاليالىق باق الماتىلىق كلۋبتىڭ ويىن مانەرىن, جىگەرى مەن كاسىبي دەڭگەيىن جوعارى باعالاپ, «قايراتتىڭ» ناعىز قايرات كورسەتكەنىن اتاپ ءوتتى.
