ونىڭ ايتۋىنشا, بانك سەكتورى بۇگىندە ەكونوميكانىڭ قوزعاۋشى كۇشى بولۋدىڭ ورنىنا كەي جاعدايدا قوعام سەنىمىنە سەلكەۋ ءتۇسىرىپ وتىر.
«ازاماتتاردىڭ كەلىسىمىنسىز نەسيە راسىمدەۋگە بايلانىستى ونلاين-الاياقتىق بۇگىندە كۇردەلى ماسەلەگە اينالدى. كەيبىر جاعدايلاردا بانكتەر ءوز كليەنتتەرىنىڭ جەكە دەرەكتەرىنىڭ ساتىلۋى مەن تارالۋىنا جاناما تۇردە سەبەپكەر بولىپ وتىر», دەدى ول.
ەلنۇر بەيسەمباەۆ مەملەكەت باسشىسىنىڭ باستاماسىمەن قولعا الىنعان بانك زاڭناماسىن رەفورمالاۋ ەسكى نورمالاردى جاڭارتۋمەن شەكتەلمەي, سالانىڭ دامۋ فيلوسوفياسىن تۇبەگەيلى وزگەرتۋگە باعىتتالۋى ءتيىس ەكەنىن ايتتى. ونىڭ ايتۋىنشا, سوڭعى جىلدارى بانكتەردىڭ پايداسى ەسەلەپ ارتقانىمەن, بۇل كورسەتكىش ناقتى سەكتوردى قارجىلاندىرۋعا اسەر ەتپەي وتىر.
«ەكونوميكانىڭ ناقتى سەكتورىنا سالىنعان جالپى ينۆەستيتسياداعى بانك نەسيەلەرىنىڭ ۇلەسى سوڭعى ون جىلدا 9 پايىزدان 3,5 پايىزعا دەيىن تومەندەگەن. بيزنەستى دامىتۋعا باعىتتالعان ينۆەستيتسيالار كوبىنە مەملەكەتتىك باعدارلامالار مەن كومپانيالاردىڭ مەنشىكتى قاراجاتى ەسەبىنەن جۇزەگە اسىپ جاتىر», دەدى دەپۋتات.
سونداي-اق ول بانكتەردىڭ الەۋمەتتىك جاۋاپكەرشىلىگى مەن اشىقتىعىن ارتتىرۋ قاجەتتىگىن اتاپ ءوتتى.
ء«بىز بيۋدجەت قاراجاتىنىڭ تولىق قايتارىلۋىن, بانك وپەراتسيالارىنىڭ اشىقتىعىن, باسەكەلەستىك ورتانى دامىتۋدى جانە رۇقساتسىز جاسالعان ترانزاكتسيالار ءۇشىن جاۋاپكەرشىلىكتى كۇشەيتۋدى قامتاماسىز ەتۋىمىز كەرەك», دەدى ەلنۇر بەيسەمباەۆ.
دەپۋتات زاڭ جوباسىندا بانكتەردى بيۋدجەت ەسەبىنەن قۇتقارۋ تاجىريبەسىنىڭ ورنىنا الدىن الا ساۋىقتىرۋ تەتىگى ەنگىزىلىپ وتىرعانىنا نازار اۋداردى. بۇل تاسىلدە نەگىزگى جاۋاپكەرشىلىك سالىق تولەۋشىلەرگە ەمەس, بانكتەردىڭ اكتسيونەرلەرىنە جۇكتەلمەك.
«پرينتسيپ ايقىن: اكتسيونەرلەردىڭ جاۋاپكەرشىلىگى مەن قاراجاتتى بيۋدجەتكە قايتارۋ قامتاماسىز ەتىلمەيىنشە, قولداۋ كورسەتىلمەيدى», دەپ تۇيىندەدى ول.
