استانادا جۇمىسسىزدىققا جول جوق

استانا قالاسىنىڭ اكىمى ادىلبەك جاقسىبەكوۆ وتكىزگەن كەزەكتى اپپاراتتىق جينالىس مەملەكەت باسشىسىنىڭ وتكەن اپتادا ۇكىمەتتىڭ كەڭەيتىلگەن وتىرىسى بارىسىندا كۇن تارتىبىنە قويعان تاپسىرمالارىن ورىنداۋ ماسەلەسىنە ارنالدى. سونىمەن بىرگە, وتىرىستا قالالىق كوممۋنالدىق قىزمەت, كولىك جۇيەسى مەن دەنساۋلىق ساقتاۋ مەكەمەلەرىنىڭ جۇمىستارى جان-جاقتى تالقىلاندى. قازاقستان ۇكىمەتىنىڭ كەڭەيتىلگەن وتىرىسىندا ەلباسى نۇرسۇلتان نازارباەۆ «جۇمىس ادامى ءۇشىن ەڭ باس­تىسى – ءوز جۇمىس ورنىن ساقتاپ قالۋ. ادام ءۇشىن, ونىڭ وتباسى ءۇشىن بۇل بارىنشا ماڭىزدى», دەپ اتاپ كورسەتتى. وسىعان وراي قالالىق جينالىستا ءا.جاقسىبەكوۆ استانالىقتاردىڭ جاقسى تۇرمىسى جانە ەلوردانىڭ قارقىندى دامۋى ءۇشىن مەملەكەت باسشىسىنىڭ قويعان تالاپتارى مەن تاپسىرمالارىن ورىنداۋدىڭ ماڭىزدىلىعىن اتاپ ءوتتى. – الدىمىزدا تۇرعان باستى تالاپ – ول ەلوردانىڭ ەكونوميكالىق ءوسىمىن ساقتاپ قالۋ جانە تۇرعىنداردى الەۋمەتتىك جاعىنان قولداۋدى كۇشەيتۋ. سوندىقتان بيۋدجەتتىك قارجىنى ءتيىمدى پايدالانۋ جانە مەملەكەتتىك ورگانداردىڭ ناتيجەلى جۇمىس جاساۋى ءۇشىن بيۋدجەتتى وڭتايلاندىرۋ بويىنشا تەز ارادا ۇسىنىستار ەنگىزۋدى تاپسىرامىن. بۇل ارادا جۇمىس ىستەپ جاتقان جوبالاردى يگەرۋ ىسىنە باسىمدىلىق بەرىلۋى كەرەك, – دەدى قالا اكىمى. اپپاراتتىق جينالىستا باسا ءمان بەرىلگەن ماسەلە – جۇمىسسىزدىقتى جويۋ. ءا.جاقسىبەكوۆ بارلىق قالالىق قىزمەت تۇرلەرىنە, ەلىمىزدە ەڭ تومەنگى كورسەتكىشتەرگە يە بولىپ وتىرعان ەلورداداعى جۇمىسسىزدىقتىڭ تەز ارادا الدىن الۋعا تاپسىرما بەردى. ول ءۇشىن قالا باسشىسى استانا قالاسى جۇمىسپەن قامتۋ جانە الەۋمەتتىك باعدارلامالار باسقارماسىنا ارنايى جوبا ازىرلەپ, بۇقارالىق اقپارات قۇرالدارىمەن تىعىز قارىم-قاتىناس ورناتۋدى تاپسىردى. قالالىق باسقارمالاردىڭ جۇمىس دەڭگەيىن ايتا كەلە, ءا.جاقسىبەكوۆ ەلوردانىڭ كولىك لوگيستيكاسىنداعى جۇيەلى جۇمىستاردىڭ جوقتىعىن, قالا تۇرعىندارىن اقپاراتتاندىرۋ ءىسىنىڭ ساپاسىزدىعىن سىنعا الدى. ماسەلەن, قوعامدىق كولىكتەردەگى جولاقىسىنىڭ قالاي قالىپتاساتىنى جايىن­دا تۇتىنۋشىلاردىڭ مۇلدە بەيحابار ەكەنى ايتىلدى. وسىعان بايلانىستى ءتيىستى ورىندارعا جۇرتشىلىق اراسىندا جان-جاقتى تۇسىنىك جۇمىستارىن جۇرگىزۋ مىندەتى تاپسىرىلدى. سۋ تاسقىنىنا قارسى شارالار مەن قالانى قاردان تازالاۋ جۇمىستارى دا ءسوز بولدى. – كوكتەمگى سۋ تاسقىنىنا قارسى شارالار بەلگىلەنگەن ۋاقىت بويىنشا جۇرگىزىلىپ جاتقانىنا قاراماستان, جەكە سەكتور اۋماعىنان قاردى شىعارۋعا بار كۇشتى جۇمساۋ كەرەك, اسىرەسە, جىلدا سۋ باسۋ قاۋپى تونەتىن اۋدانداردى باستى نازارعا الۋ كەرەك. اۋلالاردى تازارتۋعا كوپ كوڭىل ءبولۋ قاجەت. يندۋستريالىق پارك پەن جەو-2 اۋماقتارىندا سۋدىڭ كەدەرگىسىز, اعۋىن قامتاماسىز ەتۋ ءۇشىن ەسىل, اقبۇلاق, سارىبۇلاق وزەندەرىنىڭ ارنالارىن تازالاۋ كەرەك, – دەدى ەلوردا اكىمى. جيىن سوڭىندا اۋداندىق اكىمدىكتەرگە شاعىن جانە ورتا كاسىپكەرلىك سۋبەكتىلەرىمەن اتقارىلاتىن ءدامحانا, شاشتاراز, دۇكەن اۋماقتارىن سانيتارلىق تازالاۋ جۇمىستارىن مۇقيات قاداعالاۋ تاپسىرىلدى. دەنساۋلىق باسقارماسىنا تۇرعىندارعا مەديتسينالىق قىزمەت كورسەتۋدىڭ ساپاسىن ارتتىرۋ بويىنشا جۇمىستار جۇرگىزۋ مىندەتى جۇكتەلدى. جىلقىباي جاعىپار ۇلى, «ەگەمەن قازاقستان».