«MoonAI»
بىلتىر OpenAI «GPT-4o» مودەلىن تانىستىرعاننان كەيىن, جاساندى ينتەللەكتىنى ءىس جۇزىندە قولدانىپ كورگەن اسحات ادحاموۆ بۇل تەحنولوگيانىڭ الەمدى تۇبەگەيلى وزگەرتەتىنىنە كوزى جەتكەن. سول كەزەڭدە تۋرلاردى ۇيىمداستىرۋمەن اينالىسىپ جۇرگەن ول, كوپتەپ تۇسەتىن وتىنىشتەردى جەدەل وڭدەۋ مۇمكىن ەمەستىگىن بايقايدى. وسى ماسەلەنى شەشۋ ماقساتىندا اسحات تاۋلىك بويى جۇمىس ىستەيتىن, سۇرانىستارعا اۆتوماتتى تۇردە جاۋاپ بەرىپ, قاجەتتى وتىنىشتەردى ىرىكتەي الاتىن جي-اگەنت جاسايدى. كەيىن ءدال سونداي شەشىمدى ول باسقا كومپانيالارعا دا ۇسىنىپ, جاقسى ناتيجە العاننان سوڭ 2024 جىلدىڭ ورتاسىندا «MoonAI» جوباسىنا تولىقتاي كىرىسكەن.
اسحاتتىڭ ايتۋىنشا, بيزنەستەگى ەڭ وزەكتى ماسەلەنىڭ ءبىرى – كليەنت وتىنىشتەرىنىڭ جاۋاپسىز قالۋى.
– باستاپقىدا ءبىز بارلىق بيزنەسكە ءتان ۇلكەن ماسەلەنى, ياعني وتىنىشتەردىڭ جاۋاپسىز قالۋى, سونىڭ سالدارىنان
كليەنت جوعالتۋ ماسەلەسىن شەشۋگە كىرىستىك. مىسالى, ءبىزدىڭ تاپسىرىس بەرۋشىلەردىڭ ءبىرى مەككەگە قاجىلىق ۇيىمداستىراتىن كومپانيا بولاتىن. كەيىن بەلگىلى بولعانداي, ولارعا وتىنىشتەردىڭ كوپ بولىگى تاڭعى ساعات 3-4 شاماسىندا تۇسەدى ەكەن. ءدال سول كەزدە ادامداردىڭ مەككەگە بارۋ نيەتى ويانادى. ەگەر وتىنىشكە سول ساتتە جاۋاپ بەرمەسە, كۇندىز ادام ويىن وزگەرتىپ نەمەسە ۇمىتىپ كەتۋى مۇمكىن. كوپشىلىك: «ماعان تەز جاۋاپ بەردى, دەمەك بۇل كومپانياعا سەنۋگە بولادى» دەپ ويلايدى, – دەيدى جوبا جەتەكشىسى.
دەگەنمەن مۇنداي فۋنكتسيالاردى ۇسىناتىن بوتتار بۇگىندە كوپ. بىراق «MoonAI» اگەنتتەرىنىڭ باستى ەرەكشەلىگى – تەرەڭ ينتەگراتسيا. اسحاتتىڭ سوزىنە قاراعاندا, وزگە كومپانيالاردىڭ شەشىمدەرى تەست كەزىندە تاماشا كورىنگەنىمەن, شىنايى ومىردە دۇرىس ناتيجە بەرمەيدى. سەبەبى ادامدار ءارتۇرلى جازادى, ياعني ديالەكت قولدانادى, قاتە جىبەرەدى, اۋديو نەمەسە فايل جۇكتەيدى, بىرنەشە ءتىلدى ارالاستىرادى. جي مۇندايدا شاتاسىپ, قاراپايىم سۇراقتارعا جاۋاپ بەرە الماي قالادى.
وسى كۇنگە دەيىن «MoonAI»-مەن 160-قا جۋىق كومپانيا جۇمىس ىستەپ ۇلگەرگەن. قازىرگى ۋاقىتتا كوماندادا 19 مامان بار.
«Vetra AI»
جاساندى ينتەللەكت نارىعىندا جۇمىس ونىمدىلىگىن ارتتىرۋعا ارنالعان شەشىمدەر كۇن سايىن كوبەيىپ كەلەدى. سولاردىڭ ىشىندە جاس ستارتاپەر دامير ىسقاقوۆ قۇرعان «Vetra AI» ەرەكشە كوزگە ءتۇسىپ وتىر. بار بولعانى 18 جاستاعى دامير وپەراتورلىق تاپسىرمالاردى اۆتوماتتاندىراتىن جۇيە جاساپ, «Google» مەن «OpenAI»-دان 200 مىڭ دوللاردان استام گرانت ۇتىپ الدى.
«Vetra AI» – حابارلامالاردى, فايلداردى جانە داۋىستىق جازبالاردى اۆتوماتتى تۇردە تاپسىرماعا, كەزدەسۋگە جانە ەسكەرتپەگە اينالدىرىپ, كۇنتىزبەمەن سينحروندايتىن جاساندى ينتەللەكت نەگىزىندەگى كومەكشى.
جوبا اۆتورىنىڭ ايتۋىنشا, قازىرگى تاڭدا نەگىزگى قيىندىق – اقپاراتتىڭ تىم كوپتىگى.
– بۇل يدەيا بيىل ناۋرىز ايىندا ءوز باسىمنان وتكەن قيىندىقتان تۋدى. كۇن سايىن جينالىپ قالاتىن تاپسىرمالار, دەدلايندار, حات-حابارلار, Zoom كەزدەسۋلەر, سىلتەمەلەر مەن داۋىستىق حابارلامالار كوبەيگەنى سونشالىق, جوسپار قۇرۋدىڭ وزىنە ءبىراز ۋاقىت كەتەتىن بولدى. سول كەزدە وسىعان ناقتى قانشا ۋاقىتىم جۇمسالاتىنىن ەسەپتەپ كوردىم دە, ءوزىم تاڭعالدىم. اپتاسىنا 5-7 ساعات تەك جوسپارلاۋعا كەتەدى ەكەن. ال مەنەدجەرلەردە بۇل كورسەتكىش ءتىپتى جۇمىس ۋاقىتىنىڭ 20%-ىنا دەيىن بارادى. وسىنى كورگەن سوڭ, بۇل ۇدەرىستى اۆتوماتتاندىرۋعا بولاتىنىن ءتۇسىندىم. ءسويتىپ, تۇسەتىن اقپاراتتى ءوزى تالداپ, رەتتەپ وتىراتىن جاساندى ينتەللەكتىگە نەگىزدەلگەن كومەكشى جاساۋ يدەياسى پايدا بولدى, – دەيدى د.ىسقاقوۆ.
دامير ستارتاپتى Telegram ارقىلى ىسكە قوسقان. ويتكەنى كوپتەگەن قولدانۋشىعا بولەك قوسىمشانى جۇكتەۋ ىڭعايسىز, ال مەسسەندجەر – كۇندەلىكتى قولداناتىن قۇرال.
بۇگىندە ستارتاپتىڭ العاشقى قولدانۋشىلارى – فريلانسەرلەر, ستۋدەنتتەر جانە شاعىن بيزنەس وكىلدەرى. كومپانيا ايىنا 15 دوللارلىق جازىلىم ۇسىنادى. كوماندا جاقىن ۋاقىتتا ۆەب-نۇسقاسىن ىسكە قوسىپ, حالىقارالىق نارىققا شىعۋدى جوسپارلاپ وتىر.
