پالاتا سپيكەرى سۇحباتتاسۋشىنى كەڭسە باسشىسى بولىپ تاعايىندالۋىمەن جانە اتالعان قىزمەتكە رەسمي تۇردە كىرىسۋىمەن قۇتتىقتادى. سونداي-اق ول قاۋىپسىزدىك پەن ىنتىماقتاستىققا قاتىستى ماڭىزدى ماسەلەلەر بويىنشا شەشىم قابىلداۋدا ۇيىم شىعىس پەن باتىس اراسىن بايلانىستىراتىن «كوپىر» رەتىندە ۇلكەن الەۋەتكە يە ەكەنىنە نازار اۋداردى. سەنات توراعاسى قازاقستان ەقىۇ-مەن جانە ونىڭ ينستيتۋتتارىمەن ناتيجەلى سەرىكتەستىكتى ءاردايىم جوعارى باعالايتىنىن دا اتاپ ءوتتى.
«قازاقستان پارلامەنتىنىڭ دەپۋتاتتارى ەقىۇ پارلامەنتتىك اسسامبلەياسىنىڭ سەسسيالارىنا, ونىڭ كوميتەتتەرىنىڭ جۇمىسىنا جانە بايقاۋ ميسسيالارىنا بەلسەندى قاتىسىپ كەلەدى. ءبىز ەقىۇ-نىڭ استاناداعى باعدارلامالار كەڭسەسىمەن دە ناتيجەلى جۇمىس ىستەيمىز. ءبىزدىڭ سەرىكتەستىگىمىز استانا دەكلاراتسياسىندا بەكىتىلگەن قاۋىپسىز قوعامداستىق قۇرۋدى كوزدەيتىن ورتاق ۇستانىمعا تابان تىرەيدى», دەپ م.اشىمباەۆ قازاقستان ەقىۇ-مەن بارلىق باعىتتا ءوزارا ىنتىماقتاستىقتى ءارى قاراي دامىتۋعا مۇددەلى ەكەنىن تىلگە تيەك ەتتى.
سونىمەن قاتار سەنات توراعاسى مەملەكەت باسشىسىنىڭ باستاماسىمەن ەلىمىزدە جۇرگىزىلىپ جاتقان رەفورمالاردىڭ ىسكە اسىرىلۋ بارىسىنا توقتالدى. م.اشىمباەۆ اتاپ وتكەندەي, وزگەرىستەر ادىلەتتى قازاقستان تۇجىرىمداماسىن جۇزەگە اسىرۋعا ارنالعان. كەزدەسۋدە پالاتانىڭ زاڭ ۇستەمدىگىن قامتاماسىز ەتۋ, ازاماتتاردىڭ قۇقىقتارىن قورعاۋ, ينكليۋزيا, دەموكراتيالاندىرۋ جانە ورنىقتى دامۋ ماقساتتارىنا قول جەتكىزۋ سالالارىن قامتيتىن زاڭنامالىق قىزمەتىنە دە باسا ءمان بەرىلدى.
سۇحبات بارىسىندا تاراپتار پارلامەنتارالىق بايلانىستاردى كەڭەيتۋدىڭ باسىم باعىتتارىن بەلگىلەپ, بىرلەسكەن جوبالاردى ىسكە اسىرۋ جونىندە پىكىر الماستى.
ءوز كەزەگىندە ا.روگوۆ قازاقستان مەن ەقىۇ ىنتىماقتاستىعىن ودان ءارى نىعايتۋعا مۇددەلى جانە جوسپارلانعان جوبالاردى بىرلەسىپ ىسكە اسىرۋعا دايىن ەكەنىن جەتكىزدى. تاراپتار قازاقستان پارلامەنتى مەن ەقىۇ باعدارلامالار كەڭسەسىنىڭ ءوزارا ءىس-قيمىل ناتيجەلەرىن دە تالقىلادى. سونداي-اق كەڭسە باسشىسى ترانسشەكارالىق سىن-قاتەرلەرگە قارسى كۇرەس, قورشاعان ورتانى قورعاۋ, ادامي ولشەمدەردى كۇشەيتۋ جانە ورنىقتى دامۋ ماقساتتارىنىڭ كۇن ءتارتىبى سالاسىنداعى ىنتىماقتاستىقتى ودان ءارى نىعايتۋ ماسەلەلەرى تۋرالى ايتتى.
