دميتري بالاندين ءجۇزۋ بۇقارالىق سپورتتى دامىتۋ مەن حالىقتىڭ دەنساۋلىعىن نىعايتۋدىڭ نەگىزگى باعىتتارىنىڭ ءبىرى رەتىندە قاراستىرىلاتىنىن اتاپ ءوتتى. ونىڭ ايتۋىنشا, ءجۇزۋدى ۇيرەتۋ – سۋداعى جازاتايىم وقيعالاردىڭ الدىن الۋدا دا ماڭىزدى ءرول اتقارادى.
- فەدەراتسيا ءجۇزۋدى بۇقارالىق سپورتتى دامىتۋ, حالىقتىڭ دەنساۋلىعىن نىعايتۋ جانە سۋداعى قايعىلى جاعدايلاردىڭ الدىن الۋ ماقساتتارىن بىرىكتىرەتىن ستراتەگيالىق ماڭىزدى باعىت رەتىندە قاراستىرادى, — دەدى بالاندين.
ول دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سۇيەنە وتىرىپ, 2024 جىلى الەم بويىنشا 236 مىڭنان استام ادامنىڭ سۋعا باتىپ قازا تاپقانىن, ونىڭ ىشىندە 82 مىڭى 1–14 جاس ارالىعىنداعى بالالار ەكەنىن اتاپ ءوتتى.
- بۇل كورسەتكىشتەر حالىقتى ءجۇزۋدىڭ قاراپايىم داعدىلارى مەن سۋدا قاۋىپسىز ءجۇرىس-تۇرىس ەرەجەلەرىنە ۇيرەتۋدىڭ قانشالىقتى ماڭىزدى ەكەنىن كورسەتەدى, — دەدى فەدەراتسيانىڭ باس حاتشىسى.
دميتري ءبالانديننىڭ ايتۋىنشا, ءبىلىم مينيسترلىگىمەن بىرلەسىپ ءجۇزۋ ساباقتارىن دەنە شىنىقتىرۋ ءپانى اياسىندا مەكتەپ باعدارلاماسىنا ەنگىزۋ جۇمىستارى جۇرگىزىلىپ جاتىر.
ءبالانديننىڭ ايتۋىنشا, بۇل باستاما حالىقارالىق تاجىريبەگە نەگىزدەلگەن.
- اتالعان باستاما اقش, اۋستراليا جانە ۆەنگريا سياقتى ەلدەردىڭ ۇلگىسىمەن جۇزەگە اسىرىلادى. بۇل مەملەكەتتەردە بالالاردى مەكتەپ جۇيەسىندە جۇزۋگە ۇيرەتۋ كوپ جىلدان بەرى ءساتتى ەنگىزىلىپ كەلەدى, — دەپ قوسا كەتتى بالاندين.
جوبا پيلوتتىق فورماتتا 2026 جىلى الماتى مەن استانا قالالارىندا ىسكە قوسىلىپ, كەيىن بۇكىل ەل بويىنشا كەزەڭ-كەزەڭىمەن ەنگىزىلمەك.
