بەس كەزەڭنەن 100-دەن اسا عانا كانديدات وتكەن. ولار مەملەكەتتىك سالانى دامىتۋعا قاتىستى جوبالارىن تانىستىردى. الايدا سوڭعى ىرىكتەۋدەن تەك 50 مامان سۋىرىلىپ شىققان. جاستاردىڭ اراسىندا ءبىلىم ماگيسترلەرى, بولاشاق باعدارلاماسىنىڭ ستيپەنديانتتارى مەن مەملەكەتتىك باسقارۋ اكادەمياسىنىڭ تۇلەكتەرى بار.
بيىلعى ءتورتىنشى ىرىكتەۋدەگى باستى جاڭاشىلدىق مەملەكەتتىك اپپارات ءۇشىن اسا سۇرانىسقا يە سالالىق باعىتتار بويىنشا رەزەرۆتى قالىپتاستىرۋ بولدى. ياعني كانديداتتار بەلگىلەنگەن كۆوتالارعا سايكەس قابىلداندى.
ينفوگرافيكانى جاساعان – زاۋرەش سماعۇل, «ەQ»
وسىلايشا, «ينفراقۇرىلىمدى, ونەركاسىپتى دامىتۋ جانە ساۋدا ساياساتى» باعىتى بويىنشا – 8, «اگروونەركاسىپتىك كەشەن جانە قورشاعان ورتانى قورعاۋ» باعىتى بويىنشا – 9, «سىرتقى ساياسات جانە ينۆەستيتسيالار» باعىتى بويىنشا – 8, «ەكونوميكالىق جانە قارجىلىق ساياسات» باعىتى بويىنشا – 7, «تسيفرلاندىرۋ» باعىتى بويىنشا – 9, «الەۋمەتتىك ساياسات جانە ازاماتتىق قوعام» باعىتى بويىنشا 9 ازامات ىرىكتەلدى.
سىننان سۇرىنبەي وتكەن جاستار مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقبايمەن كەزدەستى. جيىندا رەزەرۆشىلەردىڭ الداعى جوسپارى, مۇمكىندىگى, باسقارۋ قۇزىرەتىن دامىتۋعا ارنالعان ءبىلىم باعدارلامالارىنا قاتىسۋ ماسەلەلەرى تالقىلاندى.
«پرەزيدەنتتىك جاستار كادرلىق رەزەرۆى – مەملەكەت باسشىسى قاسىم-جومارت توقاەۆتىڭ تىكەلەي باستاماسىمەن جۇزەگە اسىپ جاتقان ەلىمىزدىڭ جاڭا فورماتسياداعى ءبىلىمدى, جاۋاپتى ءارى وتانشىل جاستارىن مەملەكەتتىك باسقارۋ ىسىنە تارتۋعا باعىتتالعان ەرەكشە ستراتەگيالىق ماڭىزعا يە باستاما. بۇعان دەيىن رەزەرۆكە قابىلدانعان 321 جاس ماماننىڭ 80%-ى ءتۇرلى سەكتوردا تابىستى ەڭبەك ەتىپ ءجۇر. ونىڭ ىشىندە 37-ءسى – ساياسي لاۋازىمدا, بەسەۋى – «ا» كورپۋسىندا, 100-ءى – «ب» كورپۋسىندا, تورتەۋى – دەپۋتات, ال 175 ادام باسقا لاۋازىمداردا قىزمەت اتقارىپ جاتىر. رەزەرۆكە قابىلدانۋ – بىردەن جوعارى لاۋازىمعا تاعايىندالۋ دەگەن ءسوز ەمەس. بۇل – جاستارعا مەملەكەتتىك قىزمەت جۇيەسىندە ءوز الەۋەتىن تولىق كورسەتۋگە, ءبىلىمى مەن بىلىكتىلىك دەڭگەيىنە, كاسىبي داعدىسىنا سۇيەنە وتىرىپ ىلگەرىلەۋگە بەرىلگەن مۇمكىندىك», دەيدى د.جازىقباي.
رەزەرۆ مۇشەلەرى باسقارۋشىلىق قۇزىرەتتى دامىتۋعا باعىتتالعان زاماناۋي وقىتۋ باعدارلامالارىنا قول جەتكىزە الادى. ءارى ءۇش جىل ىشىندە ساياسي مەملەكەتتىك قىزمەتتەرگە, «ا» كورپۋسىنىڭ اكىمشىلىك مەملەكەتتىك لاۋازىمدارىنا, سونداي-اق «ب» كورپۋسىنىڭ باسشىلىعى قىزمەتىنە تاعايىندالۋى مۇمكىن.
بيىلعى ىرىكتەلگەن قاتىسۋشىلاردىڭ ورتاشا جاسى – 31. ورتاشا ەڭبەك ءوتىلى – 9 جىل. رەزەرۆشىلەردىڭ 28 پايىزى ايەل بولسا, 72 پايىزى – ەرلەر.
التى كەزەڭنەن ويداعىداي ءوتىپ, رەزەرۆكە ەنگەندەردىڭ قاتارىندا جاسۇلان قۋاندىق بار. بالا كۇنىنەن مەملەكەتتىك قىزمەتكەر بولۋدى ارمانداعان جاس 2019 جىلدان بەرى وسى جوباعا قاتىسىپ, باعىن سىناپ كەلگەن. ءار جىلدارى تەحنيكالىق, كەيدە قۇجاتتىڭ تولىق بولماۋىنا بايلانىستى وتە الماعان. بيىل باعى جانىپ, 50 ۇزدىكتىڭ قاتارىنا ەندى.
«بەسىنشى سىنىپتان باستاپ وزىمە «اكىم بولامىن» دەپ ماقسات قويدىم. سول سەبەپتى ءال-فارابي اتىنداعى قازاق ۇلتتىق ۋنيۆەرسيتەتىنىڭ «مەملەكەتتىك جانە جەرگىلىكتى باسقارۋ» ماماندىعىنا گرانتقا ءتۇسىپ, كەيىن ماگيستراتۋرادا «ىسكەرلىك اكىمشىلەندىرۋ» بويىنشا ءبىلىم الدىم. ىزىنشە دوكتورانتۋراعا مەملەكەتتىك جانە جەرگىلىكتى باسقارۋ ماماندىعىنا تاپسىردىم. وسى 9 جىل بويى جيناعان ءبىلىمىم مەن تاجىريبەم مەملەكەتتىك باسقارۋ سالاسىندا ەڭبەك ەتۋگە باعىتتالدى. ەندى سول ءبىلىمدى ناقتى ىستە كورسەتۋ ۋاقىتى كەلدى دەپ ويلايمىن. ءار كەزەڭ ءوز الدىنا كۇردەلى بولدى. كەي ساتتەردە «وسى جولى وتە الماي قالام با؟» دەگەن ويلار دا مازالادى. بىراق وسى ۋاقىتقا دەيىن ءتۇرلى سالادا جيناعان تاجىريبەم بايقاۋدا ۇلكەن كومەگىن تيگىزدى. قازىرگى ۋاقىتتا قايىرىمدىلىق قورىنىڭ پرەزيدەنتى رەتىندە حالىقپەن تىكەلەي جۇمىس ىستەيمىن. مەنىڭشە, ناعىز مەملەكەتتىك قىزمەتكەردىڭ ءبىر قاسيەتى – حالىقپەن ءتىل تابىسا ءبىلۋ. وسى تاجىريبە مەن قارىم-قابىلەتىم مەملەكەتتىك قىزمەتتە دە ۇلكەن پايداسىن تيگىزەدى دەپ سەنەمىن», دەيدى پرەزيدەنتتىك جاستار كادر رەزەرۆىنىڭ مۇشەسى ج.قۋاندىق.
