ءىس-شاراعا ازەربايجان, بەلارۋس, قازاقستان, قىرعىزستان, رەسەي, تاجىكستان, وزبەكستان قورعانىس ۆەدومستۆولارىنىڭ باسشىلارى جانە تمد قورعانىس مينيسترلەرى كەڭەسىنىڭ حاتشىسى قاتىستى.
ءداستۇر بويىنشا وتىرىس 28 گۆاردياشى-پانفيلوۆشىلار اتىنداعى ساياباقتاعى ماڭگىلىك الاۋعا گۇل شوعىن قويۋ راسىمىنەن باستالدى. اسكەر ۇيىندە قوناقتار اسكەري-تاريحي مۋزەيدىڭ ەكسپوزيتسياسىمەن تانىستى.
وتىرىستى اشا وتىرىپ, قازاقستان قورعانىس ءمينيسترى اۆياتسيا گەنەرال-لەيتەنانتى داۋرەن قوسانوۆ كەزدەسۋ كۇن تارتىبىندەگى وزەكتى ماسەلەلەر بويىنشا ءوزارا ءىس-قيمىلدى ودان ءارى نىعايتۋعا جانە سىندارلى ديالوگتى جالعاستىرۋعا مۇمكىندىك بەرەتىنىنە سەنىم ءبىلدىردى.
جيىن بارىسىندا تمد-عا مۇشە مەملەكەتتەردىڭ 2025 جىلعا دەيىنگى اسكەري ىنتىماقتاستىق تۇجىرىمداماسىن ىسكە اسىرۋ ماسەلەلەرى قارالدى.
كەڭەسكە قاتىسۋشىلار ۇلتتىق ارميالاردىڭ جاۋىنگەرلىك قابىلەتىن دامىتۋ مەن نىعايتۋدىڭ نەگىزگى باعىتتارىن تالقىلاپ, اسكەري قىزمەتشىلەردى دايارلاۋ, رادياتسيالىق, حيميالىق جانە بيولوگيالىق قاۋىپسىزدىكتى قامتاماسىز ەتۋ سالالارىنداعى تاجىريبەمەن الماستى. سونداي-اق جەكە قۇرامدى تاربيەلەۋدىڭ ماڭىزدى بولىگى رەتىندە اسكەري-پاتريوتتىق جۇمىستىڭ جانە جاۋىنگەرلەر ەرلىكتەرىن ەستە ساقتاۋدىڭ ماڭىزى اتالىپ ءوتتى.
وتىرىس قورىتىندىسىندا قورعانىس مينيسترلەرى كەڭەستىڭ 2026 جىلعا ارنالعان جۇمىس جوسپارىنا جانە ىنتىماقتاستىقتى ودان ءارى دامىتۋ مەن جەتىلدىرۋگە باعىتتالعان بىرقاتار قۇجاتقا قول قويدى.
