«TAV Airports Holding» باس ديرەكتورى سەركان كاپتان مەن الماتى حالىقارالىق اۋەجايىنىڭ پرەزيدەنتى گوكەر كوسە Horizon كومپانياسىنىڭ 2050 جىلعا دەيىنگى ستراتەگيالىق دامۋ باعدارلاماسىن جۇزەگە اسىرۋ بارىسى تۋرالى باياندادى. قازىر ىشكى رەيستەر تەرمينالىن رەكونسترۋكتسيالاۋ, مۇزدان تازارتاتىن زاماناۋي پلاتفورماسىن قۇرۋ, جاقىن ماڭداعى تۇرعىن ۇيلەردى شۋدان وقشاۋلاۋ جانە باسقا دا جۇمىس جۇرگىزىلىپ جاتىر.
جالپى, تۇجىرىمدامادا نەگىزگى جولاقتى تولىق رەكونسترۋكتسيالاۋ ارقىلى ءۇش ۇشۋ-قونۋ جولاعىنان تۇراتىن جۇيە قۇرۋ, جۇك پەررونىنىڭ قۇرىلىسى, لوگيستيكالىق, قويما كەشەندەرىن, جولاۋشىلارعا ارنالعان زاماناۋي ينفراقۇرىلىمدى سالۋ سىندى تاعى باسقا بىرقاتار جۇمىستى جۇزەگە اسىرۋ كوزدەلگەن. جاڭعىرتۋ جۇمىسى 2050 جىلعا قاراي اۋەجايدىڭ جىل سايىنعى وتكىزۋ قابىلەتىن 55 ملن جولاۋشى, 500 مىڭ توننا جۇككە دەيىن ۇلعايتۋعا مۇمكىندىك بەرەدى. بۇگىندە اۋە ايلاعى جىلىنا 12 ملن-نان استام جولاۋشىعا قىزمەت كورسەتىپ, ەلىمىزدە اۆياتاسىمالداۋ كولەمىنىڭ 70%-ىن قامتاماسىز ەتەدى.
«TAV Airports Holding» باسشىلىعى بۇگىنگە دەيىن 260 ملن دوللار ينۆەستيتسيالانعانىن حابارلادى, سونداي-اق جوبانىڭ بارلىق كەزەڭىنىڭ جەدەل ورىندالۋى ءۇشىن اۋەجاي پايداسىن ودان ءارى قايتا ينۆەستيتسيالاۋعا دايىن ەكەنىن راستادى.
ولجاس بەكتەنوۆ الماتى قالاسىنىڭ اۋەجايى پرەزيدەنت تاپسىرماسىمەن ەلىمىزدىڭ التى قالاسىندا قۇرىلىپ جاتقان ءبىرتۇتاس ەكوجۇيە تىزبەگىنە كىرەتىنىن اتاپ ءوتتى. جاڭا دەڭگەيدەگى ينفراقۇرىلىمدى قۇرۋ, اۋە ايلاعىنىڭ وتكىزۋ قابىلەتىن ارتتىرۋ ءۇشىن بارلىق جۇمىستى ۋاقتىلى اياقتاۋدىڭ ماڭىزدىلىعىن ايتتى.
نىساننىڭ قولجەتىمدىلىگى ماسەلەلەرىن شەشۋ, ازاماتتارعا قولايلى بولۋىن قامتاماسىز ەتۋ ءۇشىن اۋەجاي اۋماعىن اينالىپ وتەتىن, قالالىق اۆتوماگيسترالدى, ۇلكەن الماتى اينالما اۆتوجولىن, جۇك كەشەنىن, اۋەجاي ماڭىندا اينالما جول سالۋ ماسەلەلەرى قارالدى. اۆياوتىندى جەتكىزۋ مەن ساقتاۋدىڭ تۇراقتى جاعدايىن قامتاماسىز ەتۋگە نازار اۋدارىلدى.
جيىن قورىتىندىسىندا پرەمەر-مينيستر سالالىق مينيسترلىكتەر مەن الماتى قالاسى اكىمدىگىنە رەكونسترۋكتسيالاۋ جۇمىسىنىڭ ساپالى ءارى ۋاقتىلى اياقتالۋىن ءجىتى قاداعالاۋدى تاپسىردى.
