ەسكە سالا كەتەيىك, جاڭا 2025–2026 وقۋ جىلىندا 83 وقۋ ورداسى جاڭادان اشىلدى, ونىڭ 57-ءسى «كەلەشەك مەكتەپتەرى» ۇلتتىق جوباسى اياسىندا سالىندى. وسى وقۋ وردالارىنىڭ بارلىعىندا نەگىزگى ماقساتتى جۇزەگە اسىراتىن مىقتى ماماندار جۇمىس ىستەۋى قاجەت. سوندىقتان «كەلەشەك مەكتەپتەرىنىڭ» ماماندارىنا دا ەرەكشە ءمان بەرىلىپ وتىر.
وقۋ-اعارتۋ مينيسترلىگىنىڭ «ورلەۋ» بىلىكتىلىكتى ارتتىرۋ ۇلتتىق ورتالىعى «كەلەشەك مەكتەپتەرى» جوباسى اياسىندا مۇعالىمدەردىڭ كاسىبي قۇزىرەتتىلىگىن ارتتىرۋ بويىنشا جۇيەلى جۇمىس جۇرگىزدى. بۇگىندە «كەلەشەك مەكتەپتەرىنىڭ» 7 مىڭنان استام مۇعالىمى LMS پلاتفورماسى ارقىلى بىلىكتىلىكتى ارتتىرۋ كۋرستارىنان ءوتىپ جاتىر. وندا بازالىق دەڭگەيدەگى 11 ءپان قامتىلعان: باستاۋىش سىنىپ, قازاق, ورىس جانە اعىلشىن تىلدەرى, ماتەماتيكا, ينفورماتيكا, فيزيكا, حيميا, بيولوگيا, گەوگرافيا جانە تاريح.
باعدارلاما پاندىك ءبىلىمدى نەگىزگى جۇمىسىنان قول ۇزبەي جاڭارتۋ, كاسىبي قۇزىرەتتىلىكتى ارتتىرۋ جانە مۇعالىمدەرگە ادىستەمەلىك قولداۋ كورسەتۋگە باعىتتالعان. سونىڭ ىشىندە پاندىك ءبىلىمدى تەرەڭدەتۋ, وقىتۋ ساپاسىن ارتتىرۋ, وقۋشىلارمەن ءتيىمدى قارىم-قاتىناس ورناتۋعا نازار اۋدارىلدى. الداعى ۋاقىتتا دا پەداگوگتەر باسىم باعىتتار بويىنشا وقىتۋمەن قامتىلادى.
«كەلەشەك مەكتەپتەرىن» باسقارۋ تيىمدىلىك قاعيداتى بويىنشا ۇيىمداستىرىلادى. ديرەكتورلاردى تاعايىنداۋ كەزىندە باسىمدىق ء«بىلىم سالاسىنداعى 1000 وزگەرىس كوشباسشىسى» جوباسىنا قاتىسقان ۇمىتكەرلەرگە بەرىلەدى. بۇل جوبا پرەزيدەنتتىك جاستار كادر رەزەرۆىنىڭ ۇلگىسىندە جاسالعان. وندا بولاشاق باسشىلاردى قىزمەتكە تاعايىندالماي تۇرىپ دايارلاۋدى مىندەتتەيتىن حالىقارالىق تاجىريبە نەگىزگە الىنعان. ۇمىتكەرلەر بەس كەزەڭنەن تۇراتىن ىرىكتەۋدەن ءوتىپ, كەشەندى تۇردە وقىتىلادى. بۇعان قوسا, تالىمگەرلەرمەن جۇمىس ىستەپ, تاعىلىمدامادان وتەدى. مۇنداي ءتاسىل سىني ويلايتىن ءارى وزگەرىستەرگە دايىن باسقارۋشىلاردى قالىپتاستىرۋعا جول اشادى.
2023–2024 جىلى كادرلىق رەۆەرۆكە ەنگەن 583 پەداگوگتىڭ 70 پايىزدان استامى كونكۋرسسىز باسشىلىق قىزمەتكە تاعايىندالدى. بيىل تاعى 403 ديرەكتور ورىنباسارى رەزەرۆكە قابىلداندى. سونىڭ ناتيجەسىندە مەكتەپ ديرەكتورلارىنىڭ تاپشىلىعى ءۇش ەسەگە قىسقاردى. اسىرەسە جاڭا فورماتتاعى «كەلەشەك مەكتەپتەرىنە» باسا نازار اۋدارىلىپ وتىر. بۇگىندە ەلىمىز بويىنشا ۇلتتىق جوبا اياسىندا اشىلعان 151 مەكتەپ جۇمىس ىستەيدى. ونىڭ ىشىندە 40 مەكتەپتى ء«بىلىم بەرۋدەگى وزگەرىستەردىڭ 1000 كوشباسشىسى» جوباسىنىڭ جەڭىمپازدارى باسقارادى. وسىلايشا, بۇل ءبىلىم وردالارى جاڭا ستاندارتتاردى, تسيفرلىق تەحنولوگيالاردى جانە تاربيەلىك باعىتتاعى تاجىريبەلەردى ەنگىزەتىن الاڭعا اينالىپ وتىر.
زەينەپ ماحسۇتوۆا,
وقۋ-اعارتۋ مينيسترلىگى ورتا ءبىلىم بەرۋ كوميتەتى توراعاسىنىڭ ورىنباسارى
