اليمەنت, ونى تولەمەگەندەرگە اۆتوكولىك جۇرگىزۋگە رۇقسات جوق

وبلىس ورتالىعىندا اليمەنت تولەۋدەن قاشىپ جۇرگەن 8 اكەنىڭ كولىك جۇرگىزۋ قۇقى شەكتەلدى. بەرەشەگى بار تاعى ءجۇز شاقتى جۇرگىزۋشىنىڭ قۇجاتى پوليتسياعا جولداندى. شىندىعىندا, اليمەنت تولەمەي جۇرگەن ازاماتتاردىڭ باسىم بولىگى جەكە مۇلكى مەن كولىگىن وزگە بىرەۋلەردىڭ اتىنا رەسىمدەيدى ەكەن. سوندىقتان سوت ورىنداۋ­شىلارى ولاردان قارىزدى ءوندىرىپ الا المايدى. ءوز اتىنا رەسىمدەلگەن مۇلكى جوق ازاماتقا ىقپال ەتۋ قيىن. دەمەك, ازاماتتاردىڭ كولىك جۇرگىزۋ قۇقىن شەكتەۋ شاراسىزدىقتان تۋىنداپ وتىرعان ارەكەت كورىنەدى. بورىشكەرلەرگە تيەسىلى جۇرگىزۋشى كۋالىگىنىڭ قولدانىسىن ۋاقىتشا توقتاتا تۇرۋ جونىندە جۇزگە جۋىق ۇسىنىس جىبەرىلگەن ەكەن. ازىرگە ىشكى ىستەر ورگاندارى ونىڭ 8-ءىن عانا قاناعاتتاندىرعان. بۇل 8 ازامات ەندى قاشان قارىزىن وتەگەنشە كولىك جۇرگىزە المايدى. بۇدان وزگە سوت ورىنداۋشىلارى بالاسىنا قارىز اكەلەردىڭ باسقا دا ليتسەنزيالارىنىڭ كۇشىن ۋاقىتشا شەكتەۋ جۇمىستارىن جۇرگىزبەك. ادىلەت دەپارتامەنتىنىڭ مالىمدەۋىنشە, وبلىس بويىنشا اليمەنت تولەۋگە قاتىستى 11 مىڭعا جۋىق ءىس بار. ونىڭ 4 مىڭعا جۋىعى قازىر ورىندالىپ جاتىر. ال مۇلدەم تولەنبەگەن قارىزدىڭ سوماسى 10 ميلليون تەڭگەدەن اسقان. ساتىبالدى ءساۋىرباي, «ەگەمەن قازاقستان». اقتوبە وبلىسى.