سۋرەتتى تۇسىرگەن – ەرلان ومار, «EQ»
«بولەكتاۋ» ەكولوگيالىق باعىتى تابيعاتى كوركەم اۋماق ارقىلى وتەدى. ول كىرەبەرىس قاقپادان باستالىپ, دەمالىس ايماعىنداعى ورىندارعا جەتپەي اياقتالادى. بۇل قاشىقتىقتاعى جول تاۋعا شىعاتىن تۋريستەرگە قاۋىپ ءتوندىرۋى مۇمكىن باعىتتاردىڭ ءبىرى. ەندى اباتتاندىرىلعان مارشرۋت بەلسەندى ساياحاتشىلاردان باستاپ, بالالارى بار وتباسىلارعا دەيىنگى كەلۋشىلەردىڭ كەڭ اۋقىمىنا دا قولجەتىمدى بولدى.
– ەكولوگيالىق, تانىمدىق ءتۋريزمدى دامىتۋ – باستى باسىمدىقتاردىڭ ءبىرى. بۇل سالاعا جەكە سەكتوردىڭ بەلسەندى اتسالىسۋى اسا ماڭىزدى. بۋرابايداعى ەكومارشرۋتتىڭ اباتتاندىرىلۋى – بيزنەستىڭ ۇزاقمەرزىمدى, الەۋمەتتىك ماڭىزدى باستامالارعا ينۆەستيتسيا سالا الاتىنىنىڭ ناقتى ۇلگىسى. بۇل تەك تۋريستىك ينفراقۇرىلىمدى جاقسارتۋمەن شەكتەلمەي, تابيعاتقا دەگەن جاۋاپكەرشىلىكتى دە قالىپتاستىرادى. بيزنەستىڭ مەملەكەتپەن ءتيىمدى ارىپتەستىگى تۇراقتىلىقتى, قولجەتىمدىلىك پەن ساپانى دامىتۋعا ىقپال ەتەدى, – دەپ اتاپ ءوتتى «Kazakh Tourism» ۇك» اق باسقارما توراعاسىنىڭ مىندەتىن اتقارۋشى دانيەل سەرجان ۇلى.
جوباعا Home Credit Bank قارجى ءبولىپ, «بۋراباي» ۇلتتىق پاركىمەن اقمولا وبلىسى اكىمدىگىنىڭ تۋريزم باسقارماسىمەن سەرىكتەسە وتىرىپ جۇزەگە اسىردى. باستاما بانكتىڭ ەلىمىزدەگى قىزمەتىنىڭ 20 جىلدىعىنا ارنالعان اۋقىمدى باعدارلامانىڭ ءبىر بولىگىنە اينالدى.
– بۇل جوبا جاي اباتتاندىرۋ عانا ەمەس, ءبىز زاماناۋي, قاۋىپسىز ءارى ادەمى دەمالىس ورنىن قالىپتاستىرۋدى ماقسات تۇتتىق. مۇندا سەرۋەندەپ كەلۋشىلەردىڭ بولەكتاۋدىڭ بىرەگەي تابيعاتى تۋرالى جاڭا دۇنيەلەردى تانىپ-بىلۋىنە مۇمكىندىك تۋدىرىپ, قورشاعان ورتاعا قامقورلىقتى دا كورسەتكىمىز كەلدى. ءبىزدىڭ كوماندا مەن سەرىكتەستەرىمىز سونشالىقتى ىنتا-ىقىلاسپەن جاساعان ەكومارشرۋتقا ۇلتتىق ساياباقتىڭ قوناقتارى ۇقىپتىلىقپەن قارايدى دەپ سەنەمىز, – دەيدى Home Credit Bank باسقارما توراعاسى كيريل باچۆاروۆ.
باعىت بويىندا بولەكتاۋدىڭ فلوراسى, فاۋناسى, اڭىزدارى تۋرالى اقپاراتتىق ستەندتەر ورناتىلعان. سونىمەن بىرگە قازاق, ورىس, اعىلشىن تىلدەرىندەگى اۋديوگيدتى قولدانۋعا قاجەتتى QR-كودتار قاراستىرىلعان. جولدى اباتتاندىرۋ بارىسىندا ەكولوگيالىق تازا ماتەريالدارعا ەرەكشە ءمان بەرىلگەن. ورتالىق ستەند كۇن ساۋلەسى تۇسكەن كەزدە اۋانى تازارتاتىن يننوۆاتسيالىق فوتوكاتاليتيكالىق جابىنمەن جاسالعان.
جاياۋ سەرۋەندەيتىن تۋريستەر ءۇشىن ەكولوگيالىق جولدىڭ اشىلۋى ۇلكەن ماڭىزعا يە. العاشقى كەلۋشىلەر مارشرۋتتى ءجۇرىپ ءوتىپ, اۋديوگيدتى سىناپ كورىپ, كۆەست تاپسىرمالارىن باعالاۋعا مۇمكىندىك الدى.
اقمولا وبلىسى
