كەشە پرەمەر-ءمينيستردىڭ ورىنباسارى ب. ساپارباەۆ قىزىلشاعا قارسى ەكپە جۇمىستارىن, سونىمەن قاتار اقمولا وبلىسىنىڭ كالاچي اۋىلىنداعى, باتىس قازاقستان وبلىسىنىڭ بەرەزوۆكا اۋىلىنداعى جاعدايلاردى تالقىلاۋ بويىنشا ءماجىلىس وتكىزدى, دەپ حابارلادى پرەمەر-ءمينيستردىڭ ءباسپاسوز قىزمەتى.
ماجىلىسكە ورتالىق, جەرگىلىكتى ورگانداردىڭ جانە عىلىمي مەكەمەلەردىڭ باسشىلارى قاتىستى.
ءماجىلىس سوڭىندا ب.ساپارباەۆ ناقتى بىرقاتار تاپسىرمالار بەردى.
اتاپ ايتقاندا, وسى جىلعى قازان ايىنان كەيىن ايقىندالعان مەرزىمدە مۇددەلى مەملەكەتتىك ورگاندارعا قىزىلشاعا قارسى قوسىمشا ەكپە جاسالماي تۇرىپ, ءبىر اي بۇرىن يممۋنيزاتسيا شارالارىن وتكىزۋدى تاپسىردى. وسىعان وراي, ۇستىمىزدەگى جىلعى 1 ماۋسىمعا دەيىن ونى دايىنداۋ بويىنشا ءىس-شارالار جوسپارىن ازىرلەپ, وسىدان بۇرىن جۇرگىزىلگەن ەكپەنىڭ قاتەلىكتەرىن جويۋ ماقساتىندا شارالار قابىلداۋ قاجەت.
سونداي-اق, ۆيتسە-پرەمەر الداعى ماۋسىمدا كەشەندى عىلىمي-زەرتتەۋلەر ناتيجەسىنىڭ نەگىزىندە كالاچي اۋىلىنىڭ «ۇيقى» سيندرومىنىڭ پايدا بولۋىنىڭ شىنايى سەبەبىن انىقتاۋدى تاپسىردى. سونىمەن قاتار, اۋىل تۇرعىندارىن وبلىستىڭ باسقا ەلدى مەكەندەرىنە كوشىرۋ جۇمىستارىن جالعاستىرۋ جانە ولارعا قاجەتتى كومەك كورسەتۋ قاجەتتىلىگى ايتىلدى.
سونىمەن بىرگە, پرەمەر-ءمينيستردىڭ ورىنباسارى باتىس قازاقستان وبلىسىنىڭ اكىمدىگىنە بەرەزوۆكا اۋىلىندا تۇراقتى ەكولوگيالىق مونيتورينگتىڭ قامتاماسىز ەتىلۋىن جانە اۋىل تۇرعىندارىن كوشىرۋ, ولاردى جۇمىسپەن قامتۋ ماسەلەلەرىن پىسىقتاۋدى تاپسىردى.
ودان باسقا, ب. ساپارباەۆ قاراشىعاناق مۇناي-گاز كوندەنساتى كەنىندە سانيتارلىق-قورعاۋ ايماعىن كەڭەيتۋ قاجەتتىگىن اتاپ ايتتى. اتالعان جوبا ۇكىمەتكە 30 مامىرعا دەيىن ۇسىنىلۋى قاجەت.
