فوتو: pinterest.com
ۇرىلار مۋزەيگە قالاي كىردى؟
مۋزەي جىلىنا توعىز ميلليونعا جۋىق ادام قابىلدايدى. وسىنداي ۇلكەن ءارى قاۋىپسىزدىك دەڭگەيى جوعارى نىساندا مۇنداي وقيعانىڭ بولۋى كوپشىلىكتى تاڭعالدىردى. بۇل وقيعا 19 قازان كۇنى تاڭەرتەڭ, مۋزەي ەسىگى اشىلعان ساتتە ورىن العان. قالا تۇرعىنى موتوتسيكل شلەمىن تاققان كۇدىكتى ادامداردى كورىپ, دەرەۋ حابارلاعان. شامامەن ساعات 9:30 شاماسىندا ولار لۋۆرعا كىرەدى. مادەنيەت ءمينيسترى راشيدا داتي سول كۇنى تاڭەرتەڭ بۇل جايت تۋرالى جەلى ارقىلى حابار تاراتتى. ونىڭ ايتۋىنشا, ادام زارداپ شەكپەگەن.
مينيستر لوران نۋنەس تۇسىندىرگەندەي, قىلمىسكەرلەر فرانسۋا ميتتەران جاعالاۋىنداعى اپوللون گالەرەياسىنىڭ تەرەزەسىن جارىپ كىرگەن. ولار تەرەزەنى كەسۋ ءۇشىن ارنايى قۇرال قولدانعان. وقيعانىڭ ءوزى بار بولعانى جەتى مينۋتقا سوزىلعان. ۇرىلار جۇك كوتەرەتىن تەحنيكانى پايدالانىپ تەرەزەگە كوتەرىلگەن. كەيىن سكۋتەرگە وتىرىپ قاشىپ كەتكەن. ال كوتەرگىش تۇرعان فۋرگون سول جەردە قالدىرىلعان. تەرگەۋ توبىنىڭ ايتۋىنشا, بۇل الدىن الا زەرتتەلىپ دايىندالعان قىلمىس.
Franceinfo دەرەگىنە قاراعاندا, باستاپقىدا ءتورت ادام كەلگەن. ەكى ادام جۇك كوتەرگىشتە بولعان, ەكەۋى سكۋتەرمەن جۇرگەن. ولار قاۋىپسىزدىك ايماعىن بەلگىلەۋ ءۇشىن كونۋستار قويعان. تەرەزەنى كەسىپ, ىشكە ءوتىپ, ەكى ۆيترينانى سىندىرعان. كۇزەتشىگە قوقان لوقى جاسالعان. مۇراجاي قىزمەتكەرلەرى قاۋىپسىز جەرگە بارىپ, ساعات 9:37-دە سيگناليزاتسيا قوسىلعان. ءبىر مينۋتتان كەيىن ۇرىلار وقيعا ورنىنان سكۋتەرمەن جاسىرىنعان.
نە ۇرلاندى؟
فرانتسيانىڭ مادەنيەت مينيسترلىگى مەن ىشكى ىستەر مينيسترلىگىنىڭ ايتۋىنشا, 8 تاريحي اسىل بۇيىم جوعالعان. بۇل بۇيىمداردىڭ اراسىندا پاريج سارايلارىنا تيەسىلى كونە تاجدەر, اسىل تاستارمەن اشەكەيلەنگەن القالار مەن سىرعالار بار. اپوللون گالەرەياسىندا ساقتالعان بۇل بۇيىمدار ەرەكشە قۇندى. ۇرىلار الىپ كەتكەن اسىل بۇيىمدار اراسىنان ءبىر ءتاج كەيىن مۋزەيگە جاقىن ماڭنان تابىلعان. ونىڭ ۇستىندە 1354 بريلليانت جانە 56 يزۋمرۋد بار ەكەنى جازىلعان.
ء«بىز ءتورت ادامنىڭ قىلمىس جاساعانىن انىق كورىپ وتىرمىز. ولار كوتەرگىش پلاتفورمانى تەرەزەگە جاقىنداتىپ, كەسىپ كىرگەن. بىزدە كامەرا جازبالارى بار. ولار بۇل وقيعانى مۇقيات جوسپارلاعان. كىمنىڭ ارتىندا تۇرعانى تۋرالى ناقتى نۇسقا جوق. ءتىپتى ەسىرتكى بيزنەسىنە قاتىسى بار توپ بولۋى دا مۇمكىن. ءبىز ەشبىر نۇسقانى جوققا شىعارمايمىز», دەدى پاريج پروكۋرورى لورا بەككو.
توناۋشى توپ تورعا ءتۇستى
پاريج پروكۋرورى لورا بەككو لۋۆر مۋزەيىندەگى ۇرلىق ىسىنە بايلانىستى تەرگەۋ بارىسى تۋرالى مالىمدەمە جاسادى. ونىڭ ايتۋىنشا, بۇل قىلمىس الدىن الا ويلاستىرىلعانىمەن, ونى ۇيىمداستىرعاندار جوعارى دەڭگەيدەگى ۇيىمداسقان قىلمىستىق توپ ەمەس. بۇل تۋرالى «ەۆروپەيسكايا پراۆدا» باسىلىمى جازدى.
لورا بەككو قازىرگى ۋاقىتتا انىقتالعان دەرەكتەر كۇدىكتىلەردىڭ كاسىبي قىلمىستىق توپتارعا ءتان بەلگىلەرى جوق ەكەنىن كورسەتەتىنىن اتاپ ءوتتى.
«بۇل ءىس ەرەكشە بولعانىمەن, كۇدىكتىلەر كۇردەلى وپەراتسيالار جاسايتىن ۇيىمداسقان قىلمىستىق توپتىڭ مۇشەلەرى ەمەس. تەرگەۋ بارىسىندا ءتورت كۇدىكتىنىڭ دە, سونىمەن قاتار ولاردىڭ بىرىمەن جاقىن بايلانىستا بولعان ادامنىڭ دا كاسىبي قىلمىسكەرلەرگە ءتان سيپاتتارى انىقتالمادى», دەدى ول.
پروكۋرور كۇدىكتىلەردىڭ جەرگىلىكتى تۇرعىندار ەكەنىن ايتتى. ونىڭ بولجامىنا سايكەس, ولار ءپاريجدىڭ سولتۇستىگىندەگى سەنا سەن دەني اۋدانىنان بولۋى مۇمكىن. بۇل اۋدان الەۋمەتتىك جاعدايى تومەن ايماق رەتىندە بەلگىلى.
قازىرگى ۋاقىتتا ءتورت كۇدىكتىنىڭ ۇشەۋى ۇستالدى. پروكۋرور لورا بەككو كەم دەگەندە ءبىر ادامنىڭ ءالى بوستاندىقتا جۇرگەنىن راستادى. سونىمەن قاتار ول باسقا قاتىسۋشىلاردىڭ بولۋى مۇمكىن ەكەنىن جوققا شىعارمادى.
