شىعىس قازاقستاندا وبلىستىق سوت توراعاسى تاعايىندالدى

وسكەمەن. 21 ناۋرىز. شىعىس قازاقستان وبلىستىق سوتىندا جاڭا توراعا دوسجان سارمانقۇل ۇلى ءامىروۆتى تانىستىرۋعا ارنالعان سالتاناتتى جيىن ءوتتى. بۇل تۋرالى egemen.kz ءتىلشىسى حابارلادى. جاڭا باسشىنى جوعارعى سوتتىڭ قىلمىستىق ىستەر جونىندەگى قاداعالاۋشى سوت القاسىنىڭ توراعاسى اباي راحمەتۋلين تانىستىردى. شاراعا وبلىس اكىمىنىڭ ورىنباسارى جاقسىلىق ومار, وبلىستىڭ سوت كورپۋسى, وڭىردەگى قۇقىق قورعاۋ جانە مەملەكەتتىك ورگانداردىڭ باسشىلارى قاتىستى. جوعارعى سوتتىڭ قىلمىستىق ىستەر جونىندەگى قاداعالاۋشى سوت القاسىنىڭ توراعاسى ا.راحمەتۋلين ونىڭ ومىربايانىمەن جانە ەڭبەك وتىلىمەن تانىستىردى. دوسجان سارمانقۇل ۇلى ءامىروۆ قاراعاندى وبلىسى تەمىرتاۋ قالالىق سوتىنىڭ توراعاسى, سولتۇستىك قازاقستان وبلىستىق سوتىنىڭ قىلمىستىق ىستەر جونىندەگى القاسىنىڭ توراعاسى, استانا قالاسى قىلمىستىق ىستەر القاسىنىڭ توراعاسى, جامبىل وبلىستىق سوتى اپەللياتسيالىق سوت القاسىنىڭ توراعاسى قىزمەتتەرىن اتقارعان. 2011 جىلدىڭ اقپانىندا قازاقستان رەسپۋبليكاسى پرەزيدەنتىنىڭ جارلىعىمەن ماڭعىستاۋ وبلىستىق سوتىنىڭ توراعاسى قىزمەتىنە تاعايىندالعان. – دوسجان سارمانقۇل ۇلى سوت سالاسىندا كوپجىلدىق ەڭبەگى بار, ءپرينتسيپشىل, ەلىمىزدىڭ سوت جۇيەسىنىڭ بەدەلىن كوتەرۋگە اۋقىمدى ۇلەس قوسقان كانىگى مامان. الداعى ۋاقىتتا دا ادىلدىكتىڭ اق جولىندا ايانباي ەڭبەك ەتەدى دەگەن سەنىمدەمىن, – دەدى ا.راحمەتۋلين. دۋمان اناش. دەرەك: egemen.kz. سۋرەت: شىعىس قازاقستان وبلىستىق سوتىنىڭ ءباسپاسوز قىزمەتى.