كەلەسى جىلى جاسىباي كولىنىڭ جاعالاۋىندا اۋقىمدى اباتتاندىرۋ جۇمىستارى باستالادى. سانيتارلىق-گيگيەنالىق توراپتار, جۋىنۋ كابينالارى مەن كيىم اۋىستىراتىن بولمەلەر, ساۋدا پاۆيلوندارى, ارقالى وتىرعىشتار مەن شاتىرلارى بار دەمالىس ايماقتارى, سونداي-اق بالالار جانە سپورت الاڭدارى ورناتىلادى. بۇل نىسانداردىڭ بارلىعى 3,7 گا اۋماقتا ورنالاسادى. بۇل ەكولوگيالىق تۋريزم تالاپتارىنا ساي زاماناۋي ءارى جايلى دەمالىس ايماعىن قالىپتاستىرۋعا مۇمكىندىك بەرەدى.
ال سابىندىكول كولىنىڭ جاعاجايىنداعى جۇمىستار مەن باقىلاۋ الاڭىنىڭ قۇرىلىسى اياقتالۋعا جاقىن. جاڭارتىلعان جاعاجايدا ارقالى وتىرعىشتار, شاتىرلار, پيرستەر (سونىڭ ىشىندە مۇمكىندىگى شەكتەۋلى ازاماتتارعا دا بەيىمدەلگەن), سانيتارلىق-گيگيەنالىق نىساندار ورناتىلعان. سونداي-اق دەمالىس ايماقتارى, اتكەنشەكتەر, ويىن جانە سپورت الاڭدارى, 80 كولىككە ارنالعان تۇراق ورىندارى قاراستىرىلعان.
- باقىلاۋ الاڭى سابىندىكول كولى مەن ونى قورشاپ تۇرعان تاۋلاردىڭ كەرەمەتتەي كورىنىسى اشىلاتىن بيىكتىكتە ورنالاسقان. مۇندا شاعىن ساۋلەتتىك نىساندار ورناتىلىپ, جاياۋ جۇرگىنشىلەر جولدارى اباتتاندىرىلدى, جارىقتاندىرۋ جۇيەسى مەن تۋريستەرگە ارنالعان فوتو-ايماق جاسالدى. ال باياناۋىل اۋىلىنا كىرەبەرىس جولدا سالىنىپ جاتقان ۆيزيت-ورتالىقتىڭ جالپى اۋدانى 740 شارشى مەتردى قۇرايدى. قۇرىلىس جوسپارلى تۇردە ءجۇرىپ جاتىر, جۇمىستاردى بيىلعى جىلدىڭ جەلتوقسان ايىندا اياقتاۋ جوسپارلانعان. ۆيزيت-ورتالىقتىڭ ىشكى كەڭىستىگى كوپفۋنكتسيونالدى بولماق: كىتاپحانا ايماعىن ءدارىس پەن سەمينار وتكىزۋ زالىنا اينالدىرۋعا بولادى, انا مەن بالا بولمەلەرى, جايلى كوفەحانا, ولكەتانۋ مۇراجايى جانە دەمالىس ورىندارى قاراستىرىلعان. نىساننىڭ قولجەتىمدىلىگىنە باسا نازار اۋدارىلدى - ورتالىق مۇمكىندىگى شەكتەۋلى تۋريستەردىڭ قاجەتتىلىكتەرىنە تولىق بەيىمدەلگەن, - دەپ حابارلادى وبلىس اكىمىنىڭ ءباسپاسوز قىزمەتىنەن.
ۆيزيت-ورتالىقتىڭ تاعى ءبىر باعىتى — ونىڭ تسيفرلىق مازمۇنى. مۇندا باياناۋىل اۋدانىنىڭ كارتاسى بار سەنسورلى ينتەراكتيۆتى تاچ-پانەل, مۋلتيمەديالىق تاقتالار جانە 3D-پروەكتسيالار ورناتىلادى. كەلۋشىلەر ايماقتىڭ تابيعي ەسكەرتكىشتەرىمەن, كيەلى ورىندارىمەن, ارحەولوگيالىق نىساندارىمەن جانە كورنەكتى تۇلعالارىمەن ينتەراكتيۆتى تۇردە تانىسا الادى.
پاۆلودار وبلىسى
