Truth Social جەلىسىندە جازبا جاريالاعان ترامپ نيگەرياداعى حريستياندارعا قارسى جاسالىپ جاتقان قىلمىستارعا الاڭداۋشىلىق ءبىلدىرىپ, اقش بۇل جاعدايدا «بارلىق كومەكتى توقتاتىپ, قاجەت بولعان جاعدايدا يسلامدىق تەرروريستەردى تولىعىمەن جويۋ ءۇشىن ءوز كۇشتەرىن ەنگىزۋى مۇمكىن» ەكەنىن ايتتى. سونداي-اق ول قورعانىس مينيسترلىگىنە اسكەري ءىس-قيمىلدارعا دايىندالۋدى تاپسىرعانىن مالىمدەدى.
پەنتاگون باسشىسى پيت حەگسەت تە ترامپتىڭ مالىمدەمەسىنە ءۇن قاتىپ, X (بۇرىنعى Twitter) الەۋمەتتىك جەلىسىندە: «نيگەريادا دا, باسقا ەلدەردە دە بەيكۇنا حريستيانداردىڭ قىرىلۋى توقتاۋى ءتيىس. قورعانىس مينيسترلىگى ارەكەت ەتۋگە دايىن. ەگەر نيگەريا ۇكىمەتى ءوز ازاماتتارىن قورعاماسا, ءبىز يسلامدىق تەرروريستەردى جويامىز», – دەپ جازدى.
ءوز كەزەگىندە نيگەريا پرەزيدەنتى بولا تينۋبۋ بۇل ايىپتاۋلاردى جوققا شىعاردى. ونىڭ ايتۋىنشا, نيگەريا ءدىني توزىمدىلىك پەن سەنىم بوستاندىعىن باستى قۇندىلىق رەتىندە ۇستانادى.
«نيگەريانى وزگە دىنگە ءتوزىمسىز ەل رەتىندە سيپاتتاۋ – شىندىققا جاناسپايدى. سەنىم بوستاندىعى مەن توزىمدىلىك – ءبىزدىڭ ۇلتتىق بىرەگەيلىگىمىزدىڭ اجىراماس بولىگى», – دەدى تينۋبۋ X جەلىسىندە.
ەسكە سالا كەتسەك, 2025 جىلعى ناۋرىزدا اقش كونگرەسىنىڭ مۇشەسى كريس سميت نيگەريانى ەرەكشە الاڭ تۋدىرعان ەلدەر تىزىمىنە قوسۋدى ۇسىنعان بولاتىن. ال قازان ايىنىڭ باسىندا سەناتور تەد كرۋز بەن وكىلدەر پالاتاسىنىڭ مۇشەسى رايلي مۋر نيگەريا بيلىگىن حريستياندارعا قارسى قىلمىستارعا كوز جۇما قارادى دەپ ايىپتاعان ەدى.
نيگەريانىڭ سولتۇستىگىندە نەگىزىنەن مۇسىلماندار, ال وڭتۇستىگىندە حريستياندار تۇرادى. ەلدىڭ سولتۇستىك-شىعىسىندا 2009 جىلدان بەرى «بوكو حارام» تەررورلىق ۇيىمى ارەكەت ەتۋدە. ونىڭ سالدارىنان 35 مىڭنان استام ادام قازا تاۋىپ, 2 ميلليوننان استام تۇرعىن بوسقىنعا اينالعان. سونىمەن قاتار, ورتالىق ايماقتاردا نەگىزىنەن مۇسىلمان باقتاشىلار مەن حريستيان ديقاندار اراسىندا جەرگە تالاسۋدان تۋىنداعان قاقتىعىستار جيىلەگەن.
