فوتو: اشىق دەرەككوز
ەڭبەك جانە حالىقتى الەۋمەتتىك قورعاۋ مينيسترلىگى مەملەكەتتىك ەڭبەك ينسپەكتسياسى كوميتەتىنىڭ دەرەگىنشە, جىل باسىنان بەرى وندىرىستىك جاراقاتتانۋ كوەففيتسيەنتى (1000 جۇمىسكەرگە شاققانداعى جازاتايىم وقيعالاردىڭ جيىلىگى) 0,13 بولدى. دەسە دە, ەلىمىزدىڭ وندىرىستىك ايماقتارىندا جۇمىسكەرلەردىڭ جاراقاتتانۋى ءالى دە جوعارى. ماسەلەن, قاراعاندى وبلىسىندا – 103, شىعىس قازاقستان وبلىسىندا – 89, پاۆلودار وبلىسىندا – 68, اقتوبە وبلىسىندا – 64, اتىراۋ وبلىسىندا – 48, الماتى قالاسىندا 51 ادام زارداپ شەكتى. ەڭ كوپ زارداپ شەككەندەر تاۋ-كەن مەتاللۋرگيا ونەركاسىبىندە – 17,4 %, قۇرىلىس سالاسىندا – 10,2%.
جازاتايىم وقيعالار نەگىزى-نەن وندىرىستەگى جۇمىستىڭ ءتيىستى دەڭگەيدە ۇيىمداستىرىلماۋى (34,2%), جابىرلەنۋشىنىڭ ورەسكەل ابايسىزدىعى (33,6%), ەڭبەك قاۋىپسىزدىگى مەن ەڭبەكتى قورعاۋ ەرەجەلەرىن بۇزۋ (8,5%), جول قوزعالىسى ەرەجەلەرىن بۇزۋ (7,8%) سالدارىنان بولعان.
ەڭبەكتى قورعاۋعا قاتىستى قۇقىق قورعاۋ ورگاندارىنا 730 ماتەريال جىبەرىلدى, سونىڭ نەگىزىندە 211 قىلمىستىق ءىس قوزعالدى. قاۋىپسىز ەڭبەك جاعدايىن نىعايتۋ مەن وندىرىستىك جاراقاتتانۋدى ازايتۋ – ۇكىمەت پەن ەڭبەك جانە حالىقتى الەۋمەتتىك قورعاۋ مينيسترلىگىنىڭ نەگىزگى مىندەتتەرىنىڭ ءبىرى. بەس جىلدا مەملەكەتتىك ورگاندار مەن جۇمىس بەرۋشىلەردىڭ ەڭبەكتى قورعاۋعا قاتىستى قابىلداعان كەشەندى شارالارىنىڭ ناتيجەسىندە وندىرىستىك جاراقاتتانۋ دەڭگەيى 6,7%-عا تومەندەدى. پروفيلاكتيكا مەن بۇزۋشىلىقتىڭ الدىن الۋ ماقساتىندا 3 262 كاسىپورىن قاۋىپسىزدىك پەن ەڭبەكتى قورعاۋ ستاندارتتارىن ەنگىزدى. 2019 جىلدان بەرى «نولدىك جاراقات – Vision Zero» تۇجىرىمداماسى 610 كاسىپورىندا بەلسەندى جۇمىس اتقارىلىپ كەلەدى.
بۇدان بولەك, «ونلاين ەڭبەك كونسۋلتانتى» ەلەكتروندىق سەرۆيسى ىسكە قوسىلدى. ول جۇمىسكەر مەن جۇمىس بەرۋشىنىڭ اراسىندا قاشىقتىقتان ءوزارا ارەكەتتەسۋدى قامتاماسىز ەتىپ, ەڭبەك زاڭناماسىنىڭ تيىمدىلىگىن ارتتىرۋعا مۇمكىندىك بەرەدى. سەرۆيس جۇمىس بەرۋشىنىڭ ەڭبەكتى قورعاۋ تالاپتارىنىڭ ساقتالۋىن قاراستىرادى. ىسكە قوسىلعالى 50 125 جۇمىس بەرۋشى يگىلىگىن كوردى.
2024–2030 جىلدارعا ارنالعان قاۋىپسىز ەڭبەك تۇجىرىمداماسى نەگىزگى 4 باعىتتى كوزدەيدى. ولار – تاۋەكەلگە باعدارلانعان ءتاسىل نەگىزىندە ەڭبەكتى قورعاۋدىڭ ۇلتتىق جۇيەسىن جاڭعىرتۋ, جۇمىس ورىندارىندا تاۋەكەلدى تومەندەتۋ جونىندەگى شارالاردى ەكونوميكالىق ىنتالاندىرۋ, كاسىبي قۇزىرەتتىلىكتەر مەن عىلىمي الەۋەتتى دامىتۋ, سونداي-اق ەڭبەكتى قورعاۋ سالاسىنداعى باقىلاۋ مەن مونيتورينگتىڭ تيىمدىلىگىن ارتتىرۋ. تۇجىرىمداما وندىرىستىك جاراقاتتانۋ مەن كاسىپتىك سىرقاتتانۋشىلىق دەڭگەيىن تومەندەتۋگە ىقپال ەتەدى.
