بۇل جوبانىڭ اۆتورى – تانىمال مۋزىكانت, ديريجەر ءاليحان ىدىرىسوۆ. وعان بۇل يدەيا قۇرمانعازى اتىنداعى قازاق ۇلتتىق كونسەرۆاتورياسىندا وقىپ جۇرگەندە كەلىپتى. ونەرپازدىڭ العاشقى جوباسى 2014 جىلى «استانا وپەرا» تەاترىندا جول تارتتى. سودان بەرى دارىندى مۋزىكانتتىڭ ءار كونتسەرتى جۇرتشىلىقتىڭ ۇلكەن قولداۋىنا يە بولىپ كەلەدى.
ال ونەر كەشىندە قازاق كينوسىنىڭ التىن قورىنا كىرگەن «گاۋھارتاس», «تاقيالى پەرىشتە» سەكىلدى كوركەم فيلمدەردەگى اۋەندەر وينالدى. بۇل تۋىندىلار تىڭدارمەن جۇرەگىنەن جول تاپقالى قاشان! سوندا دا ونى ءار تىڭداعان سايىن كەرەمەت اسەر الاسىڭ. كينوداعى كەيىپكەرلەر كوز الدىڭىزعا كەلەدى. ولاردىڭ ءار وبرازى كوڭىلگە سونداي ىستىق. سونىمەن قاتار «اعام نەمەسە نەكە», «توقتا, ءتۇن», «رەكەتير», ت.ب. زاماناۋي فيلمدەردىڭ مۋزىكالارى دا كەش كورىگىن قىزدىردى. بارلىق اسەم اۋەندى كامەرالىق وركەستردىڭ سۇيەمەلدەۋىمەن وپەرا ترۋپپاسىنىڭ سوليستەرى ناقىشىنا كەلتىرە شىرقادى. وركەسترگە قازاقستاننىڭ ەڭبەك سىڭىرگەن قايراتكەرى ايدار ءابجاحانوۆ جەتەكشىلىك ەتتى.
وسى فيلمدەر مۋزىكاسىن وركەسترگە ءاليحاننىڭ ءوزى وڭدەگەن. بۇل شىعارمالار كاۆەر نۇسقادا ورىندالدى. سوندىقتان جۇرتشىلىق ونى جاڭا قىرىنان تىڭدادى.
«يدەيا ادامعا ارقالاي كەلەدى. كەيدە كينو كورىپ وتىرعاندا «وسى مۋزىكانى ساحناعا شىعارسام قالاي بولادى؟» نەمەسە «مىنا ءاندى وركەسترلىك وڭدەۋدە جاڭاشا ەستۋگە بولاتىن ەدى» دەگەن ويلار تۋادى. باستىسى, تىڭدارماندار ريزا بولسا دەيمىن. كونتسەرت باعدارلاماسىنا ا.زاتسەپين سەكىلدى ايتۋلى كومپوزيتور-
لاردان باستاپ, زاماناۋي اۆتورلاردىڭ دا تۋىندىلارىن قوستىم. مۇنداعى ماقسات – جاستاردىڭ سۇرانىسىنا جاۋاپ بەرىپ, ولاردى تەاترعا كوبىرەك تارتۋ», دەدى ءا. ىدىرىسوۆ.
ازامات قۇسايىن
