ءىس-شاراعا شىمكەنت قالاسىنىڭ پروكۋرورى عابيت مۇقانوۆ, قالا اكىمىنىڭ ورىنباسارى سارسەن قۇرانبەك, قىرىق ەكى مەملەكەتتىك جانە قۇقىق قورعاۋ ورگاندارىنىڭ وكىلدەرى, سونداي-اق جەكە سوت ورىنداۋشىلار, نوتاريۋستار, ادۆوكاتتار مەن كوممۋنالدىق مەكەمەلەردىڭ وكىلدەرى قاتىستى. بۇعان قوسا, قالا جاستارىنىڭ قاتىسۋىمەن ەرىكتىلەر ۇيىمى دا ءوز قىزمەتىن كورسەتتى.
كەلۋشىلەر جەتەكشى مامانداردان تەگىن قۇقىقتىق كەڭەس الىپ, وزدەرىن تولعاندىرعان ماسەلەلەرگە ناقتى جاۋاپ الدى.
«حالىق زاڭگەرى» جوباسى بۇگىندە حالىقتىڭ قۇقىقتىق ساۋاتتىلىعىن ارتتىرۋ مەن ازاماتتاردى قۇقىقتىق قولداۋدىڭ سۇرانىسقا يە جانە ءتيىمدى الاڭىنا اينالدى. 2016 جىلدان باستاپ رەسپۋبليكا كولەمىندە وتكىزىلىپ كەلە جاتقان بۇل اكتسيا اياسىندا ازاماتتارعا بىلىكتى زاڭگەرلەر مەن مەملەكەتتىك ورگانداردىڭ باسشىلارى تەگىن كەڭەس بەرەدى.
شىمكەنت قالاسىنىڭ پروكۋرورى عابيت مۇقانوۆ ءوز سوزىندە اتاپ ءوتتى.
«ەجەلگى گرەك فيلوسوفى پلاتون ايتقانداي: «كۇشتى مەملەكەت – قورعالعان ازاماتتان باستالادى! سوندىقتان بۇگىن وسىندا بارلىق مەملەكەتتىك جانە قۇقىق قورعاۋ ورگاندارىنىڭ وكىلدەرى ءار ازاماتقا تەگىن ءارى قولجەتىمدى زاڭ كومەگىن كورسەتۋ ءۇشىن ءبىر الاڭدا جينالىپ وتىر» – دەدى قالا پروكۋرورى.
اكتسيا بارىسىندا 1000-نان استام قالا تۇرعىنى وتباسىلىق, ەڭبەك, جەر, ازاماتتىق جانە اكىمشىلىك زاڭناما سالالارى بويىنشا بىلىكتى زاڭگەرلەردەن تەگىن كەڭەس الدى.
سونىمەن قاتار, تۇرعىندارعا قۇقىقتارىن قورعاۋ جولدارى, مەملەكەتتىك ورگاندارعا جۇگىنۋ ءتارتىبى جانە تەگىن زاڭ كومەگىن الۋ تەتىكتەرى ءتۇسىندىرىلدى.
«حالىق زاڭگەرى» رەسپۋبليكالىق اكتسياسى ءوز جۇمىسىن جالعاستىرىپ, ءاربىر ازاماتتىڭ قۇقىقتىق ساۋاتىن ارتتىرۋعا, ادىلدىك پەن زاڭ ۇستەمدىگىن نىعايتۋعا باعىتتالعان باستامالاردى جۇزەگە اسىرا بەرمەك.
