– قازىر ءبىز ديناميكالىق ءارى دەرەكتەرگە نەگىزدەلگەن ەكونوميكالىق جانە الەۋمەتتىك داۋىرگە اياق باستىق. بۇل – تەك ونەركاسىپ پەن عىلىم ەمەس, سونىمەن قاتار مەملەكەت پەن قوعام دا جىلدام بەيىمدەلۋدى قاجەت ەتەتىن ۋاقىت. گەوساياسي قىسىم, ەنەرگەتيكالىق داعدارىس نەمەسە كليماتتىڭ وزگەرۋى سەكىلدى سىرتقى فاكتورلارعا توتەپ بەرۋدىڭ بىردەن-ءبىر جولى – ءتوزىمدى, تۇراقتى يننوۆاتسيالىق ەكوجۇيەلەردى قالىپتاستىرۋ. مەنىڭ ويىمشا, قازاقستان وسى باعىتتا ورتالىق ازيا وڭىرىندە كوشباسشى ەل بولا الادى. قازاقستان ۇستانىپ وتىرعان ساياسات وڭىرلىك تۇراقتىلىق پەن باسەكەگە قابىلەتتىلىكتى ارتتىرۋدا ۇلگى بولارلىق دەڭگەيدە.
تەحنولوگيا ترانسفەرى تۋرالى ايتقاندا, مەن ۇنەمى «ينكليۋزيۆتىلىك», «كوگەزيا», «ادام كاپيتالى», «تالانتتار» جانە «عىلىمي ىزدەنىس» سياقتى ۇعىمداردى قاتار قولدانامىن. ويتكەنى يننوۆاتسيانىڭ وزەگى – ادام. عىلىمي ناتيجەلەر مەن تەحنولوگيالاردى تابىستى ترانسفەرلەۋ ءۇشىن ەڭ الدىمەن قوعامنىڭ ناقتى قاجەتتىلىكتەرىن ءتۇسىنۋ قاجەت. ۇكىمەتتىڭ ماقسات-مىندەتتەرى مەن دامۋ امبيتسياسى دا وسى قاجەتتىلىكتەرمەن ۇندەس بولۋعا ءتيىس. بۇل – سالاارالىق جانە ترانسۇلتتىق دەڭگەيدە ىسكە اسىرىلاتىن ساياسات. بۇرىن ءبىز عىلىم, ءبىلىم, يندۋستريا ۇشتىگىن قامتيتىن ء«بىلىم ءۇشبۇرىشى» مودەلىن ۇستاناتىنبىز. بىراق بۇگىن بۇل تىزبەككە مەملەكەت پەن قوعام قوسىلدى. سەبەبى ءبىز اشىق دەرەكتەر مەن جىلدام اقپارات الماسۋ داۋىرىندە ءومىر ءسۇرىپ جاتىرمىز. سوندىقتان عىلىمدى دامىتۋ عىلىم جانە جوعارى ءبىلىم مينيسترلىگىنىڭ عانا ەمەس, بارلىق مەملەكەتتىك ينستيتۋتتىڭ ورتاق مىندەتى. قازاقستانداعى عىلىم مەن يننوۆاتسيا سالاسىنا پرەزيدەنت اكىمشىلىگى دەڭگەيىندە ەرەكشە نازار اۋدارىلىپ وتىرعانى اسا قۇپتارلىق ءىس.
حالىقارالىق عىلىم جانە تەحنولوگيا ورتالىعى وسىدان 30 جىل بۇرىن, كەڭەس وداعى كەڭىستىگىندەگى عىلىمي الەۋەتتى ساقتاۋ ماقساتىندا قۇرىلعان بولاتىن. سول كەزدە باستى ميسسيامىز – عالىمدارعا قولداۋ كورسەتۋ, ولاردىڭ زەرتتەۋ الەۋەتىن ساقتاپ قالۋ ەدى. بۇگىندە الەم كۇردەلى گەوساياسي داعدارىستارمەن بەتپە-بەت كەلىپ وتىر. قازاقستان تەك جاساندى ينتەللەكت ساياساتى باعىتىندا باتىل قادام جاساپ وتىرعان جوق, سونىمەن بىرگە حالىقارالىق عىلىمي ۇيىمدى ەل اۋماعىندا ورنالاستىرۋ ارقىلى ستراتەگيالىق كورەگەندىك تانىتتى. بۇل شەشىم ەلدىڭ عىلىمي بەدەلىن ارتتىرىپ قانا قويماي, جاھاندىق دەڭگەيدە جاڭا سەرىكتەستىك مۇمكىندىگىنە جول اشتى. قازىرگى زاماندا عىلىم مەن ونەركاسىپ توعىسى – مەملەكەتتىڭ ستراتەگيالىق تۇراقتىلىعىنىڭ كورسەتكىشى. حالىقارالىق عىلىم جانە تەحنولوگيا ورتالىعى تاجىريبەسى كورسەتكەندەي, عىلىم تەك زەرتحانادا ەمەس, قوعام مەن ءوندىرىس اراسىندا ءجۇرىپ جاتقان ومىرشەڭ ۇدەرىسكە اينالۋعا ءتيىس. قازاقستان ءدال وسى باعىتتا ايماقتىق كوشباسشىلىق تانىتۋعا بارلىق مۇمكىندىگى بار مەملەكەت.
