جارقىن جەڭىسىمەن قۇتتىقتادى

قازاقستان پرەزيدەنتى نۇرسۇلتان نازارباەۆتىڭ اتىنا مەملەكەت, ۇكىمەت باسشىلارىنان, حالىقارالىق ۇيىمداردىڭ جەتەكشىلەرىنەن سايلاۋداعى جەڭىسىنە بايلانىس­تى قۇتتىقتاۋلار ءالى دە كەلىپ جاتىر نۇرسۇلتان نازارباەۆتىڭ اتىنا ەۋروپالىق كەڭەس پرەزيدەنتى دونالد تۋسك پەن ەۋروپالىق كوميسسيا پرەزيدەنتى جان-كلود يۋنكەردەن قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى. اۆتورلار ءوز قۇتتىقتاۋلارىندا ەۋروپالىق وداق قازاقستانمەن قارىم-قاتىناستى نىعايتۋدى جاقتايتىنىن اتاي كەلىپ, نۇرسۇلتان نازارباەۆقا جانە ەلىمىزدىڭ حالقىنا تاتۋلىق پەن باقۋاتتىلىق تىلەگەن. «ەۋروپالىق وداق قازاقستانمەن ىنتىماقتاستىقتى ودان ءارى كۇشەيتۋگە جانە كەڭەيتىلگەن سەرىكتەستىك جانە ىنتىماقتاستىق تۋرالى جاڭا كەلىسىمدى قامتي وتىرىپ, ءسىزدىڭ باسشىلىعىڭىزبەن جۇرگىزىلىپ جاتقان ماڭىزدى ساياسي جانە ەكونوميكالىق رەفورمالارعا بەرىك قولداۋدى جالعاستىرۋعا بەيىلدى. ءبىز بۇل قۇجاتقا مۇمكىندىگىنشە بيىل قول قويىلادى دەپ  اسىعا كۇتەمىز», – دەلىنگەن حاتتا. ەۋروپالىق كەڭەس پەن ەۋروپالىق كوميسسيا قازاقستان پرەزيدەنتىنىڭ رەفورما جۇرگىزۋدەگى, اسىرەسە, ترانسپارەنتتى, ەسەپ بەرەتىن مەملەكەتتى دامىتۋ باعىتىنداعى كۇش-جىگەرىنە, سونداي-اق, سايلاۋ ۇدەرىسىن ءارى قاراي جەتىلدىرۋ ىسىنە قولداۋ كورسەتەتىنىن اتاپ ايتتى. «ءبىز تاياۋ جىلدارى ساياسي جانە ەكونوميكالىق جاڭعىرۋلار ەۋروپالىق وداق پەن قازاقستان اراسىنداعى قارىم-قاتىناستى كۇشەيتە تۇسەتىنىنە سەنىمدىمىز», – دەلىنگەن قۇتتىقتاۋدا. * * * نۇرسۇلتان نازارباەۆتى قازاقستان رەسپۋبليكاسى پرەزيدەنتى بولىپ سايلانۋىنا بايلانىستى قۇتتىقتاعان جەدەلحات گرەكيا رەسپۋبليكاسىنىڭ پرەزيدەنتى پروكوپيس پاۆلوپۋلوستان كەلدى, دەپ حابارلادى پرەزيدەنتتىڭ ءباسپاسوز قىزمەتى. پ.پاۆلوپۋلوس قازاقستان مەن گرەكيا اراسىنداعى بەرىك ءارى دوستىق قاتىناستار مىقتى نەگىزگە, ەكى ەلدىڭ بىرلەسكەن كۇن تارتىبىندەگى ماسەلەلەردى ورتاق كۇش-جىگەر عانا تابىستى شەشە الادى دەگەن سەنىمگە سۇيەنەتىنىن اتاپ وتكەن. «ءبىزدىڭ مەملەكەتتەرىمىز ەكى رەسپۋبليكا حالىقتارىنىڭ يگىلىگى جولىنداعى سايا­سي جانە ەكونوميكالىق بايلانىستاردى كەڭەيتۋ ماقساتىنداعى بىرلەسكەن جۇمىس پەن ىنتىماقتاستىقتى جالعاستىراتىنىنا سەنىمدىمىن», – دەلىنگەن جەدەلحاتتا. گرەكيا پرەزيدەنتى نۇرسۇلتان نازارباەۆقا مىقتى دەنساۋلىق, ال قازاقستان حالقىنا باقۋاتتىلىق پەن باق-بەرەكە تىلەدى.   * * * نۇرسۇلتان نازارباەۆتىڭ اتىنا ەۋروپالىق وداقتىڭ قازاقستانداعى وكىلدىگىنىڭ باسشىسى اۋرەليا بۋشەزدىڭ قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى. ا.بۋشەز قازاقستاننىڭ نۇرسۇلتان نازارباەۆتىڭ باسشىلىعىمەن قول جەتكىزگەن جانە بولاشاققا دەگەن ونىڭ كورەگەن بولجامىنان قۋات العان ەلەۋلى تابىستارى ەلدىڭ ەكونوميكالىق جەتىستىكتەرى مەن تۇراقتىلىعىن, حالىقتىڭ بىرلىگى مەن كەلىسىمىن قامتاماسىز ەتكەنىن اتاپ وتكەن. «قازاقستان ەۋروپالىق وداقتىڭ وڭىردەگى ەڭ باستى سەرىكتەسىنە اينالدى. «قازاقستان-2050» ستراتەگياسى جانە ءسىز جاريالاعان, الىستى كوزدەگەن ساياسي, ەكونوميكالىق جانە قۇقىقتىق رەفورمالار باعدارلاماسى ەلىڭىزدى تىڭ تابىستارعا جەتەلەپ, كەڭەيتىلگەن سەرىكتەستىك جانە ىنتىماقتاستىق تۋرالى كەلىسىم ارقىلى ەو-مەن ىنتىماقتاستىققا جاڭا جولدار اشاتىنىنا سەنىمدىمىن. ءبىزدىڭ وتە جاقسى ەكىجاقتى ىنتىماقتاستىعىمىز ءارى قاراي ورىستەپ, تەرەڭدەي تۇسەرىنە, سونداي-اق, قازاقستاننىڭ كوپۆەكتورلى ساياساتىن جالعاستىرۋعا ءوز ۇلەسىن قوساتىنىنا سەنەمىن. ەۋروپالىق وداق وكىلدىگى وسى ماقساتتاردى قولداۋعا بەيىلدى جانە وعان جەتۋ ءۇشىن مۇمكىندىگىنشە ۇلەس قوسۋعا دايىن», – دەلىنگەن قۇتتىقتاۋدا. * * * نۇرسۇلتان نازارباەۆتىڭ اتىنا كۋبا رەسپۋبليكاسى مەملەكەتتىك كەڭەسىنىڭ جانە مينيسترلەر كەڭەسىنىڭ توراعاسى راۋل كاسترودان قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى. ر.كاسترو قازاقستان پرەزيدەنتىنە رياسىز قۇتتىقتاۋىن جولداپ, ەكى ەل اراسىنداعى قارىم-قاتىناستى ودان ءارى دامىتۋعا نيەتتى ەكەنىن ءبىلدىردى. * * * نۇرسۇلتان نازارباەۆتىڭ اتىنا مالديۆ رەسپۋبليكاسىنىڭ پرەزيدەنتى ابدۋللا ياميننەن قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى. ا.يامين ۇكىمەتتىڭ, مالديۆ حالقىنىڭ جانە جەكە ءوزىنىڭ اتىنان  نۇرسۇلتان نازارباەۆقا قازاقستان پرەزيدەنتى بولىپ قايتا سايلانۋىنا بايلانىستى شىنايى قۇتتىقتاۋىن جولدادى. «سايلاۋداعى جەڭىس ءسىزدىڭ ۇكىمەتتىڭ مىندەتتەردى تابىستى ورىنداۋىنىڭ دالەلى, سونداي-اق, قازاقستان حالقىنىڭ ءسىزدىڭ باسشىلىعىڭىزعا سەنىمىنىڭ ايعاعى بولىپ تابىلادى. ەلدەرىمىزدىڭ اراسىنداعى قارىم-قاتىناستار تاياۋ جىلدارى بۇدان ءارى نىعايا تۇسەدى دەپ ۇمىتتەنەمىن», – دەلىنگەن جەدەلحاتتا. مالديۆ رەسپۋبليكاسىنىڭ پرەزيدەنتى مەملەكەت باسشىسىنا مىقتى دەنساۋلىق, باقۋاتتىلىق جانە ماڭىزدى مىندەتتەردى ورىنداۋدا باتىلدىق, ال دوستاس قازاقستان حالقىنا وركەندەۋ مەن ىلگەرىلەۋ جولىندا جاڭا بيىكتەرگە جەتۋدى تىلەدى. * * * نۇرسۇلتان نازارباەۆتىڭ اتىنا يۋنەسكو باس ديرەكتورى يرينا بوكوۆادان قازاقستان پرەزيدەنتى بولىپ قايتا سايلانۋىنا بايلانىس­تى قۇتتىقتاۋ جەدەلحاتى كەلدى, دەپ حابارلادى پرەزيدەنتتىڭ ءباسپاسوز قىزمەتى. ي.بوكوۆا قازاقستاننىڭ نۇرسۇلتان نازارباەۆتىڭ باسشىلىعىمەن جەتكەن ماڭىزدى جەتىستىكتەرىنە, اسىرەسە الەۋمەتتىك جانە ەكونوميكالىق دامۋداعى تابىستارىنا نازار اۋداردى. «ءسىزدىڭ ەل مەن يۋنەسكو اراسىنداعى ىنتىماقتاستىقتىڭ كەڭەيۋى, سونداي-اق, قازاقستاننىڭ ءبىلىم, عىلىم جانە مادەنيەت سالالارىنىڭ سوڭعى 20 جىلداعى دامۋى ءتانتى ەتەدى», – دەلىنگەن جەدەلحاتتا. يۋنەسكو باس ديرەكتورى, سونداي-اق, ءبىزدىڭ ەلدىڭ بۇۇ باس اسسامبلەياسىنىڭ حالىقارالىق مادەنيەتتەردى جاقىنداستىرۋ جىلىن (2013-2022) جاريالاۋعا بايلانىستى ماڭىزدى باستاماسىن اتاپ ءوتتى. ي.بوكوۆا قازاقستان مەن يۋنەسكو اراسىنداعى تىعىز ىنتىماقتاستىقتىڭ جالعاساتىنىنا سەنىم ءبىلدىردى, سونداي-اق, ورتاق مىندەتتەر مەن ماقساتتاردى ورىنداۋ ءۇشىن بار كۇش-جىگەرىن جۇمسايتىنىن ايتتى.