ءتۋرنيردىڭ اشىلۋ سالتاناتىنا پرەمەر-مينيستر ولجاس بەكتەنوۆ, حالىقارالىق ۇستەل تەننيسى فەدەراتسياسىنىڭ (ITTF) باس حاتشىسى راۋل كالين, «Nomad Table Tennis Academy» ۇستەل تەننيسى اكادەمياسىنىڭ نەگىزىن قالاۋشى مەدەۋ نۇراسىل قاتىستى.
ۇستەل تەننيسى – جىلدامدىق, ەپتىلىك, شاپشاڭ ويلاۋ قابىلەتىن دامىتاتىن تانىمال سپورت ءتۇرى. كەيىنگى جىلدارى بۇل ويىن ەلىمىزدە كەڭىنەن قانات جايىپ, بۇقارالىق, كاسىبي دەڭگەيدە دامىپ كەلەدى. ەل كولەمىندە ۇستەل تەننيسىمەن اينالىساتىن سەكتسيالار سانى ارتتى. وبلىستىق, قالالىق سپورت مەكتەپتەرىندە بالالار مەن جاسوسپىرىمدەرگە ارنالعان ۇيىرمەلەر كوپتەپ اشىلىپ جاتىر. استانا, الماتى, شىمكەنت سىندى ءىرى قالالاردا زاماناۋي ۇستەل تەننيسى ورتالىقتارى جۇمىس ىستەيدى. ەلىمىزدىڭ سپورتشىلارى ءتۇرلى الەمدىك, حالىقارالىق تۋرنيرلەرگە قاتىسىپ, جۇلدەلى ورالىپ ءجۇر. سپورتشىلارعا قولداۋ رەتىندە ۇلتتىق قۇرامانىڭ بازاسى بارىنشا نىعايتىلىپ جاتىر.
ۇستەل تەننيسىنىڭ جاڭا ساتىعا كوتەرىلۋىنىڭ جارقىن ءبىر كورىنىسى – ەلىمىز 2024 جىلى العاش رەت ازيا چەمپيوناتىن قابىلدادى. 2027 جىلعى ەرەسەكتەر اراسىنداعى الەم چەمپيوناتىن وتكىزۋ مارتەبەسىنە يە بولدى. مۇنىڭ ءبارى مەملەكەت باسشىسىنىڭ بۇقارالىق سپورتتى دامىتۋعا ەرەكشە ءمان بەرىپ وتىرعانىنىڭ ارقاسى. بۇگىندە ۇستەل تەننيسىمەن 260 مىڭنان اسا ادام جۇيەلى تۇردە شۇعىلدانادى. سالادا 10 مىڭنان اسا كاسىبي سپورتشى, 400-دەي جاتتىقتىرۋشى ەڭبەك ەتەدى. 20 وڭىردەگى فەدەراتسيا تۇراقتى جۇمىس ىستەپ تۇر, 12 زاماناۋي ۇستەل تەننيس ورتالىعى بار.
ءتۋرنيردىڭ سوڭعى كۇنى ۇستەل تەننيسىنىڭ الەمدىك جۇلدىزدارى – 2 دۇركىن وليمپيادا چەمپيونى, 10 دۇركىن الەم چەمپيونى سيۋي سين (قىتاي), الەم چەمپيونى فان بو (قىتاي), الەم چەمپيونى ۆەرنەر شلاگەر (اۋستريا), الەم چەمپيوناتىنىڭ ەكى مارتە جۇلدەگەرى دجۋ سە حيوكتىڭ (كورەيا) قاتىسۋىمەن شوۋ-ماتچ ۇيىمداستىرىلدى. بۇل كەزدەسۋلەردى مەملەكەت باسشىسى ق.توقاەۆ ارنايى بارىپ تاماشالادى.
اۋقىمدى ءىس-شارانى تۋريزم جانە سپورت مينيسترلىگى, استانا قالاسىنىڭ اكىمدىگى, قازاقستان ۇستەل تەننيسى فەدەراتسياسىنىڭ قولداۋىمەن «Nomad» اكادەمياسى ۇيىمداستىردى. «Aspan Holdings, VD Stroy Engineering» كومپانيالارى دەمەۋشىلىك ەتتى. تۋرنير بۇرىن-سوڭدى بولماعان جۇلدە قورىمەن تاريحتا قالدى. جەتكىنشەك جەڭىمپازداردىڭ ءوزى تۇڭعىش رەت 5 000 دوللارىنا, كۇمىس جۇلدەگەرلەر 2 500 دوللارعا, قولا جۇلدەگەرلەر 1 500 دوللارعا يە بولدى.
– الەمنىڭ ماڭدايالدى شەبەرلەرىنىڭ ارنايى كەلۋى ءتۋرنيردى ناعىز مەرەكەگە اينالدىردى. حالىقارالىق جارىس «Nomad Table Tennis» اكادەمياسىنىڭ ەلىمىزدە ۇستەل تەننيسىن بۇقارالىق سپورتقا اينالدىرۋ جولىندا جاساعان العاشقى قادامى بولدى, – دەدى اكادەميا ديرەكتورى رۋسلان جەتىباەۆ.
– ۇيىمداستىرۋ كوميتەتىنىڭ كاسىبي دەڭگەيىن ەرەكشە اتاپ وتكىم كەلەدى. جارىستىڭ ءاربىر بولشەگىنە دەيىن مۇقيات ويلاستىرىلعان. ۇستەل تەننيسىندە ازيانىڭ ۇلەسى باسىم, سول ورايدا قازاقستان دا تەننيس دەرجاۆاسى رەتىندە ءوز تۇعىرىن بەكىتە ءتۇستى, – دەدى حالىقارالىق ۇستەل تەننيسى فەدەراتسياسىنىڭ باس حاتشىسى راۋل كالين.
تارتىستى ءتۋرنيردىڭ ءار كۇنى ۇلكەن-كىشى سپورتشىلاردىڭ ونەرىن, شەبەرلىگىن پاش ەتكەن كوركەم كورىنىستەرگە, قىزىقتى ساتتەرگە تولى بولدى. تاماشالاۋعا كەلگەن بارشا جانكۇيەرگە ۇمىتىلماس كوڭىل كۇي, ەرەكشە اسەر سىيلادى.
