اشىلۋ راسىمىندە ءماجىلىس دەپۋتاتى, اسىق اتۋ فەدەراتسياسىنىڭ پرەزيدەنتى ولجاس قۇسپەكوۆ ەجەلدەن كەلە جاتقان ۇلتتىق ويىندى دارىپتەۋ ازاماتتىق بورىش ەكەنىن اتاپ ءوتتى.
«اسىق اتۋ ويىن عانا ەمەس, ول – ءبىزدىڭ ءتۇپ-تامىرىمىز, رۋحاني كودىمىز بەن ءداستۇرىمىز, ۇلتتىق سپورت ءتۇرىنىڭ باستاۋى. ونىڭ تاريحى تىم تەرەڭدە, سوناۋ كونە عاسىرلار قويناۋىندا جاتىر. اسىق ويىنى حالقىمىزدىڭ تۇرمىس-سالتىمەن بىتە قايناسقان. تۋرنير – ۇلتتىق سپورتتى ناسيحاتتاۋدىڭ ءبىر كورىنىسى. ءبىز اسىق اتۋدى ءداستۇر رەتىندە عانا ەمەس, قوعامدى بىرىكتىرەتىن زاماناۋي مادەني قۇبىلىس سيپاتىندا دامىتقىمىز كەلەدى. سەبەبى ۇلتتىق سپورت قازاقتىڭ ترەندى بولۋعا ءتيىس», دەدى و.قۇسپەكوۆ.
تارتىستى وتكەن جارىس قورىتىندىسىندا اقتوبەلىك ق ۇلىبەك عارىشبەك جەڭىمپاز اتاندى. سپورتشىعا «Allur» اۆتوموبيل كومپانياسى «Chevrolet Onix» اۆتوكولىگىن سىيعا تارتتى. تۇركىستان وبلىسىنان كەلگەن ءابىلحان تالعار ەكىنشى ورىن يەلەندى. وعان 1 ملن تەڭگە سىياقى بەرىلدى. باتىس قازاقستان وبلىسىنىڭ اسىق اتۋ شەبەرى سلامقۇل باقداۋلەت ءۇشىنشى ورىن الىپ, 500 مىڭ تەڭگە قارجىلاي سىيلىقپەن ماراپاتتالدى. ودان بولەك «Amanat» پارتياسى پاۆلودارلىق جازدىقباي كەرىمگە 300 مىڭ تەڭگە اقشالاي جۇلدە تاپسىردى.
جەڭىمپازداردى قۇتتىقتاعان كولىك كومپانياسىنىڭ وكىلى ايگۇل احمەتوۆا «Allur» ءاردايىم ءتۋرنيردىڭ رەسمي سەرىكتەسى ءارى دەمەۋشىسى بولىپ قالا بەرەتىنىن جەتكىزدى.
«كومپانيا قاشاندا ۇلتتىق قۇندىلىقتار مەن جاسامپازدىق رۋحتى قولدايدى. سونىڭ ىشىندە اسىق اتۋ ويىنىنىڭ الار ورنى ەرەكشە. ءبىز سپورت پەن مادەنيەتتەگى شىعارماشىلىق باستامالار ارقىلى ۇلتتىق سانانى جاڭعىرتۋدى كوزدەيمىز. جارىستا ۇزدىك دەپ تانىلعان سپورتشىلار – ناعىز حالىقتىق ءداستۇردى دارىپتەۋشىلەر. ولار – وسكەلەڭ ۇرپاققا ارقاشان ۇلگى», دەدى ا.احمەتوۆا.
