توعىز ايدىڭ قورىتىندىسى بويىنشا بۇل باعىتتاردا ءوسىم قارقىنى جوسپاردان تومەن بولعانى اتاپ ءوتىلدى. وڭدەۋ ونەركاسىبىندە ماشينا جاساۋ (+14%), حيميا ونەركاسىبى (+9,6%), قۇرىلىس ماتەريالدارىن ءوندىرۋ (+4,7%), جەڭىل ونەركاسىپ (+9,4%), رەزەڭكە مەن پلاستماسسا بۇيىمدارىن شىعارۋ (+6,1%), دايىن مەتالل ونىمدەرىن ءوندىرۋ (+15,2%) سالالارىندا ىلگەرىلەۋ بولعان.
قاڭتار–قىركۇيەك ايلارىندا وڭدەۋ ونەركاسىبىنىڭ ءوسىمى +6,2% بولدى, ال ون ايدىڭ قورىتىندىسى بويىنشا ءوسىم شامامەن +6,3% دەڭگەيىندە بولجانىپ وتىر. نەگىزگى باياۋلاۋ مەتاللۋرگيا سالاسىندا بايقالادى. ونىڭ ۇلەسى وڭدەۋ ونەركاسىبىنىڭ شامامەن 40%-ى.
ايتا كەتەيىك, 2024 جىلى مەتاللۋرگيا سوڭعى ون جىلداعى ەڭ جوعارى كورسەتكىشكە – 6,9% وسىمگە قول جەتكىزگەن بولاتىن. بۇل بيىلعى جىلعا جوعارى بازا قالىپتاستىردى. شتاب وتىرىسىندا باياۋلاۋدىڭ سەبەبى جان-جاقتى تالدانىپ, سالانىڭ ءوسۋىن جەدەلدەتۋ شارالارى تالقىلاندى.
قارا مەتاللۋرگياداعى باسەڭدەۋ نەگىزىنەن فەرروقورىتپا مەن بولات ءوندىرۋدىڭ ازايۋىنا بايلانىستى. بەس فەرروقورىتپا زاۋىتىنىڭ تورتەۋى بيىل ەلەكتر ەنەرگياسى تاريفتەرىنىڭ كوتەرىلۋىنە بايلانىستى ءوندىرىس كولەمىن قىسقارتقان. اسىرەسە, قاراعاندى وبلىسىنداعى كاسىپورىنداردا ءونىم كولەمى ازايعان, بۇل ءوڭىردىڭ جالپى وڭىرلىك ونىمىندە 0,9% ۇلەسكە يە. سونداي-اق سالاداعى بىرقاتار كاسىپورىندا جۇرگىزىلگەن جوسپارلى كۇردەلى جوندەۋ جۇمىستارى دا اسەرىن تيگىزدى.
ءتۇستى مەتاللۋرگيادا ءوسىم قارقىنىنىڭ تومەندەۋى ۆاسيلكوۆ كەن ورنىندا شاحتالىق ادىسكە كوشۋ جانە قورلاردىڭ سارقىلۋىمەن بايلانىستى.
سەرىك جۇمانعارين ەنەرگەتيكا مينيسترلىگىنە قىسقا مەرزىم ىشىندە قولدانىستاعى قۇجاتتارعا وزگەرىستەر ەنگىزۋ مۇمكىندىگىن پىسىقتاپ, فەرروقورىتپا زاۋىتتارىنا تومەندەتىلگەن تاريف بويىنشا ەلەكتر ەنەرگياسىن بەرۋدى قاراستىرۋدى تاپسىردى.
توعىز ايدىڭ قورىتىندىسى بويىنشا ماشينا جاساۋ سالاسى 14% ءوسىم كورسەتتى. سالاعا جاڭا سەرپىن Astana Motors Manufacturing Kazakhstan زاۋىتىندا جەڭىل اۆتوكولىك ءوندىرىسىنىڭ ىسكە قوسىلۋى ارقىلى بەرىلمەك.
حيميا ونەركاسىبى دە تۇراقتى ءوسىمىن ساقتاپ وتىر – 9,6%. بۇل ءوسىم امموفوس (+55,4%), اممياك سەليتراسى (+14,5%), ناتري ءتسيانيدى (+5,4%), پوليپروپيلەن (+50,5%), سارى فوسفور (+12,6%) جانە كۇكىرت قىشقىلى (+7,3%) ءوندىرىسىنىڭ ارتۋى ەسەبىنەن قامتاماسىز ەتىلدى.
بيىلعى قۇرىلىس جۇمىستارىنىڭ ەڭ ۇلكەن ۇلەسى كولىك ينفراقۇرىلىمىنا تيەسىلى – 21,3% (جولدار مەن اۆتوماگيسترالدار, تەمىرجول جانە مەترو, كوپىرلەر مەن توننەلدەر قۇرىلىسى). ونەركاسىپتىك نىساندار ۇلەسى – 20,5% (سۋمەن قامتۋ, كارىز جۇيەلەرى مەن تۇرعىن ءۇي قۇرىلىسى). گاز قۇبىرلارى, ەلەكتر بەرۋ جەلىلەرى جانە جىلۋ جەلىلەرىن سالۋ جوبالارى شامامەن 5,6%.
سالا ءوسىمىنىڭ قارقىنى جوعارى دەڭگەيدە ساقتالىپ وتىر: توعىز ايدا +14,9%, ون ايدىڭ قورىتىندىسى بويىنشا +15,2%.
سەرىك جۇمانعارين توعىز اي قورىتىندىسى بويىنشا قۇرىلىس قارقىنى تومەندەگەن وڭىرلەردىڭ اكىم ورىنباسارلارىنىڭ بايانداماسىن تىڭداپ, ءاربىر ونەركاسىپ نىسانى مەن قۇرىلىستى تۇراقتى باقىلاۋدا ۇستاۋدى تاپسىردى. قيىندىقتار تۋىنداعان جاعدايدا, ماسەلە جەدەل تۇردە شتابتىڭ قاراۋىنا شىعارىلۋى ءتيىس دەدى.
https://kaz.inform.kz/news/serk-zhumangarin-ferrokoritpa-zauittarina-elektr-energiyasin-tomendetlgen-tarifpen-berud-tapsirdi-5c2019/
